Bappi Lahiri: સ્ટાઇલ આઇકન બપ્પી લહેરી પાસે કેટલું સોનું હતું? શા માટે વધારે સોનું પહેરતા હતા?

મુંબઈ: ખૂબ જ જાણીતા સંગીતકાર અને ગાયક બપ્પી લહેરીનું આજે (16 ફેબ્રુઆરી) વહેલી સવારે મુંબઈની એક હૉસ્પિટલ ખાતે નિધન થયું છે. છેલ્લા થોડા સમયથી તેમની સારવાર ચાલી રહી હતી. શરૂઆતના અહેવાલમાં તેમના નિધનનું કારણ સામે આવ્યું નથી. બપ્પી લહેરી સંગીતકારની સાથે સાથે સ્ટાઇલ આઇકન પણ હતા. તેઓ જાહેર કાર્યક્રમ કે રેકોર્ડિંગ દરમિયાન શરીર પર ખૂબ સોનું પહેરતા હતા. સંગીતના ઉદ્યોગમાં તેઓ ડિસ્કો કિંગ તરીકે જાણીતા હતા. તેમના નિધનના સમાચારથી તેમના લાખોની સંખ્યામાં ચાહકો દુઃખી થયા છે. બપ્પી લહેરીનું સાચું નામ આલોકેશ લહેરી (Alokesh Lahiri) છે.

બપ્પી લહેરી (Bappi Lahiri)ને સંગીત ઉદ્યોગ (Music Industries)માં ડિસ્કો કિંગ કહેવામાં આવતા હતા. બપ્પી લહેરી તેમના સંગીતની સાથે-સાથે સોનું (Gold) પહેરવાની તેમની શૈલી (Style) માટે જાણીતા હતા. જોકે, અહીં એ જાણવું જરૂરી છે કે તેમને સોનાનો આટલો બધો શોખ શા માટે હતો?

આ વાત ખુદ બપ્પી લહેરીએ એક ઈન્ટરવ્યૂ દરમિયાન જણાવી હતી. તેમણે જણાવ્યું હતું કે, તેઓ કેટલાક પ્રખ્યાત વ્યક્તિત્વથી ખૂબ પ્રભાવિત છે. તેમને જોયા પછી, તેમણે પોતાની આગવી શૈલી બનાવવા માટે સોનું પહેરવાનં શરૂ કર્યું હતું.

તમને જાણીને નવાઈ લાગશે પરંતુ બપ્પી દાના પત્ની પાસે તેમના કરતા પણ વધારે સોનું છે. 2014માં ચૂંટણી એફિડેવિટ (Election Afidevite)માં આપેલી વિગતો આ વાતની સાક્ષી પૂરે છે. એફિડેવિટમાં બપ્પી દા અને તેમના પત્ની પાસે કેટલું સોનું છે તેની વિગતો હતી.

બપ્પી દા અમેરિકન પોપ સ્ટાર એલ્વિસ પ્રેસ્લીથી ખૂબ જ પ્રભાવિત હતા. એલ્વિસ તેના કોન્સર્ટ દરમિયાન સોનાની ચેન પહેરતો હતો. બપ્પી દાએ ઈન્ટરવ્યૂમાં જણાવ્યું હતું કે, જ્યારે હું એલ્વિસને જોતો હતો ત્યારે મને લાગતું હતું કે હું પણ પ્રસિદ્ધ અને સફળ થઈશ ત્યારે એલ્વિસની જેમ મારી ઈમેજ બનાવીશ. આ સિવાય તે પોતાનું સોનું પહેરવાને ખૂબ લકી પણ માનતા હતા.

ચૂંટણી એફિડેવિટ મુજબ બપ્પી દા પાસે 754 ગ્રામ સોનું અને 4.62 કિલો ચાંદી છે. જોકે, આ વાત આઠ વર્ષ પહેલાની છે. ચોક્કસ એવું કહી શકાય કે તેમની પાસે આ આઠ વર્ષમાં સોનામાં વધારો થયો હશે.

બપ્પી દાના પત્ની ચિત્રા પાસે 967 ગ્રામ સોનું અને 8.9 કિલોગ્રામ ચાંદી હતું. આ સિવાય તેમની પાસે 4 લાખ રૂપિયાથી વધુના હીરા પણ હતા. 2014માં આપેલા એફિડેવિટ મુજબ બપ્પી દા પાસે જે સોનું હતું તેની કિંમત 35 લાખ રૂપિયાથી વધુ હશે. જ્યારે ચાંદીની વાત કરીએ તો તે 2-2.5 લાખ રૂપિયાથી વધુ છે.

બપ્પી લહેરી ચાહકો વચ્ચે બપ્પી દા તરીકે જાણીતા હતા. તેમનો જન્મ પશ્ચિમ બંગાળમાં થયો હતો. ગત વર્ષે તેમને કોરોના થયો હતો. છેલ્લા થોડા દિવસોથી મુંબઈ ખાતે તેમની સારવાર ચાલી રહી હતી.

બપ્પી દા સોનું પહેરવાની ખૂબ જ શુભ માનતા હતા. આ કારણે જ તેઓ જ્યાં પણ જતા હતા શરીર પર સોનું પહેરી રાખતા હતા.