ડાંગઃ કાલીબેલ- ભાલખેત માર્ગ ઉપર ભેખડો ધશી પડી, લોકો મુશ્કેલીમાં

ડાંગ જિલ્લાના વઘઇ તાલુકાના કાલીબેલ - ભાલખેત થઈ મહાલ જતાં માર્ગ પર ભેખડો, વૃક્ષો, માર્ગ વચ્ચે ધસી પડતા પ્રવાસીઓ તેમજ અવર જવર કરતાં સ્થાનિક લોકો મુશ્કેલીમાં મુકાયા છે. ત્યારે વનવિભાગ કે સ્થાનિક તંત્ર દ્વારા કોઈ પણ કામગીરી કરવામાં નહીં આવતા સ્થાનિકોમાં પણ રોષની લાગણી જોવા મળી રહી છે. (કેતન પટેલ, બારડોલી)

દક્ષિણ ગુજરાતમાં સતત વરસાદ વરસતા ની સાથે ડાંગ જિલ્લામાં પણ તાજેતરમાં ખાબકેલા ધોધમાર વરસાદને પગલે ભારે વઘઇ તાલુકામાં નુકશાન થવા પામ્યું છે. જેમાં અંતરિયાળ વિસ્તારોમાં માર્ગ ધોવાણ અને ભેખડ ધસી પડવાના કારણે અમુક ગામડાઓ પણ સંપર્ક વિહોણા બન્યા હતા. ડાંગ જિલ્લામાં ભારે વરસાદને પગલે વઘઇ તાલુકાના કાલીબેલ - ભાલખેત થઈ મહાલ શોર્ટકટ માર્ગ પર ભેખડ ધસી પડતાની સાથે માર્ગ પર વૃક્ષોના ડાળા પડતાં રસ્તો બ્લોક થતાં વાહનચાલકો માટે મુસાફરી કરવી અત્યંત મુશ્કેલીજનક બની છે.

સ્થાનિક તંત્ર કે પછી વનવિભાગ દ્વારા કોઈ કામગીરી હાથ ન ધરવાના કારણે નિકરિયાત વર્ગ તેમજ વિદ્યાર્થીઓએ જંગલ વિસ્તારનો પગપાળા માર્ગનો ઉપયોગ કરવો પડે છે. તો બીજી તરફ વરસાદથી ભાલખેત થી મહાલ જતાં માર્ગ ઉપર પણ વૃક્ષો, ભેખડો, મોટા પથ્થરો ધરાશાયી થયા છે.

જ્યારે આ જોખમી વૃક્ષો દૂર કરવાની લોક માંગ તો ઉઠી છે પરંતુ હજુ સુધી આ માર્ગ પર વૃક્ષો, ભેખડો તથા મોટા પથ્થરો જેમના તેમ જ છે હજુ સુધી રસ્તો ખુલ્લો ન કરાતા વાહનચાલકોમાં રોષ ફેલાયો છે.

ડાંગ જિલ્લાના મહાલ કેમ્પ સાઇટ જવા માટે નો આ શોર્ટકટ માર્ગ હોવાથી રાજ્યભરમાંથી આવતા સહેલાણીઓ તેમજ આજુબાજુના વિસ્તારના લોકો માટે સુવિધા વધુ મહત્વની બની છે. ત્યારે છેક દસ દિવસ વિતી ગયા હોવા છતાં ભેખડ ધસી પડવાની ઘટના બાદ પણ વહીવટી તંત્રએ ખસેડવાની તસદી સુદ્ધાં ન લેતા આ વિસ્તારની એસટી સેવા પણ સંપૂર્ણ ઠપ થઈ જવા પામી છે. જ્યારે વિધાર્થીઓ તથા લોકોને મહાલ તરફ અવર જવર કરવા માટે જાનના જોખમે જંગલ માંથી રસ્તો કાઢી અવર જવર કરવી પડી રહી છે.

ત્યારે તંત્ર દ્વારા આ ભેખડો, પથ્થરો રસ્તાની વચ્ચે થી હટાવવામાં આવે એવી લોક માંગ ઉઠી છે જેથી વાહન વ્યવહાર ચાલું થઈ શકે અને આજુબાજ વિસ્તારના લોકો ને તેમજ મહાલ કેમ્પ સાઈટ ફરવા આવતા પ્રવાસીઓને મુશ્કેલી ઉભી ન થાય એ માટે વહેલી તકે ઝડપી કામગીરી હાથ ધરવામાં આવે એવી આજુબાજુ વિસ્તારના લોકો ની માંગ છે.