જ્યારે આ ગાયિકાએ 14 વર્ષ મોટા દિગ્દર્શક સાથે લગ્ન કરી લીધા હતા

બોલિવૂડની જાણીતી ગાયિકામાંની એક સુનિધિ ચૌહાણ (Sunidhi Chauhan) આજે પોતાનો 36મો જન્મ દિવસ મનાવી રહી છે. ગાયકીની દુનિયામાં સુનિધિ ચૌહાણનું નામ અજાણ્યું નથી. સંગીતની દુનિયામાં હિન્દીની સાથે સાથે મરાઠી, કન્નડ, તેલુગૂ, તમિલ, પંજાબી, બંગાળી, આસામી, નેપાળી અને ઊર્દૂમાં ગીતો ગાઈ ચુકેલી સુનિધિએ ગાયકીમાં અનેક ઇનામો પણ મેળવ્યા છે.

સારી ગાયિકા હોવાની સાથે સાથે સુનિધિ એક ફેશન આઇકન પણ છે. વર્ષ 2013માં સુનિધિએ એશિયાની ટોપ 50 સેક્સિએસ્ટ મહિલાઓમાં સ્થાન મેળવીને બધાને આશ્ચર્યમાં મૂકી દીધા હતા.

દિલ્હીમાં જન્મેલી સુનિધિના પિતા થિયેટર આર્ટિસ્ટ રહી ચુક્યા છે. આ જ કારણ છે કે સુનિધિને એક્ટિંગનો ખૂબ શોખ છે. ખૂબ જ નાની ઉંમરમાં કારકિર્દી શરૂ કરનારી સુનિધિએ રિયાલિટી શોમાં ભાગ લીધો હતો. સુનિધિનું નસીબ એ વખતે ખુલી ગયું જ્યારે એક ટીવી એન્કરે તેનું ગીત સાંભળીને તેને મુંબઈ આવવાનું આમંત્રણ આપ્યું હતું.

સુનિધિએ ડીડી-1ના એક રિયાલિટી શો 'મેરી આવાઝ'માં ભાગ લીધો અને લતા મંગેશ્નકર ટ્રોફી પણ જીતી. એટલું જ નહીં સુનિધિનો અવાજ સાંભળીને ખૂદ લતા મંગેશ્નરે પણ કહ્યું હતું કે તેણી મારા જેવું ગાય છે.

એકબાજુ સુનિધિની કારકિર્દી આકાશને આંબી રહી હતી ત્યારે જ તેની વ્યક્તિગત જિંદગી વિવાદોમાં ઘેરાતી જોવા મળી હતી. સુનિધિએ પોતાનાથી 14 વર્ષ મોટા, ડિરેક્ટર બોબી ખાન સાથે લગ્ન કરી લીધાના સમાચાર જાણીને પરિવારે તેની સાથે સંબંધો કાપી નાખ્યા હતા. તેમનો પરિવાર આ લગ્નથી બિલકુલ ખુશ ન હતો.

ફક્ત એક વર્ષમાં બોબી અને સુનિધિ છૂટા પડી ગયા હતા. જે બાદમાં સુનિધિ અનેક મુશ્કેલીઓમાં ઘેરાઈ હતી. તેની કારકિર્દીને બ્રેક લાગી ગઈ હતી. પોતાની જાતને સંભાળતા તેણીએ ફરીથી ગાવાનું શરૂ કર્યું અને ગાડી પાટા પર ચડી હતી.

આશરે નવ વર્ષ પછી સુનિધિએ મ્યુઝિક કમ્પોઝર હિતેશ સોનિક સાથે લગ્ન કર્યા હતા. ગાયકીની પોતાની સફરમાં સુનિધિએ અત્યાર સુધી અલગ અલગ ભાષાઓમાં 300થી વધારે ગીતો ગાયા છે.