લોકો મૃત્યુ માટે આવે છે આ જગ્યા પર, મરવાની રાહ જોવાના દરરોજ 75 રૂપિયા

વારાણસીમાં એક એવું ભવન છે, જ્યાં લોકો મૃત્યુની રાહ જોઈ છે. વર્ષ 1908માં બનેલ આ ભવનને મુક્તિ ભવન તરીકે ઓળખવામાં આવે છે. અહીં એક પુસ્તક છે, જે મુલાકાતીઓની ખાતાવહી રાખે છે. આ પુસ્તકમાં મોટા ભાગના નામ એવા જ છે, જેઓ મુક્તિ ભવનમાં આવ્યાના થોડા દિવસોમાં જ મોતને ભેટ્યા હતા.

દર વર્ષે દેશના ખૂણે-ખૂણેથી અને દુનિયાભરમાંથી હિન્દુ ધર્મમાં માનતા સેંકડો લોકો અહીં આવે છે અને તેમના અંતિમ દિવસો પસાર કરે છે. અંગ્રેજોના સમયમાં બનેલી આ ધર્મશાળામાં 12 રૂમ છે. તેની સાથે એક નાનું મંદિર અને પૂજારી પણ છે. જે લોકો મોતની અણીએ હોય છે, તેમને જ આ ભવનમાં રહેવા માટે સ્થાન મળે છે. મૃત્યુની રાહ જોતી કોઈપણ વ્યક્તિ અહીં 2 અઠવાડિયા સુધી ભવનમાં રહી શકે છે.

રોજના 75 રૂપિયા ઉપરાંત વધુ ક્ષમતા ધરાવતા લોકો માટે ગાયક મંડળી પણ રાખવામાં આવી છે. જણાવી દઈએ કે, તે મંડળીમાં સ્થાનિક ગાયકો હોય છે, જેઓ ભગવાન અને મુક્તિના ગીતો ગાય છે. જેના કારણે બીમારોને પણ દર્દમાં રાહત મળે છે.

દૈનિક રૂમ ચાર્જ 75 રૂપિયા છે. તેમાં એક પારણું, ચાદર અને સૂવા માટે ઓશીકું હોય છે. તેની સાથે પીવા માટે ઋતુ પ્રમાણે વાસણ કે કલશ રાખવામાં આવે છે. ગેસ્ટ હાઉસના મુલાકાતીઓને ઓછામાં ઓછા સામાન સાથે જ પ્રવેશવાની મંજૂરી છે. (તસવીર- ફર્સ્ટપોસ્ટ)

અહીં એવા પૂજારીઓ છે જે દરરોજ સવાર-સાંજની આરતી પછી અહીં રહેતા લોકો પર ગંગાજળનો છંટકાવ કરે છે, જેથી કરીને તેમને શાંતિથી મોક્ષ મળી શકે.

જો મુલાકાતી નિર્ધારિત સમય એટલે કે, 2 અઠવાડિયામાં મૃત્યુ પામે નહીં, તો બીમાર વ્યક્તિએ તેનો રૂમ અને મુક્તિ ભવનની જગ્યા છોડી દેવી પડે છે. આ પછી, લોકો સામાન્ય રીતે બહારની ધર્મશાળા અથવા હોટલમાં રહે છે, જેથી તેઓ કાશીમાં જ મૃત્યુ પામે છે. થોડા સમય પછી મુક્તિ ભવનમાં ફરીથી જગ્યા શોધી શકાય છે, પરંતુ જે વ્યક્તિ એકવાર રહી ચૂકી છે તેને પસંદગી મળતી નથી.

એવું માનવામાં આવે છે કે, કાશીમાં મૃત્યુ પામ્યા પછી વ્યક્તિને સીધો મોક્ષ મળે છે. તેનું મહત્વ એક રીતે મુસ્લિમોના હજ જેવું જ છે. જૂના જમાનામાં જ્યારે લોકો કહેતા હતા કે, તેઓ કાશી જઈ રહ્યા છે ત્યારે તેનો અર્થ એવો પણ થતો હતો કે, પાછા આવવાની શક્યતા ઓછી છે. આ અગાઉ મુક્તિ ભવનની તર્જ પર ઘણી ઇમારતો હતી, પરંતુ હવે વારાણસીમાં આવી મોટાભાગની ઇમારતો કોમર્શિયલ બની ગઈ છે અને હોટલની જેમ પૈસા વસૂલે છે. મુક્તિ ભવનની સામે આવેલી આ જગ્યાઓ પર પૈસા આપીને ગમે તેટલું રહી શકે છે.