Gujarat Weather: કમોસમી વરસાદનું જોર ઘટ્યું, આગામી દિવસોમાં કેવું રહેશે હવામાન?

અમદાવાદઃ હવામાનમાં આવેલા પલટાના કારણે ઉનાળાની શરુઆત વરસાદ સાથે થઈ છે. વેસ્ટર્ન ડિસ્ટર્બન્સના લીધે રાજ્યમાં ઠેર-ઠેર વરસાદ અને કરા પડવાની ઘટના બની છે. જોકે, કમોસમી વરસાદનું જોર ઘટી રહ્યું છે. જોકે, આગામી દિવસોમાં સમયાંતરે કમોસમી વરસાદ અને વાવાઝોડાની સંભાવના વ્યક્ત કરવામાં આવી રહી છે. હવામાન વિભાગ દ્વારા રાજ્યમાં અઠવાડિયાના બાકી દિવસોમાં પણ કમોસમી વરસાદ થવાની આગાહી કરવામાં આવી છે. વરસાદી વાતાવરણના લીધે ગરમીનું જોર ઘટ્યું છે.

આજે રાજ્યના ઉત્તર ભાગમાં આવેલા સાબરકાંઠા, બનાસકાંઠા અને પાટણ તથા દ્વારાકા, રાજકોટ તથા કચ્છમાં કમોસમી વરસાદ થવાની આગાહી વ્યક્ત કરવામાં આવી છે. પાછલા દિવસોમાં અમદાવાદ, ગાંધીનગર સહિત કચ્છ અને સૌરાષ્ટ્ર તથા મધ્ય અને દક્ષિણ ગુજરાતમાં કમોસમી વરસાદના નોંધાયો છે.

23મી માર્ચે રાજ્યના બનાસકાંઠા, સાબરકાંઠા, પાટણમાં હળવા વરસાદ કે થંડર સ્ટ્રોમ એક્ટિવિટીની સંભાવના વ્યક્ત કરવામાં આવી છે. આ સિવાય સૌરાષ્ટ્ર-કચ્છના દ્વરાક, પોરબંદર અને કચ્છમાં પણ હળવાથી ભારે વરસાદી ઝાપટાં થઈ શકે છે.

24 અને 25મી માર્ચે રાજ્યના તમામ ભાગોમાં હવામાન સૂકું રહેવાની સંભાવના હવામાન વિભાગ દ્વારા વ્યક્ત કરવામાં આવી છે. જોકે, આ પછી એપ્રિલ મહિનાની શરુઆતમાં પણ વરસાદી માહોલ બનવાની આગાહી હવામાન નિષ્ણાંત અંબાલાલ પટેલ દ્વારા વ્યક્ત કરવામાં આવી છે.

રાજ્યમાં વરસાદી માહોલ ઉભો થવાના કારણે ગરમીનો પારો મોટાભાગના વિસ્તારોમાં 40ની નજીક પહોંચી ગયા બાદ ફરી એકવાર 30ની આસપાસ આવી ગયો છે. મહત્તમ તાપમાનમાં ફેબ્રુઆરીના અંતમાં વધારો શરુ થયા બાદ તેમાં ફરી ઘટાડો થયો છે.

મંગળવારે રાજ્યમાં સૌથી ઊંચું મહત્તમ તાપમાન 35 ડિગ્રી તાપમાન વલસાડમાં નોંધાયું હતું, જ્યારે સૌથી નીચું લઘુત્તમ તાપમાન 15 ડિગ્રી નલિયામાં નોંધાયું હતું. આ સિવાય રાજ્યના મોટાભાગના વિસ્તારોમાં મહત્તમ તાપમાન 30-35ની વચ્ચે રહ્યું હતું.

અમદાવાદમાં મંગળવારે મહત્તમ તાપમાન 32, રાજકોટમાં 34, વડોદરામાં 32, સુરતમાં 31 ડિગ્રી રહ્યું હતું. આ સિવાય ગાંધીનગરમાં 31, ભુજમાં 35, ભાવનગરમાં 32, અમરેલીમાં 33, પોરબંદરમાં 30, સુરેન્દ્રનગરમાં 33 ડિગ્રી તાપમાન રહ્યું હતું.