Gandhinagar: આદિવાસી સંસ્કૃતિને રજૂ કરતા ભીલ અને ગોંડ કલા ચિત્રો પ્રદર્શિત કરાયા; ચિત્રોની આ છે ખાસિયત

Abhishek Barad, Gandhinagar: ઈન્દિરા ગાંધી નેશનલ સેન્ટર ફોર ધ આર્ટસ (IGNCA) પ્રાદેશિક કેન્દ્ર, વડોદરા અને મધ્યપ્રદેશ ટ્રાઇબલ મ્યુઝિયમ, ભોપાલના સહયોગથી પ્રથમ વખત ઇન્ડિયન ઇન્સ્ટિટ્યૂટ ઑફ ટેક્નોલોજી ગાંધીનગર (IITGN) આર્ટ સ્ટુડિયો હોસ્ટ કરી રહ્યું છે.

“ભૌમ્ય - થ્રેશોલ્ડ: એન ઓડ ટુ વુમનહૂડ”, 30 સપ્ટેમ્બરથી 3 ઓક્ટોબર, 2022 સુધીનું એક અનોખું પ્રવાસી આદિવાસી કલા પ્રદર્શન કરવામાં આવ્યું છે. પ્રદર્શનમાં પદ્મશ્રી ભીલ કલાકાર ભૂરીબાઈ અને પદ્મશ્રી ગોંડ કલાકાર દુર્ગા બાઈ સહિત મધ્યપ્રદેશના વિવિધ મહિલા આદિવાસી કલાકારોના 50 અસલ ભીલ અને ગોંડ કલા ચિત્રો પ્રદર્શિત કરવામાં આવ્યા છે.

કેનવાસ પર એક્રેલિક પેઇન્ટથી બનેલી આ આર્ટવર્ક પરંપરાગત આદિવાસી જીવનશૈલી અને સંસ્કૃતિને પ્રતિબિંબિત કરે છે અને તેમની આસપાસની વનસ્પતિ, પ્રાણીસૃષ્ટિ અને પર્યાવરણને પણ દર્શાવે છે.

IITGN ખાતેનું આ પ્રદર્શન ટ્રાવેલ એક્ઝિબિશન રૂટનો એક ભાગ છે જે વડોદરાના લક્ષ્મી વિલાસ પેલેસ કમ્પાઉન્ડ ખાતે સુપ્રસિદ્ધ રાજા રવિ વર્માના સ્ટુડિયોથી શરૂ થયું હતું અને બાદમાં અમદાવાદમાં પ્રદર્શિત કરવામાં આવશે. પહેલા વલ્લભ વિદ્યાનગરમાં CVM કૉલેજ ઑફ ફાઇન આર્ટસમાં અને ફાઇનલ શો મહારાજા સયાજીરાવ યુનિવર્સિટી ઓફ બરોડા ખાતે યોજાશે.

IIT ગાંધીનગર ખાતે પ્રદર્શન 03 ઓક્ટોબર, 2022 સુધી, સેન્ટ્રલ આર્કેડ, સવારે 9 થી 11 અને સાંજના 5 થી 8 વાગ્યા સુધી લોકોને જોવા માટે ખુલ્લું છે. મુલાકા તીઓ અને કલાપ્રેમીઓને તરબોળ અનુભવ આપવા માટે, IITGNનો આર્ટ સ્ટુડિયો કલા ગોષ્ઠી કલા વાર્તાલાપ, આ કલાકારો પરની ડોક્યુમેન્ટ્રીનું સ્ક્રીનીંગ અને આર્ટ પોસ્ટકાર્ડ બનાવવાના સત્રોનું પણ આયોજન કરવામાં આવ્યું છે. જો સંસ્થાઓ અથવા વિદ્યાર્થીઓ જૂથોમાં મુલાકાત લેવા માંગતા હોય, તો તેઓ એક દિવસ અગાઉ art@iitgn.ac.in પર વિનંતી મોકલી શકે છે.