HBD Ayushmann Khurrana: તાહિરા સાથે લગ્ન સમયે આયુષ્માનનું બેંક બેલેન્સ હતું માત્ર 10 હજાર રૂપિયા

બોલિવૂડ એક્ટર આયુષ્માન ખુરાના (Ayshmann Khurrana Birthday)નો આજે જન્મ દિવસ છે. તે 37 વર્ષનો થઇ ગયો છે. તેનો જન્મ 14 સ્પટેમ્બર 1984નાં પંજાબનાં ચંદીગઢમાં થયો હતો. તેનું બાળપણમાં નામ નિશાંત ખુરાના હતું. પણ જ્યારે તે 3 વર્ષનો થયો ત્યારે તેનાં માતા પિતાએ તેનું નામ બદલીને આયુષ્માન ખુરાના કરી દીધુ હતું. આયુષ્માન આજે બોલિવૂડનો સુપર સ્ટાર છે. આજે આયુષ્માનનાં જન્મ દિવસે ચાલો જાણીએ તેની અને તાહિરા કશ્યપની લવ સ્ટોરી અંગે અને તેમનાં બે બાળકો અંગે

'વિક્કી ડોનર'થી લઇ 'બધાઇ હો' સુધી આયુષ્માને દર વખતે રિસ્કી રોલ્સ પસંદ કર્યાં અને પોતાની પસંદગી હમેશાં સાચી ઠરી. આજે આયુષ્માન તેનો 37મો જન્મ દિવસ (Ayushmann Khurrana 37th Birthday) ઉજવી રહ્યો છે. આયુષ્માન અનુસાર, તાહિરા તેનાં જીવનની પહેલી અને છેલ્લી યુવતી છે. એક ઇન્ટરવ્યૂં દરમિયાન આયુષ્માને કબુલ્યું હતું કે, જ્યારે તેનાં લગ્ન તાહિરા સાથે થયા ત્યારે તેનાં જીવનમાં આર્થિક કટોકટી હતી. તે સમયે તેનાં અકાઉન્ટમાં માત્ર 10 હજાર રૂપિયા હતાં.

પ્રોફેશનલ લાઇફમાં આયુષ્માન જેટલો સફળ છે તેની પર્સનલ લાઇફ પણ એટલી જ હિટ છે.જેનો ક્રેડિટ તેની પત્ની તાહિરાને કશ્યપને જાય છે. તાહિરા આયુષ્માનની બાળપણની મિત્ર છે. તાહિરા અને આયુષ્માનની લવ સ્ટોરી કોઇ ફિલ્મી કહાનીથી કમ નથી. તેમનાં જીવનમાં ઘણાં ઉતાર ચડાવ આવ્યાં છે.

ચંદીગઢમાં આયુષ્માન અને તાહિરા એક જ ટ્યૂશન ક્લાસમાં ભણતા હતાં તેઓ 12માં ધોરણમાં એક જ ટ્યૂશન ક્લાસમાં જતા હતાં અને અહીં જ તેમની લવ સ્ટોરી શરૂ થાય છે. આયુષ્માન અને તાહિરાનાં લગ્નને 13 વર્ષ થવા આવ્યાં. આ 13 વર્ષમાં તેમણે ઘણાં ઉતાર ચઢાવ જોયા પણ તેમનો પ્રેમ ઓછો નથી થયો.

ગત વર્ષે તાહિરાએ એક ઇન્ટરવ્યૂમાં જણાવ્યું હતું કે, આજથી 12 પહેલાં ડેટિંગ કરવું જરાં પણ સહેલું ન હતું. કે જ્યારે તમે ચંદિગઢ જેવી નાની સિટીમાં રહેતા હોવ અને તમે બંને જ ખુબજ શરમાણ અને અંતરમુખી વ્યક્તિત્વ ધરાવતા હોવ. અમે બંને 60 વિધ્યાર્થીઓની એક ટ્યુશન બેચમાં સાથે ભણતાં હતાં.

અમે બંને એકબીજાને જોતા રહેતાં પણ કોઇ જ પહલ નહોતું કરતું. બંનેમાંથી એકમાં પણ હિંમત ન હતી કે તે સામે ચાલીને આ વાતનો ઇઝહાર કરી શકે. તાહિરા તે સમયે બોયઝમાં હોટ ફેવરેટ હતી. જ્યારે તાહિરા અને તેની મિત્રને આયુષ્માન પસંદ હતો.

આયુષ્માને આ ઇન્ટરવ્યૂમાં કહ્યું હતું કે, તે સમયે અમારા ક્લાસમાં એટલાં ગુડલુકિંગ છોકરાઓ હતાં કે હું તેમની આગળ ક્યાંય નહોતો આવતો. તેથી મને જ્યારે ખબર પડી કે તાહિરા મને પસંદ કરે છે ત્યારે મને તો આ વાતનો વિશ્વાસ જ નહોતો થતો.

તાહિરાને બ્રેસ્ટ કેન્સર ડિટેક્ટ થયું હતું અને આ સમયે એક આદર્શ પતિની જેમ આયુષ્માન તેની સાથે હતો. તાહિરાએ એક પોસ્ટમાં તેની કેન્સર સર્જરી અને તેની તકલીફો વિશે વાત કરી હતી. આ સમયમાં કેવી રીતે આયુષ્માન તેની પડખે ઉભો હતો તે પણ તેણે જણાવ્યું હતું.

તાહિરા અને આયુષ્માનને બે બાળકો છે. એક દીકરો અને એક દીકરી. દીકરાનું નામ વિરાજવીર અને દીકરીનું નામ વરુષ્કા છે. આયુષ્માન એક 'ફેમિલી મેન' છે જેનું જીવન તેનાં પરિવારની આસ પાસ જ ફરે છે.