Diu Fire: દીવના આ પ્રખ્યાત બીચ પર અડધી રાત્રે ભીષણ આગ લાગી, લોકો હોટલમાંથી બહાર જોવા દોડી આવ્યા

દક્ષિણ સૌરાષ્ટ્રમાં ઉના પાસે આવેલા કેન્દ્ર શાસિત પ્રદેશ દીવમાં આગ લાગવાની ઘટના બની છે. બીચ પર દરિયાની મજા માણવા માટે આવતા પ્રવાસીઓ માટે બનાવવામાં આવેલા ચેન્જિંગ રૂમમાં વિકરાળ આગ લાગવાની ઘટના બની હતી. બનાવ અંગે ફાયર બ્રિગેડને જાણ થતા આગ પર કાબૂ મેળવી લીધો છે. જોકે, આ આગ લાગવા પાછળનું કારણ શું હતું તે હજુ સુધી જાણવા મળ્યું નથી. આગ એટલી વિકરાળ હતી કે તેની સામેની બાજુએ આવેલી હોટલમાં રોકાયેલા લોકો પણ જોવા માટે બહાર દોડી આવ્યા હતા.

દીવના નાગવા બીચ પર નહાવા માટે બનાવવામાં આવેલા બાથરૂમ અને ચેન્જિંગ રૂમમાં રાત્રે પોણા બે વાગ્યે આગની ઘટના બની હોવાની વિગતો મળી રહી છે. બાથરૂમ પર વાસથી જે છત બનાવવામાં આવી હતી તે આગમાં બળીને ખાખ થઈ ગયો છે.

ફાયર બ્રિગેડને બનાવ અંગે જાણ કરવામાં આવતા કાફલો ઘટના સ્થળ પર પહોંચ્યો હતો હતો પરંતુ છત સહિતનો લાકડાનો ભાગ હોવાથી તે બળીને ખાક થઈ ગયો હતો. જે સ્થળ પર આગ લાગી હતી તેની આસપાસ અન્ય રેકડીઓ પણ હતી જેથી કરીને તે આગની ચપેટમાં આવે તે પહેલા ફાયર બ્રિગેડ દ્વારા મહત્વના પગલા ભરીને આગ પર કાબૂ મેળવવામાં આવ્યો હતો.

આ દુર્ઘટનામાં કોઈ જાનહાની થયાની વિગતો સામે આવી નથી અને આગ લાગવા પાછળનું કયું કારણ જવાબદાર છે તે પણ જાણવા મળ્યું નથી. હવે આસપાસના વિસ્તારમાં કોઈ CCTV કેમેરા લાગેલા હશે તો તેના આધારે તપાસ કરવામાં આવશે.

આગ એટલી વિકરાળ હતી કે આસપાસમાં રહેલા ઝાડને પણ આગે પોતાની ચપેટમાં લઈ લીધા હતા. ફાયર બ્રિગેડના કાફલાએ તાત્કાલિક આગને ફેલાતી અટકાવવા માટે જરૂરી પગલા ભર્યા હતા. નોંધનીય છે કે અહીં તાજેતરમાં જ બ્યૂટી ફિકેશનનું કામ પણ કરવામાં આવ્યું છે.