શું તમે જોયા છે પ્રાચીન સમયના માટીના વાસણો? આ કારીગરી જોઈને થઈ જશે અભિભૂત

ભરૂચ : આદિ અનાદિ કાળથી માનવી માટીના વાસણનો ઉપયોગ કરતો આવ્યો છે. માટીના વાસણમાં જમવાનું શુદ્ધ અને ચોખ્ખું રહેવા સાથે પૌષ્ટિક રહેતું હોવાથી શરીર માટે ગુણકારી માનવામાં આવતું હતું. હાલ બદલાતી જીવનશૈલીના પગલે લોકોએ સ્ટીલ અને અન્ય ધાતુના વાસણોનો ઉપયોગ કરું કરી દીધો છે.

ભરૂચ ખાતે ગુર્જરી હસ્તકલા હાટમાં ઈશ્વરભાઈનો સ્ટોલ માટીના વાસણોથી લોકોનું ધ્યાન દોરી રહ્યા છે. આ કલાકાર માટીના વાસણો થકી પ્રકૃતિ બચાવવા સાથે શરીર માટે માટીના વાસણો કેટલા જરૂરી છે એ સમજાવી રહ્યા છે.

ભરૂચ શહેરમાં આવેલ હોસ્ટેલ ગ્રાઉન્ડ ખાતે મોરબી જિલ્લાના ઈશ્વરભાઈ ભરતભાઈ ધરોડીયા છેલ્લા 15 થી 17 વર્ષથી માટીની વસ્તુઓ બનાવી વેચાણ કરે છે. વર્ષ 2006માં ઈશ્વરભાઈના પિતાનું નિધન થયું હતું.

તે બાદ તેઓએ અભ્યાસ સાથે સાથે માટીથી વાસણો બનાવવાની શરૂઆત કરી હતી. અભ્યાસ છોડીને નોકરી સાથે સાથે માટીની વસ્તુઓ બનાવતા હતા. જોકે તેઓએ સંપૂર્ણપણે માટીથી બનાવવાની વસ્તુઓના વ્યવસાયમાં જોડાઈ ગયા હતા.

ઈશ્વરભાઈના મમ્મી માટીથી બનાવેલી વસ્તુઓનું વેચાણ કરતા હતા. જોકે તેઓ વ્યવસાય સંભાળી સખી મંડળની મહિલાઓને રોજગારી પણ પૂરી પાડી રહ્યા છે. ઇશ્વરભાઇ મહિલાઓને ઘરે જ માટીથી બનાવવાની વસ્તુઓનું કામ આપે છે અને તેઓને આવક પૂરી પાડે છે. ઈશ્વરભાઈ આશરે સખી મંડળની 15 મહિલાઓને રોજગારી આપે છે.

ઈશ્વરભાઈના ત્યા માટીની 12 થી 15 પ્રકારની વસ્તુઓ બને છે. માટીની વસ્તુઓમાં માટલા, પાણીના બોટલ, હાંડી, રોટલી-રોટલો કરવા માટેની તાવડી, ચાના કપ, ગ્લાસ બનાવે છે. કિંમતની વાત કરીએ તો રૂપિયા 20થી શરૂ થઈને 400 રૂપિયા સુધીની માટીની વસ્તુઓનું વેચાણ થાય છે. ઈશ્વરભાઈ અમદાવાદ, વડોદરા, સુરત, ભરૂચ સહિતના શહેરોમાં માટીની એક્ઝિબિશનમાં જાય છે.

ઈશ્વરભાઈ માટીથી બનાવેલી વસ્તુઓનું વેચાણ કરી મહિને 30 થી 40 હજારની આવક મેળવે છે. ઇન્ડેક્ષ્ટ-સી દ્વારા હોસ્ટેલ ગ્રાઉન્ડ, પાંચ બત્તી, ભરૂચ ખાતે ગુર્જરી હસ્તકલા હાટનું આયોજન કરવામાં આવ્યું છે. તેમાં ઈશ્વરભાઇની માટીથી બનાવેલી વસ્તુઓ મૂકવામાં આવી છે અને એને લેવા માટે શહેરના લોકો ભીડ જમાવે છે.