ડાંગઃ ધો.8ની આદિવાસી વિદ્યાર્થિનીના પ્રોજેકટને રાષ્ટ્રીય કક્ષાનો એવોર્ડ મળ્યો

ડાંગ જિલ્લાની દગડીઆંબાની પ્રાથમિક શાળામાં અભ્યાસ કરતી આદિવાસી વિદ્યાર્થીની દ્વારા તૈયાર કરાયેલા ગટર ક્લીનર પ્રોજેકટ દિલ્લી આઈ.આઈ.ટીમાં પસંદગી પામતા રાષ્ટ્રીય કક્ષાનો ઇન્સ્પાયર માનાંક એવોર્ડ મળ્યો હતો. જેને પ્રોત્સાહિત કરવા નવસારીની વિરવાડી હનુમાનજી મંદિર ટ્રસ્ટ દ્વારા જાહેર સન્માન કાર્યક્રમ રાખવામાં આવ્યો હતો. આ કાર્યક્રમમાં નવસારી, ડાંગ અને વલસાડની વિવિધ સંસ્થાએ ભાગ લીધો હતો. (કેતન પટેલ, બારડોલી)

ગત ફેબ્રુઆરી માસમાં રાષ્ટ્રીય કક્ષાના ઇન્સ્પાયર માનાંક એવોર્ડ પ્રદર્શન દિલ્હી ખાતે આયોજન કરવામાં આવ્યું હતું. જેમાં ડાંગ જિલ્લાના વઘઇ તાલુકાની દગડીઆંબા પ્રા.શાળાની કૃતિ ગટર ક્લીનર પ્રોજેક્ટે પણ ભાગ લીધો હતો. આ પ્રદર્શન માટે ભારતમાંથી ત્રણ લાખ પ્રોજેક્ટોનું રજિસ્ટ્રેશન કરાયું હતું.

850 જેટલા મોડલોએ વિવિધ સ્તરે પસંદગી પામીને આઇઆઇટી દિલ્હી કેમ્પસમાં ભાગ લીધો હતો. જેમાંથી 60 મોડલની પસંદગી કરવામાં આવી હતી. જેમાં ડાંગ જિલ્લાના દગડીઆંબા પ્રાથમિક શાળા માં ધોરણ-8માં અભ્યાસ કરતી આશા પવારની કૃતિની પણ પસંદગી થઇ હતી. અને આ કૃતિએ રાષ્ટ્રીય કક્ષાનો 'ઇન્સ્પાયર માનાંક એવોર્ડ' પ્રાપ્ત કર્યો હતો.

આ પ્રોજેક્ટ ભૂગર્ભ ગટર વ્યવસ્થા ઉપર આધારિત છે. જે ભૂગર્ભ ગટરમાં તેમજ કોઈપણ ગટરમાં રહેલા ગંદા પાણી કચરા કે અન્ય સામગ્રીનું સરળતાથી નિકાલ કરે છે. કોઈપણ ગટર સાફ કરવા માટે કોઈ વ્યક્તિએ ગટરની અંદર જવાની જરૂર રહેતી નથી.

ગટર સાફ કરતા અનિચ્છનીય અકસ્માત તેમજ તેમાંથી થતી વિવિધ બીમારીઓથી પણ બચી શકાય છે. આ સાધન સરળ હોવાથી કોઈપણ વ્યક્તિ સરળતાથી ચલાવી શકે છે. અને તેના માટે જનરેટર કે મોટરની જરૂરિયાત રહેતી નથી. આ પ્રોજેક્ટ પર્યાવરણ માટે પણ ફાયદાકારક છે.

આશાની આ સિદ્ધિને લઈને તેની શાળા સાથે અને પરિવાર સહિત સમગ્ર ડાંગ જિલ્લામાં ખુશીનો માહોલ જોવા મળે છે. ડાંગ જેવા આદિવાસી જિલ્લામાં અભ્યાસ કરતી આશાના ઘર કે ગામમાં કોઈ ગટર યોજના નથી. જેણે ભૂગર્ભ ગટર ક્લીનરનો પ્રોજેકટ બનાવ્યો છે. જે રાષ્ટ્રિય કક્ષાએ પસન્દ થવો એ ખરેખર પ્રોત્સાહિત કરનાર કહી શકાય.