VIRAL: PPE કિટ પહેરીને વર-વધૂએ લીધા સાત ફેરા, તમે પણ જોઈ લો તસવીરો

સુધીર જૈન, રતલામ. આ વર્ષે લગ્નના મુહૂર્ત (Wedding Muhurat) ઓછા છે. ઉપરથી કોરોના (Coronavirus) અને લૉકડાઉન (Lockdown)એ લગ્નો પર બ્રેક લગાવી દીધી છે. આ દરમિયાન રતલામ (Ratlam)માં સોમવારે થયેલા લગ્નની ખૂબ ચર્ચા થઈ રહી છે. અહીં વર-વધૂએ પીપીઇ કિટ (PPE Kit) પહેરીને સાત ફેરા લીધા. તે પણ સરકારી અધિકારીઓની હાજરીમાં.

પ્રશાસનને જાણકારી મળી હતી કે શહેરના એક માંગલિક ભવનમાં લગ્ન થઈ રહ્યા છે. દુલ્હો કોરોના પોઝિટિવ છે. માહિતી મેળવીને અધિકારી નવીન ગર્ગ લગ્ન રોકાવવા માટે દુલ્હાના ઘરે પરશુરામ વિહાર પહોંચ્યા. દુલ્હાનો કોરોના રિપોર્ટ 19 એપ્રિલે પોઝિટિવ આવ્યો હતો. તેમ છતાંય તે સાત ફેરા લેવા જઈ રહ્યો હતો.

પ્રશાસને લગ્ન રોકવા માટે કહ્યું. પરંતુ પરિવારના સભ્યોએ ઘરમાં ઉંમરલાયક સભ્યો હોવાનો હવાલો આપીને લગ્ન ન ટાળવાની આજીજી કરી તો અધિકારી પણ થોડા નરમ પડ્યા. ઉચ્ચ અધિકારીઓના નિર્દેશ પર આ લગ્નની મંજૂરી આપવામાં આવી. શરત એ રાખવામાં આવી હતી કે દુલ્હા-દુલ્હન પીપીઇ કિટ પહેરીને લગ્ન કરશે.

તેની પર બંને પરિવાર સહમત થઈ ગયા અને લગ્ન સંપન્ન થયા. દુલ્હો વ્યવસાયે એન્જિનિયર છે અને કન્યા પક્ષ રતલામના જ મહેશ નગરમાં રહે છે. લગ્નમાં વર પક્ષ તરફથી ચાર અને વધૂ પક્ષ તરફથી પંડિતની સાથે મળી ચાર લોકો એટલે કે કુલ આઠ લોકો આ લગ્નમાં સામેલ થયા.

લૉકડાઉનમાં સાદગીથી થયેલા આ લગ્નથી બંને પરિવારો ઘણા ખુશ છે. પરિવારના સંબંધીઓએ વીડિયો કોલ ઉપર જ દુલ્હા-દુલ્હનને આશીર્વાદ આપ્યા. નવયુગલનું કહેવું છે કે તેમનો ઉદ્દેશ્ય માત્ર એ છે કે સરકારના આદેશનું પાલન થઈ જાય અને લગ્ન પણ ન અટકે.