Gujarat Weather: અઠવાડિયાના અંતમાં વરસાદની આગાહી નહીં, તાપમાન સામાન્ય કરતા નોંધાય છે નીચું

અમદાવાદઃ હવામાન વિભાગ દ્વારા આગામી 4 દિવસની આગાહી કરી છે જેમાં વરસાદની સંભાવના વ્યક્ત કરાઈ નથી, જોકે રાજ્યમાં ઘણાં ઠેકાણે વાદળછાયું વાતાવરણ છે અને નજીકના સમયમાં હવામાનમાં પલટો આવે તેવી સંભાવના વ્યક્ત કરવામાં આવી રહી છે. રાજ્યમાં વરસાદી વાતાવરણની સાથે તાપમાન સામાન્ય કરતા નીચું નોંધાઈ રહ્યું છે. હવામાન નિષ્ણાંત અંબાલાલ પટેલ દ્વારા એપ્રિલમાં પણ માવઠા પરેશાન કરતા રહેશે તેવી આગાહી કરી છે.

હવામાન વિભાગ દ્વારા 31મી માર્ચે કરવામાં આવેલી આગાહીમાં 1થી 4 એપ્રિલ દરમિયાન વરસાદ થવાની સંભાવના વ્યક્ત કરવામાં આવી નથી. જોકે, આગામી સમયમાં આગાહી નથી કરાઈ તે દિવસો દરમિયાન પણ વેસ્ટર્ન ડિસ્ટર્બન્સની અસર થઈ શકે છે. રાજ્યમાં થયેલા કમોસમી વરસાદના કારણે ખેડૂતો પર માઠી અસર પડી છે.

રાજ્યમાં વરસાદી અને વાદળછાયું વાતાવરણ રહેવાથી તાપમાન સામાન્ય કરતા નીચું નોંધાઈ રહ્યું છે. આગામી ચાર દિવસ દરમિયાન મહત્તમ તાપમાનમાં મોટા ફેરફાર થવાની સંભાવના નથી. જ્યારે લઘુત્તમ તાપમાન પણ કોઈ મોટો ફેરફારની શક્યતા વ્યક્ત કરવામાં આવી નથી.

રાજ્યમાં શુક્રવારે સૌથી ઊંચું તાપમાન અમદાવાદ, ગાંધીનગર અને રાજકોટમાં 35 ડિગ્રી નોંધાયું હતું. જ્યારે સૌથી નીચું લઘુત્તમ તાપમાન 19 ડિગ્રી સૌરાષ્ટ્રના મહુવા તથા કેશોદમાં નોંધાયું હતું. આ સિવાય રાજ્યના અન્ય ભાગોમાં લગભગ 20-21 ડિગ્રી તાપમાન રહ્યું હતું.

તારીખ 3થી 8 એપ્રિલ દરમિયાન હવામાનમાં પલટો આવવાની શક્યતા છે. આ પલટો લાંબા સમય સુધી ચાલવાની શક્યતાઓ અંબાલાલે વ્યક્ત કરી છે. તેમણે 14 તારીખ સુધીમાં પુનઃ આંધી, વંટોળ અને ગરમી સાથે કેટલાક ભાગોમાં વરસાદ થવાની શક્યતા વ્યક્ત કરી છે. કરા પડવાની પણ શક્યતા છે.