બેરોજગારીથી પરેશાન કેલિફોર્નિયાના એક વ્યક્તિએ એવી રીત અપનાવી કે તેને 1-2 નહીં પરંતુ પૂરી 200 કંપનીઓએ નોકરીની ઓફર મોકલી છે. ડેવિડ કૈસારાજ નામના આ વ્યક્તિની નોકરી જતી રહી હતી. કોઈ પણ કંપની તેનો બાયોડેટા સિલેક્ટ કરવા માટે તૈયાર ન થઈ, ત્યારબાદ ડેવિડે એક એવી રીત અપનાવી કે, નોકરી મળવાની સાથે-સાથે તે સોશિયલ મીડિયામાં પણ વાયરલ થઈ ગયો.
ડેવિડ ટેક્સાસની યૂનિવર્સિટીથી મેનેજમેન્ટનો અભ્યાસ કરી ચુક્યો છે. તેણે વર્ષ 2014થી 2017 સુધી જનરલ મોટર્સમાં કામ કર્યું હતું. પરંતુ કોઈ કારણસર તેને નોકરીમાંથી તગેડી મુકવામાં આવ્યો, ત્યારબાદ તેને કોઈ પણ કંપની નોકરી આપવા તૈયાર ન હતી. તેણે કંટાળી આ રીત અપનાવી પડી.
ડેવિડે કંપનીઓને બાયોડેટા મોકલવાની જગ્યાએ રોડ પર જ લોકોને પોતાનો બાયોડેટા વહેંચવાનું શરૂ કરી દીધુ. લોકો તેને ભીખારી ન સમજી લે તેના માટે તેણે એક પોસ્ટર પણ પોતાની સાથે રાખ્યું હતું, બેઘર પણ સફળતાનો ભુખ્યો, બાયોડેટા લઈ લો.
ડેવિડે જણાવ્યું કે, તેની પાસે પૈસા ખતમ થઈ ગયા હતા. નોકરીની શોધ કરતા-કરતા તે થાકી ચુક્યો હતો, પરંતુ કોઈ પણ કંપની તેને નોકરી આપવા તૈયાર ન હતી. તે ઘરે પાછો ફરવા માંગતો ન હતો, તેથી તેણે રસ્તા પર જ લોકોને બાયોડેટા વહેંચવાનું શરૂ કરી દીધુ.
