બનાસકાંઠાઃ નાનકડી ઢિંગલીને કેન્સરગ્રસ્ત દર્દીઓની ચિંતા થઈ, પોતાના વાળ ઉતરાવીને મદદ કરી

કિશોર તુવર, બનાસકાંઠાઃ બનાસકાંઠાની નાનાકડી બાળકીએ બહુ મોટું કામ કરી બતાવ્યું છે. તેણે કરેલી મદદથી કેન્સરગ્રસ્ત દર્દીના મોઢા પર સ્મિત આવે તેવું કામ કર્યું છે. આ બાળકીને કઈ રીતે કેન્સરથી પીડાતા દર્દીને મદદ કરવામાં આવી અને તેને કઈ રીતે આ પ્રેરણા આવી તેની કહાની રસપ્રદ છે. 

સામાન્ય રીતે જ્યારે વાળ ખરવા લાગે કે હેર સ્ટાઈલમાં કંઈક લોચો વાગી જાય તો વ્યક્તિ અકળાઈ જતી હોય છે. પરંતુ બનાસકાંઠાની એક નાનાકડી છોકરીએ પોતાના ઉતરાવીને બીજાના ચહેરા પર સ્મિત લાવી દીધું છે.  નવ વર્ષની બાળકી તૃષાબા રાઠોડેએ કેન્સર પીડતોને મદદ કરવા માટે પોતાના વાળ ઉતરાવી દીધા છે. બલે આ બાળકીની ઉંમર નાની હોય પરંતુ તેના વિચારો ઘણાં ઊંચા છે. 

વડગામ તાલુકાના મેમદપુર ગામની ધોરણ-3માં અભ્યાસ કરતી, નવ વર્ષની બાળાનું નામ તૃષાબા છે અને તેના જન્મ પછી નાનીને કેન્સર થતા સારવાર દરમિયાન તેમના વાળ ખરી ગયા હતા. નાનીનું બોડું માથું જોઈને તૃષાબાને કેન્સરથી પીડાતા દર્દીઓ માટે કંઈક કરવાની ભાવના જાગી હતી. 

જ્યારે બાળકીને પોતાના વાળનું દાન કરવાની વાત માતા-પિતાને કરી ત્યારે તેની ઊમર નાની હતી માટે હવે તેના પરિવારે સહમતી દર્શાવી છે. આ પછી કેન્સરગ્રસ્ત દર્દીની મદદ કરતી સંસ્થાની શોધ શરુ કરવામાં આવી હતી. જેમાં હૈદરાબાદની એક સંસ્થાનો સંપર્ક થતા તૃષાબાના વાળ વિગ માટે ઉતારીને દાન કરવામાં આવ્યા હતા. 

મહત્વની વાત તો એ છે કે તુષાબા બનાસકાંઠાની સૌપ્રથમ એવી દીકરી છે કે જે કેન્સરગ્રસ્ત દર્દીઓની વહારે આવી છે અને સમાજમાં શ્રેષ્ઠ દાખલો બેસાડ્યો છે. તૃષાબાના વાળ ઉતારવામાં આવ્યા છે તેને હૈદરાબાદની સંસ્થા લઈ જશે અને તેની વિગ તૈયાર કરશે. કેન્સરગ્રસ્ત દર્દીઓની વહારે આવીને તૃષાબાએ પરિવારની સાથે આસપાસના લોકોનું દિલ જીતી લીધું છે. 

તૃષાબાના માતાએ આ અંગે વાત કરતા જણાવ્યું કે, જ્યારે તૃષાબા નાના હતા ત્યારે તેમણે જોયું હતું કે મારા માતાના વાળ કેન્સર બાદ ખરી ગયા હતા. આ ઘટના તેમના મગજમાં હતી અને તેમણે હાલમાં પોતાના વાળ દાન કરવાનો વિચાર આવ્યો અને તે અંગે અમને વાત કરી, જે બાદ અમે આ વિચારને આગળ વધાર્યો છે.

તૃષાબાએ નાના મોઢે મોટી વાત કરીને પોતે ભૂતકાળમાં જોયેલી ઘટના બાદ કેન્સરના દર્દીઓના ચહેરા પર સ્મિત લાવવાનો વિચાર આવ્યો હતો અને તેના માટે તેમણે આ પગલું ભર્યું હોવાનું જણાવ્યું છે.