અંબાલાલ પટેલની મોટી આગાહીઃ ગરમીની સાથે માવઠાનું જોર વધશે, એપ્રિલ-મેમાં શું થશે?

ગાંધીનગરઃ અંબાલાલ પટેલે હવામાનમાં મોટા પલટાની આગાહી કરી છે. આ સાથે તેમણે ગરમીનું પ્રમાણ વધવાની પણ સંભાવના વ્યક્ત કરી છે. ગરમીનું જોર વધવાની સાથે સ્વાસ્થ્યની કાળજી રાખવી જરુરી છે. આ દરમિયાન ન્યૂમોનિયા સહિતના રોગોથી બચવા માટે ધ્યાન રાખવાની અને સ્વાસ્થ્યની કાળજી રાખવાની વાત પણ તેમણે કરી છે. માર્ચ મહિના બાદ એપ્રિલ અને મેમાં પણ વાતાવરણમાં પલટાની આગાહી અંબાલાલ પટેલ કરી રહ્યા છે.

રાજ્યમાં હાલ હવામાનનો પલટો આવ્યો છે તે અંગે વાત કરીને અંબાલાલે આગાહી કરી છે કે, 19 માર્ચ સુધી માવઠું રહેવાની શક્યતા છે. હવામાનમાં આગામી એપ્રિલ મહિનાની શરુઆતમાં પણ માવઠું થવાની શક્યતા અંબાલાલ દ્વારા વ્યક્ત કરવામાં આવી છે. તેમણે ખેડૂતોને પણ સાવધાની રાખવાની સલાહ આપી છે.

અંબાલાલ પટેલે 8મી મે પછી આંધી-વંટોળનું પ્રમાણ વધવાની આગાહી કરી છે. આ દરમિયાન વરસાદ પણ થશે તેવી સંભાવના તેઓ વ્યક્ત કરી રહ્યા છે. આ દરમિયાન ખેડૂતોએ બાગાયતી પાકની કાળજી રાખવી પડશે. આ વર્ષ વિસમ હવામાનવાળું રહેવાની વકી તેઓ કરી રહ્યા છે.

આ વર્ષમાં હવામાનમાં સતત આવી રહેલા પલટાની અસર ખેતીની સાથે લોકોના સ્વાસ્થ્ય પર પણ પડી રહી છે. આ અંગે અંબાલાલ પટેલ કહી રહ્યા છે કે આ વર્ષ વિષમ હવામાનવાળું રહેવાની શક્યાઓ છે માટે લોકોએ પોતાના સ્વાસ્થ્યની ખાસ કાળજી રાખવી પડશે.

વધુમાં ગરમી વધવાની આગાહી કરતા અંબાલાલ પટેલ જણાવી રહ્યા છે કે, તારીખ 18મી માર્ચથી 20મી એપ્રિલ દરમિયાન તંદુરસ્તીની કાળજી રાખવી પડશે. વસંત ઋતુમાં કફ ઓગળવાથી કફ જન્ય રોગો થવાની શક્યતાઓ રહેલી હોય છે. ઋતુના સંધીકાળમાં ન્યૂમોનિયા જેવા રોગ થતા હોય છે તેવું અંબાલાલ કહી રહ્યા છે.

રાજ્યના હવામાન વિભાગ દ્વારા આગાહી કરવામાં આવી છે જેમાં આગામી 5 દિવસ સુધી અલગ-અલગ ભાગોમાં માવઠું રહેવાની સંભાવના વ્યક્ત કરવામાં આવી છે. જેમાં આજના દિવસે દક્ષિણ ગુજરાતના ભરૂચ, સુરત, નર્મદા, તાપી, ડાંગ, નવસારી, વલસાડ, દમણ, દાદારા નગર હવેલીમાં હળવો કે પવન સાથે કમોસમી વરસાદ થવાની શક્યતા છે.

તારીખ 14થી 17 દરમિયાન ઉત્તર ગુજરાતના બનાસકાંઠા, સાબરકાંઠા, પાટણ, સહિત અમદાવાદ, ગાંધીનગર, મહેસાણા, ભરૂચ, સુરત, તાપી, નર્મદા, વલસાડ, નવસારી અને સૌરાષ્ટ્ર-કચ્છના અમરેલી, ભાવનગર, રાજકોટ, સુરેન્દ્રનગર, બોટાદ અને કચ્છમાં વરસાદ થવાની આગાહી કરવામાં આવી છે.