Guru Chandal Yog 2023: ગુરુ અને રાહુના સંયોગથી બનશે ગુરુ ચાંડાલ યોગ, 30 ઓક્ટોબર સુધીનો સમય આ રાશિઓ માટે ભારે

ધર્મ ડેસ્ક: વૈદિક જ્યોતિષમાં ગ્રહોની ચાલ, યુતિ, સંક્રમણ અને સ્થિતિને વિશેષ મહત્વ માનવામાં આવ્યું છે. દરેક ગ્રહ ચોક્કસ સમયગાળા દરમિયાન એક રાશિમાંથી બીજી રાશિમાં પ્રવેશ કરે છે. જ્યારે પણ બે ગ્રહો એક જ રાશિમાં ભેગા થાય છે, ત્યારે તેની અસર કેટલીક રાશિઓ માટે શુભ અને કેટલીક રાશિઓ માટે અશુભ સાબિત થતી હોય છે. એ જ રીતે બે ગ્રહોના સંયોગથી ગુરુ ચાંડાલ યોગ ટૂંક સમયમાં બનવાનો છે.

ગુરુ ચાંડાલ યોગ ક્યારે રચાય છે?: વૈદિક જ્યોતિષ શાસ્ત્ર અનુસાર, જ્યારે રાહુ અને ગુરુ એક સાથે જન્મકુંડળીમાં હોય છે, ત્યારે ગુરુ ચાંડાલ યોગ બને છે. ગુરુ હાલમાં મીન રાશિમાં છે. મીન રાશિનો સ્વામી દેવગુરુ ગુરુ જ છે. 22 એપ્રિલે ગુરુ ગ્રહ મીન રાશિ છોડીને મેષ રાશિમાં પ્રવેશ કરશે. જ્યાં રાહુ પહેલેથી જ બેઠો હશે.

આવી સ્થિતિમાં રાહુ અને ગુરુના સંયોગથી મેષ રાશિમાં ગુરુ ચાંડાલ યોગ બનશે. ગુરુ અને રાહુ આગામી 6 મહિના સુધી એક જ રાશિમાં બિરાજમાન રહેશે. ગુરુ ચાંડાલ યોગના કારણે કેટલીક રાશિના લોકોએ સાવધાન રહેવાની જરૂર છે. જાણો આ રાશિઓ વિશે-

1. મેષ રાશિ - 22 એપ્રિલ બાદ મેષ રાશિમાં ગુરૂ ચાંડાલ યોગ લગ્ન ભાવમાં બનશે. આ સ્થિતિમાં 22 એપ્રિલથી 30 ઓક્ટોબર સુધી એટલે કે, આવનારા છ મહિના તમારા માટે ભારે રહેવાના છે. આ સમય કપરો રહેશે. આ દરમિયાન તમારે અનેક પડકારોનો સામનો કરવો પડશે. ધનહાનિ પણ થઈ શકે છે. કોઈપણ સામે અપમાનની સ્થિતિ ઉભી થઈ શકે છે. સ્વાસ્થ્યમાં પણ નરમાઈ રહેશે.

2. મિથુન રાશિ - ગુરુ ચાંડાલ યોગ મિથુન રાશિના જાતકો માટે અશુભ સમાચાર આપી શકે છે. આ સમયગાળા દરમિયાન તમારે પૈસા સંબંધિત બાબતોમાં મુશ્કેલીઓનો સામનો કરવો પડી શકે છે. કાર્યસ્થળ પર અનેક સમસ્યાઓ આવી શકે છે. પૈસાની ખોટ વર્તાશે, નુકશાની થશે અને કામમાં મુશ્કેલીઓ પણ આવશે.

3. ધન - ધન રાશિના લોકોએ ગુરુ ચાંડાલ યોગ દરમિયાન સાવધાન રહેવાની જરૂર છે. વાહનનો ઉપયોગ કરતી વખતે સાવચેત રહો. વેપારમાં નુકસાન થઈ શકે છે. બિનજરૂરી ખર્ચ વધશે. વધુ પડતા ખર્ચથી મન પરેશાન પણ રહેશે. અજાણ્યો ભય તમને સતત સતાવતો રહેશે. કરિયરમાં ભારે મુશ્કેલીઓનો સામનો કરવાનો વારો આવશે.