NCB એ દીપિકા પાદુકોણની મેનેજર કરિશ્મા પ્રકાશને ફરી મોકલ્યું સમન્સ, આજે થશે પૂછપરછ

એન્ટરટેઇનમેન્ટ ડેસ્ક: બોલિવૂડ એક્ટ્રેસ દીપિકા પાદુકોણની (Deepika Padukone) મેનેજર કરિશ્મા પ્રકાશ (Karishma Prakash) ફરી એક વખત ચર્ચામાં છે. ખબર છે કે NCBએ ફરી એક વખત કરિશ્મા પ્રકાશને સમન બજાવ્યું છે. અને આજે તેને પૂછપરછ માટે બોલાવવામાં આવી છે. એક રિપોર્ટ અનુસાર, દીપિકાની મેનેજર કરિશ્મા પ્રકાશનાં ઘરમાંથી ડ્રગ્સ મળી આવ્યું હતું. નારકોટિક્સ કંટ્રોલ બ્યૂરો એટલે કે NCBએ મંગળવારે તેનાં ઘરની તલાશી લીધી હતી. આજે તેનાં ઘરની તપાસમાં એકથી વધુ પ્રકારનાં ડ્રગ્સ મળ્યાં હતાં. જોકે તેની માત્રા ઘણી જ ઓછી હતી. NCBએ કરિશ્માને મંગળવારે જ સમન્સ બજાવ્યાં હતાં પણ તે આવી ન હતી. તેથી તેને બુધવારે બુધવારે ફરી બોલાવવામાં આવી છે.

આપને જણાવી દઇએ કે, આ સમન બીજી વખત મોકલવામાં આવ્યું છે. આ પહેલાં સ્પટેમ્બર મહિનામાં દીપિકા અને કરિશ્માની એક વોટ્સએપ ચેટ સામે આવી હતી જેમાં માલ શબ્દનો ઉલ્લેખ કરવામાં આવ્યો હતો. જે મામલે બંનેને સમન્સ બજાવવામાં આવ્યાં હતાં. અને આ મામલે NCBએ તેમની કડક પૂછપરછ પણ કરી હતી. તે સમયે દીપિકાએ ડ્રગ ચેટનો ઇન્કાર કર્યો હતો પણ આ અંગે કરિશ્માએ કબૂલ્યું હતું કે, તેમણે ચેટમાં 'માલ' મંગાવ્યો હતો જેનો અર્થ સિગરેટ થાય છે.

આપને જણાવી દઇએ કે, સુશાંત સિંહ રાજપૂત કેસનાં તાર ડ્રગ્સ એંગલથી જોડાયા બાદ આ કેસમાં ઘણાં મોટા મોટા સ્ટાર્સનાં નામ સામે આવ્યાં હતાં. NCBએ આ મામલે ઘણાં બોલિવૂડ સ્ટાર્સને સમન્સ બજાવી પૂછપરછ કરી હતી. જેમાં રકુલ પ્રીત સિંહ, સારા અલી ખાન, શ્રદ્ધા કપૂર અને દીપિકા પાદુકોણ શામેલ હતાં.

આ મામલે અત્યાર સુધીમાં ઘણાં લોકોની ધરપકડ પણ થઇ ગઇ છે. ગત દિવસોમાં NCBએ અર્જુન રામપાલની ગર્લફ્રેન્ડ ગેબ્રિએલા ડેમેટ્રિએડ્સનાં ભાઇ અગિસિલાઓસ ડેમેટ્રિએડ્સની ધરપકડ કરી હતી.