'મને કોઇ અફસોસ નથી,' રીના રોય સાથે છૂટાછેડા લીધાના 33 વર્ષ બાદ પૂર્વ ક્રિકેટર મોહસિન ખાને કર્યા ચોંકાવનારા ખુલાસા

નવી દિલ્હી. પૂર્વ પાકિસ્તાની ક્રિકેટર અને બોલિવૂડ એક્ટ્રેસ રીના રોયના (Reena Roy) એક્સ હસબન્ડ મોહસીન ખાન (Mohsin Khan) આ દિવસોમાં ચર્ચામાં છે. હકીકતમાં, તેના એક લેટેસ્ટ ઈન્ટરવ્યુમાં તેણે રીના રોય સાથે છૂટાછેડા અંગે અનેક ખુલાસા કર્યા હતા. તમને જણાવી દઈએ કે, રીના અને મોહસીનના લગ્ન વર્ષ 1983માં થયા હતા અને માત્ર 7 વર્ષ બાદ 1990માં બંને વચ્ચે છૂટાછેડા થઈ ગયા હતા.

મોહસીન ખાને 'ઝી સ્પોર્ટ્સ'ને આપેલા એક ઈન્ટરવ્યુમાં કહ્યું કે, તે પાકિસ્તાનમાં જ રહેવા માંગતો હતો કારણ કે આ તેની ઓળખ છે. રીના રોય સાથે છૂટાછેડા પર તેણે કહ્યું કે તેને કોઈ અફસોસ નથી.

તેણે કહ્યું કે, તેણે એક વ્યક્તિ સાથે લગ્ન કર્યા. તેણે તે જોયું ન હતું કે તે કોણ છે અથવા તે ક્યાંની છે, પરંતુ મોહસિને નિર્ણય લઇ લીધો હતો કે તે પાકિસ્તાની છે અને તે તેની ઓળખ છે, અને તેથી તે પાકિસ્તાનમાં જ રહેશે.

મોહસિને એ પણ જણાવ્યું કે જ્યારે તેણે રીના સાથે લગ્ન કર્યા, તે પહેલા તેણે તેની એક પણ ફિલ્મ જોઈ ન હતી. તેણે એ પણ જણાવ્યું કે તે ફિલ્મો જોતો નથી, પરંતુ જ્યારે પણ અમિતાભ બચ્ચનનો કોઈ સીન આવતો ત્યારે તેને ખાસ કરીને જોતો હતો.

મોહસીન વધુમાં કહે છે કે, કોઈ એ વાત પર વિશ્વાસ નહીં કરે કે તેણે તેના લગ્ન પહેલા રીનાની એક પણ ફિલ્મ જોઈ નથી. તેણે એમ પણ કહ્યું કે તે ક્યારેય ખૂબસૂરતીથી પ્રભાવિત થયો નથી અને તેને માત્ર સારા લોકો જ ગમે છે.

બીજી તરફ જો રીના રોયની વાત કરીએ તો મોહસીન સાથેના છૂટાછેડા પર રીનાએ એક વખત કહ્યું હતું કે, તે તેના પતિની લાઇફસ્ટાઇલ સાથે તાલમેલ બનાવી શકી ન હતી.

રીના રોયે એક વખત ટાઈમ્સ ઓફ ઈન્ડિયા સાથેની ખાસ વાતચીતમાં કહ્યું હતું કે, તે મોહસીન ખાનના જીવન સાથે તાલ મિલાવી શકી ન હોવાથી તેણે છૂટાછેડા લીધા હતા.

રીનાએ કહ્યું હતું કે તે સમયે તેનો પતિ મોહસીન ઈચ્છતો હતો કે તે તેની સાથે લંડનમાં રહે અને બ્રિટનની નાગરિકતા લે, પરંતુ રીના આ માટે તૈયાર ન હતી અને ત્યારબાદ બંને વચ્ચે છૂટાછેડા થઈ ગયા હતા.