અંબાલાલ પટેલની હવામાન અંગે મોટી આગાહી, એપ્રિલમાં આ તારીખો દરમિયાન વરસાદ રહેશે

ગાંધીનગરઃ માર્ચ મહિનામાં જ્યાં ઉનાળાની શરુઆત થતી હોય છે પરંતુ ચોમાસાની શરુઆત થઈ હોય તેવું વાતાવરણ રહ્યું હતું, રાજ્યમાં ઠેર-ઠેર હળવાથી ભારે અને ગાજવીજ સાથે વરસાદ થયો હતો. વરસાદની સાથે ઉત્તર ગુજરાત તથા સૌરાષ્ટ્ર-કચ્છમાં કરા પડવાની પણ ઘટનાઓ બની હતી. હવે રાજ્યમાં એપ્રિલ મહિનામાં પણ વાતાવરણમાં મોટા પલટાની આગાહી હવામાન નિષ્ણાંત અંબાલાલ પટેલ દ્વારા વ્યક્ત કરવામાં આવી છે. અંબાલાલે એપ્રિલમાં વરસાદની સાથે કરા અને વીજળીના કડાકા-ભડાકા સાથે વરસાદ થવાની સંભાવના વ્યક્ત કરી છે.

પશ્ચિમના વિક્ષોભના કારણે તારીખ 31મી માર્ચ સુધી વરસાદની સંભાવના છે. આ પછી તારીખ 3થી 8 એપ્રિલ દરમિયાન હવામાનમાં પલટો આવવાની શક્યતા છે. આ પલટો લાંબા સમય સુધી ચાલવાની શક્યતાઓ અંબાલાલે વ્યક્ત કરી છે. તેમણે આ પલટા 14 તારીખ સુધી થતા રહેવાની શક્યતાઓ વ્યક્ત કરી છે.

તેમણે 3 એપ્રિલથી ઉનાળાની સાથે રાજ્યના કેટલાક ભાગોમાં વરસાદ પડવાની આગાહી કરીને અંબાલાલ પટેલે જણાવ્યું છે કે, તારીખ 3-8 અને 10 દરમિયાન ગુજરાતમાં વાદળો ફરી આવવાની શક્યતા છે. 14 તારીખ સુધીમાં પુનઃ આંધી, વંટોળ અને ગરમી સાથે કેટલાક ભાગોમાં વરસાદ થવાની શક્યતાઓ રહેશે. કરા પડવાની પણ શક્યતા છે.

અંબાલાલ પટેલે અખાત્રીજ વખતે પણ હવામાનમાં પલટો આવવાની શક્યતા વ્યક્ત કરીને જણાવ્યું છે કે, આ પલટાઓ છે તે ચાલુ જ રહેશે. મે મહિનામાં 8મીએ આંધી-વંટોળ આવશે, જેનાથી બાગાયતી પાકને નુકસાન થઈ શકે છે. આમ છતાં આ વખતે ગરમી વધારે પડવાની સંભાવના અંબાલાલ પટેલ વ્યક્ત કરી રહ્યા છે.

ઉનાળો આકરો રહેવાની અંબાલાલ પટેલે આગાહી કરી છે અને તેની સાથે તેમણે 17 જૂનની આસપાસ વરસાદ થવાની સંભાવના તેમણે વ્યક્ત કરી છે. વરસાદના કારણે બાગાયતી પાક પર અસર થવાની સંભાવનાઓ પણ તેઓ વ્યક્ત કરી રહ્યા છે.

અંબાલાલ પટેલે કેરીના પાક પર પણ હવામાનની અસર થવાની સંભાવના વ્યક્ત કરી છે. તેમણે આંધી-વંટોળના કારણે કેરીના પાકને વધુ નુકસાન થવાની સંભાવના તેમના દ્વારા વ્યક્ત કરવામાં આવી રહી છે. કેરીના પાક પર આ વખતે માઠી અસર થવાની શક્યતાઓ રહેલી છે.

વિષમ હવામાનના લીધે લોકોએ સ્વાસ્થ્યની કાળજી રાખવી પડશે તેમ પણ અંબાલાલ પટેલ જણાવી રહ્યા છે. શ્વાસની તકલીફોમાં વધારો થવાની શક્યતાઓ છે. હાલ મિશ્ર વાતાવરણ હોવાથી સ્વાસ્થ્ય પર તેની વિપરિત અસર પડી શકે છે.