Gujarat Weather Forecast: આજે પણ અમદાવાદમાં વરસાદની આગાહી, ગુજરાતમાંથી ક્યારે માવઠું લેશે વિદાય?

અમદાવાદઃ હજુ પણ રાજ્યમાં કમોસમી વરસાદી માહોલ રહેવાની સંભાવના હવામાન વિભાગ દ્વારા વ્યક્ત કરવામાં આવી છે. રાજ્યમાં થઈ રહેલા કમોસમી વરસાદના કારણે ખેડૂતોની મુશ્કેલી વધી છે. ઘણી જગ્યાઓ પર પાકને વરસાદ અને કરાના કારણે નુકસાન થયાની ફરિયાદો ખેડૂતો દ્વારા કરવામાં આવી રહી છે. વરસાદના કારણે બનેલી ડબલ ઋતુથી રોગચાળાના કેસોમાં પણ વધારો થઈ રહ્યો છે. હવામાન વિભાગે વરસાદ માહોલ રહેવાની સંભાવના વ્યક્ત કરીને કેટલાક વિસ્તારોમાં હળવા વરસાદની સાથે થંડરસ્ટ્રોમ એક્ટિવિટી થવાની આગાહી કરી છે.

અમદાવાદ કેન્દ્રના હવામાન વિભાગના વડા ડૉ. મનોરમા મોહંતી દ્વારા આગામી 24 કલાક દરમિયાન હળવા વરસાદની સાથે થંડરસ્ટ્રોમ એક્ટિવિ રાજ્યના કેટલાક ભાગોમાં રહેવાની સંભાવના વ્યક્ત કરવામાં આવી છે. સૌરાષ્ટ્રના ભાગોમાં વરસાદ થવાની વકી ડૉ. મનોરમા મોહંતીએ વ્યક્ત કરી છે.

તારીખ 25મી માર્ચથી રાજ્યમાં હવામાન ડ્રાય રહેવાની સંભાવના અને માવઠા નહીં થવાની સંભાવના વ્યક્ત કરવામાં આવી છે. ડૉ. મોહંતીએ વધુમાં જણાવ્યું કે, આગામી 48 કલાક સુધી તાપમાનમાં મોટા ફેરફારની સંભાવના નથી. જોકે, આ પછી મહત્તમ તાપમાનમાં 2-4 ડિગ્રીનો વધારો થવાની સંભાવના વ્યક્ત કરવામાં આવી છે.

દક્ષિણ-પશ્ચિમ રાજસ્થાન પર બનેલા સર્ક્યુલેશનના કારણે રાજ્યમાં વરસાદી માહોલ બન્યો છે. સર્ક્યુલેશનના લીધે 24 કલાક દરમિયાન સૌરાષ્ટ્ર-કચ્છના અમરેલી, ભાવનગર, બોટાદ, રાજકોટ, કચ્છ સહિત અમદાવાદ, આણંદ, બનાસકાંઠા, સાબરકાંઠામાં પણ વરસાદ થવાની સંભાવના હવામાન વિભાગે વ્યક્ત કરી છે.

રાજ્યમાં સૌથી ઊંચુ મહત્તમ તાપમાન વલસાડમાં 36 ડિગ્રી નોંધાયું છે જ્યારે સૌથી નીચું લઘુત્તમ તાપમાન 20 ડિગ્રી નલિયામાં નોંધાયું છે. આ સિવાય અમદાવાદમાં 35, ગાંધીનગરમાં 34, રાજકોટમાં 34, સુરતમાં 31, વડોદરામાં 34 ડિગ્રી મહત્તમ તાપમાન નોંધાયું છે.