Gujarat Weather Forecast: ગુજરાતના આ ભાગોમાં કોલ્ડવેવ રહેશે, ઠંડીમાં કમોસમી વરસાદની આગાહી

અમદાવાદઃ રાજ્યમાં પાછલા વર્ષે ડિસેમ્બરમાં ઠંડીનું પ્રમાણ ઓછું રહ્યા બાદ જાન્યુઆરીમાં ઠંડીનું જોર સતત વધી રહ્યું છે. હવામાન વિભાગ દ્વારા તાપમાનમાં વધારો થવાની સંભાવના વ્યક્ત કરવામાં આવી છે પરંતુ સૌરાષ્ટ્ર અને કચ્છમાં કોલ્ડવેવ રહેવાની આગાહી કરવામાં આવી છે. આ સાથે કમોસમી વરસાદ થવાની પણ સંભાવના વ્યક્ત કરવામાં આવી રહી છે. આ સિવાય રાજ્યના કેટલાક ભાગોમાં કોલ્ડ-ડે રહેવાની પણ આગાહી કરવામાં આવી છે.

સૌરાષ્ટ્ર-કચ્છમાં કોલ્ડવેવની આગાહીઃ આગામી 24 કલાકમાં સૌરાષ્ટ્ર અને કચ્છમાં કોલ્ડ વેવ રહેવાની આગાહી કરવામાં આવી છે. એટલે કે અહીં ઠંડીનું જોર વધવાની આગાહી વ્યક્ત કરવામાં આવી રહી છે. આ સિવાયના ભાગોમાં તાપમાન વધવાની સંભાવના છે પરંતુ ઠંડીનું પ્રમાણ યથાવત રહેશે.

અમદાવાદના હવામાન વિભાગના વડા મનોરમા મોહંતીએ જણાવ્યું છે કે, આગામી પાંચ દિવસ દરમિયાન તાપમાનમાં વધારો થવાની સંભાવના છે. જેમાં 2-3 ડિગ્રીનો વધારો થઈ શકે છે. જ્યારે કેટલાક ભાગોમાં મોટો ફેરફાર ના થવાની પણ સંભાવના છે.

મનોરમા મોહંતીએ જણાવ્યું કે, હજુ પણ સૌરાષ્ટ્ર અને કચ્છના કેટલાક ભાગોમાં કોલ્ડવેવની અસર રહેશે. જ્યારે કેટલાક ભાગોમાં કોલ્ડ-ડે પ્રબળ રીતે રહેવાની સંભાવના છે. સૌરાષ્ટ્ર કચ્છ સિવાયના ગુજરાતના ભાગોમાં તાપમાન વધવાની આગાહી સાથે પણ ઠંડીનું જોર રહેવાની સંભાવના હવામાન વિભાગ દ્વારા સંભાવના વ્યક્ત કરવામાં આવી રહી છે.

સૌરાષ્ટ્ર-કચ્છ સિવાયના ભાગોમાં ઠંડી રહેવાનું કારણઃ સૌરાષ્ટ્ર અને કચ્છના કેટલાક ભાગોમાં કોલ્ડવેવની આગાહી કરવામાં આવી છે પરંતુ ગુજરાતના અન્ય ભાગોમાં તાપમાન વધવા છતાં પવનની ગતિના કારણે ઠંડીનું જોર યથાવત રહેવાની સંભાવના વ્યક્ત કરવામાં આવી છે.

હવામાન વિભાગે જણાવ્યું કે, રાજ્યના ઘણાં ભાગોમાં તાપમાન 10 ડિગ્રી કે તેનાથી નીચે નોંધાયું છે. આગામી બે-ત્રણ દિવસમાં અહીં ધીમે-ધીમે તાપમાનમાં વધારો થશે. અહીં તાપમાન 10 ડિગ્રીથી 11-12 પર પહોંચી શકે છે. પરંતુ તેમ છતાં અહીં ઠંડીનો ચમકારો અનુભવાશે. કારણ કે હવાનું જોર અહીં વધુ રહેશે.

રાજ્યના રાજકોટ, પોરબંદર, કેશોદમાં કોલ્ડ-ડે રહેવાની સંભાવના છે. કોલ્ડ-ડે એટલે કે, મહત્તમ તાપમાનમાં 5 ડિગ્રી જેટલો ઘટાડો અને લઘુત્તમ તાપમાન 10 ડિગ્રી કે તેનાથી નીચું રહેવું. જેના કારણે ઉપરના ભાગોમાં કોલ્ડ-ડે રહેવાની સંભાવના વ્યક્ત કરવામાં આવી છે.

આ સાથે રાજ્યના સાબરકાંઠા, બનાસકાંઠા અને અરવલ્લીમાં માવઠું થવાની સંભાવના વ્યક્ત કરવામાં આવી છે. આ ભાગોમાં 28 જાન્યુઆરીએ કમોસમી વરસાદ થવાની સંભાવના વ્યક્ત કરવામાં આવી છે. આમ વરસાદ થવાથી અહીં ઠંડીનો ચમકારો પણ વધવાની સંભાવના છે.