ટીવીની નવી વિદેશી વહુ, સિદ્ધુ મૂસેવાલાની બની હતી હિરોઇન

ટીવી સીરિયલ પ્રત્યે દર્શકોનું ખાસ જોડાણ જોવા મળતું હોય છે. લોકો પોતાના ફેવરિટ શોના સમય અનુસાર પોતાનું શેડ્યુલ સેટ કરતાં હોય છે. ખાસ કરીને મહિલાઓ ટીવી શોઝ વધુ પસંદ કરતી હોય છે. ટીવી શોઝના લિસ્ટમાં વધુ એક નામ 'આનંદી બા ઔર એમિલી' ઉમેરાયું છે.

આ સીરિયલના લીડ રોલમાં વિદેશી અભિનેત્રી જેઝી બેલેરિની છે. આ શોમાં જેઝી બેલેરિની ફિરંગી વહુના પાત્રમાં જોવા મળશે. જેઝી બેલેરિનીને ટ્રાવેલિંગનો બહુ શોખ છે. તે ઘણા દેશોમાં રહી ચૂકી છે, જેના લીધે તેને વિવિધ કલ્ચર્સ વિશે જાણવું ઘણું પસંદ છે. જેઝી ઇન્ડિયા આવી તેની પાછળનું સૌથી મોટું કારણ બોલિવૂડ અને એક્ટિંગ પ્રત્યેનો તેનો પ્રેમ છે. તે પહેલાંથી જ એક્ટિંગ ક્ષેત્રે કારકિર્દી બનાવવા માંગતી હતી.

રસપ્રદ વાત એ છે કે, જેઝી બેલેરિનીનો પ્રથમ સફળ પ્રોજેક્ટ પંજાબી સિંગર સિદ્ધુ મૂસેવાલા સાથે હતો. જેઝી બેલેરિનીએ વર્ષ 2019માં સિદ્ધુ મૂસેવાલા સાથે પંજાબી ફિલ્મ 'તેરી મેરી જોડી'માં કામ કર્યું હતું. આ ફિલ્મ બાદ તેને અભિનેત્રી તરીકે ઓળખ મળી હતી.

સિદ્ધૂ મૂસેવાલા સાથે કામ કરવાના અનુભવ વિશે તેણે કહ્યું હતું કે, સિદ્ધુ મૂસેવાલા સાથે એક પ્રોજેક્ટનો ભાગ હોવો બહુ જ સન્માનની વાત છે. આ બીજી વાર હતું કે હું ઇન્ડિયામાં હતી તો મને સેલિબ્રિટીઝની સમજણ નહોતી, પરંતુ જ્યારે મેં ઇન્ડિયામાં રહેવાનું શરૂ કર્યું તો મને અહેસાસ થયો કે સિદ્ધૂ મૂસેવાલા આ દેશમાં એક લેજેન્ડ હતા. મને એ વાતની ખુશી છે કે તેમની સાથે કામ કરવાનો મોકો મળ્યો.

જેઝી બેલેરિનીના નવા શો આનંદી બા ઔર એમિલીની વાત કરીએ તો, આમાં ગુજરાતના એક નાનાકડા ટાઉન અને ત્યાંની લાઇફસ્ટાઇલ પર આધારિત કહાણી બતાવવામાં આવશે. આ સાથે જ શોમાં જોવા મળશે કે ફિરંગી વહુને જોઇને લોકો કેવા આશ્ચર્યચકિત હોય છે અને કેવી રીતે રિએક્ટ કરે છે. શો 4 જુલાઇથી શરૂ થઇ ગયો છે.