અહીં ખંડિત શિવલિંગની પૂજા થાય છે, જાણો વડોદરામાં નીલકંઠેશ્વર મહાદેવનો ઇતિહાસ

Nidhi Dave, Vadodara: વડોદરા શહેરના દાંડિયા બજાર સ્થિત માણેકરાવ અખાડા પાસે નીલકંઠેશ્વર મહાદેવ મંદિર આવેલું છે. આ મંદિર ગાયકવાડ સમયનું છે. એક કથા પ્રમાણે, આ શિવલિંગ ઘણા વર્ષો પહેલા અહીં સ્વયંભૂ પ્રગટ થયું હતું. સામાન્ય રીતે તો અર્ધગોળાકાર સ્વરૂપમાં શિવલિંગ હોય છે, પરંતુ અહીં અડધું શિવલિંગ તમને જોવા મળશે.

નીલકંઠેશ્વર મહાદેવ મંદિરના પૂજારી વિજયગીરી ગોસ્વામીએ જણાવ્યું કે, ગાયકવાડી શાસન દરમિયાન આ મંદિરની સ્થાપના કરવામાં આવી હતી. વર્ષો પહેલા આ જગ્યા પર સ્વયંભૂ શિવલિંગ પ્રગટ થયું હતું. એ જગ્યા પર ખોદકામ થતા શિવલિંગ ખંડિત થયું છે.

જેથી તમે આજે અડધું શિવલિંગ અહીં જોઈ શકો છો. ખંડિત શિવલિંગ હોવા છતાં પણ લોકોની શ્રદ્ધામાં કે આસ્થામાં કોઈ તફાવત દેખાતો નથી.

શ્રદ્ધાભેર લોકો અહીં આવે છે અને શ્રદ્ધાભેર શિવલિંગની પૂજા કરે છે અને લોકોની મનોકામનાઓ પણ અહીં પૂર્ણ થાય છે.

તદુપરાંત બીજી ખાસ વાત એ છે કે આ મંદિરમાં ગણેશ મંદિર પણ આવેલું છે. આ ગણેશ મંદિરની જગ્યા પર પહેલા શિવલિંગને સ્થાપિત કરવાનું હતું.

પરંતુ અત્યારે જે જગ્યા પર શિવલિંગ સ્થાપિત છે ત્યાંથી એને કોઈ હલાવી શક્યા નહીં. તેથી ત્યાં જ મહાદેવ મંદિરની રચના કરવામાં આવી અને એની બાજુમાં જ ગણેશ મંદિર બનાવવામાં આવ્યું છે.