'તારક મહેતા કા ઉલ્ટા ચશ્મા' : દિલિપ જોશીથી લઈને મુનમુન દત્તા, એક એપિસોડના કોને મળે છે કેટલા રૂપિયા?

તારક મહેતા કા ઉલ્ટા ચશ્મા આજે ઘરે ઘરે જાણીતું બનેલું નામ છે. આ શો અને તેની સ્ટારકાસ્ટથી લગભગ કોઈ ભારતીય પારિવાર અજાણ નથી. આ શો દેશના સૌથી લોકપ્રિય શોની યાદીમાં શામેલ છે. તમને જાણીને નવાઈ લાગશે કે સુપરહિટ ટેલિવિઝન સિટકોમ તેના 13મા વર્ષમાં છે. તારક મહેતાની સફળતા પાછળ આ શો દ્વારા વ્યક્ત થતી ભારતીય સમાજની જીવનશૈલી છે. શોમાં રહેલા પાત્રોનું જીવન સમાજના પ્રતિબિંબ સમાન છે. જેથી લોકોને તારક મહેતા કા ઉલટા ચશ્મા શો ખૂબ જ ગમ્યો છે.

તારક મહેતાની ગોકુલધામ સોસાયટી જેમ વારંવાર ચર્ચામાં રહે છે, તે જ રીતે શોના કલાકારો પણ અંગત જીવનને લઈ અવારનવાર ચર્ચા રહેતા હોય છે. તેમના અંગત જીવન અંગે જાણવાનો રસ પણ લોકોને હોય છે. ખાસ કરીને પોતાના પ્રિય કલાકારો આ શો થકી કેટલું કમાય છે? જાણવાની ઉત્સુકતા તેમનામાં ખૂબ જ હોય છે. જેથી અહી દિલીપ જોશી, શૈલેષ લોઢા, મંદાર ચંદવાડકર, મુનમુન દત્તા ઉર્ફે બબીતા, અમિત ભટ્ટ સહિતના કલાકારોને એપિસોડ દીઠ કેટલા રૂપિયા ચૂકવવામાં આવે છે, તે અંગે અહીં જાણકારી આપવામાં આવી છે.

દિલિપ જોશી ઉર્ફે જેઠાલાલ - જેઠાલાલને તારક મહેતાનું મુખ્ય પાત્ર ગણવામાં આવે છે. india.comના અહેવાલ મુજબ દિલીપ જોષી ઉર્ફે જેઠાલાલને એપિસોડ દીઠ લગભગ 1.5 લાખ રૂપિયા ફી ચૂકવવામાં આવે છે. તે શોમાં સૌથી વધુ કમાણી કરનાર કલાકાર છે.

શૈલેષ લોઢા ઉર્ફે તારક મહેતા - શોમાં તારક મહેતાનો રોલ કરતાં શૈલેષ લોઢાને એપિસોડ દીઠ લગભગ 1 લાખ રૂપિયા આપવામાં આવતા હોવાનું અહેવાલો પરથી જણાય છે.

અમિત ભટ્ટ ઉર્ફે ચંપક લાલ - રિપોર્ટ્સ અનુસાર, શોમાં જેઠાલાલના પિતા ચંપક લાલની ભૂમિકા ભજવનાર અમિત ભટ્ટને એપિસોડ દીઠ 70,000-80,000 રૂપિયા ચૂકવાય છે.

મંદાર ચંદવાડકર ઉર્ફે આત્મારામ ભીડે - ગોકુલધામ સોસાયટીના સેક્રેટરી અને શિક્ષક ભીડેનું પાત્ર ભજવતા મંદાર ચંદવાડકરને એપિસોડ દીઠ 80,000 રૂપિયા ચૂકવવામાં આવે છે.

મુનમુમ દત્તા ઉર્ફે બબીતાજી - તારક મહેતામાં બબીતાજીનું પાત્ર ભજવતા મુનમુમ દત્તાને એપિસોડ દીઠ 35,000થી 50,000 રૂપિયા ચુકવવામાં આવતા હોવાનું જાણવા મળે છે. બબીતાજી પણ અત્યારે શોનું મહત્વનુ પાત્ર ગણવામાં આવે છે.