Varsa Janu RAS: એન્જિનિયરિંગ પછી ફ્રાન્સની કંપનીની નોકરીની ઓફર ફગાવી, હવે 25 વર્ષની ઉંમરમાં બન્યા RAS અધિકારી

ચૂરુઃ IAS અને RAS બનવા આજના લાખો કરોડો યુવાનો સપનું જુએ છે. દેશની સૌથી કઠીન કહેવાતી આ પરીક્ષામાં સફળતા હાંસલ કરવા માટે યુવાનો મોટા-મોટા ઈન્સ્ટિટ્યુટ્સમાં કોચિંગ ક્લાસ જોઈન કરતા હોય છે. પરંતુ સફળતા મેળવવા માટે જરુરી નથી કે તમે હજારો, લાખો રૂપિયા ખર્ચીને જ તૈયારી કરી શકો છો. સેલ્ફ સ્ટડીના દમ પર પણ દેશના ઘણાં યુવાનોએ સફળતા હાંસલ કરી છે, જેમાંથી એક ઉદાહરણ વર્ષા જાનુનું પણ છે.

વર્ષા જાનુ એ યુવા અધિકારી છે જેઓ સ્પર્ધાત્મક પરીક્ષાની તૈયારી કરી રહેલા લાખો યુવાનો માટે આજે પ્રેરણા સ્ત્રોત બન્યા છે. જેમણે ફ્રાન્સની મલ્ટી નેશનલ કંપનીમાં લાખો રૂપિયાના પેકેજ લેવાનો ઈનકાર કરીને પોતાના દમ પર મહેનત કરીને સફળતા હાંસલ કરી છે.

25 વર્ષની ઉંમરમાં RASની પરીક્ષા પાસ કરનારા વર્ષા જાનુ જિલ્લા રોજગાર અધિકારી બન્યા છે, તેમણે ધોરણ-8 સુધીનું શિક્ષણ પોતાના ગામની સરકારી સ્કૂલમાં મેળવ્યું હતું. જે બાદ તેમણે આગળનો અભ્યાસ અગ્રેજી સ્કૂલમાં કર્યો હતો. આ પછી તેઓ કમ્પ્યુટર સાયન્સનો અભ્યાસ કરીને એન્જિનિયર બન્યા હતા.

આ દરમિયાન તેમને ફ્રાન્સની મલ્ટી નેશનલ કંપનીમાંથી લાખો રૂપિયાની જોબની ઓફર મળી હતી, પરંતુ વર્ષાએ તે ઓફર ફગાવી દીધી હતી, કારણ કે તેમનું રાજસ્થાન વહીવટી તંત્રમાં સેવા કરવાનું હતું.

વર્ષા જાનુ કહે છે કે આના માટે તેમણે પહેલા કોચિંગ જોઈન કર્યું હતું. પરંતુ મહિના બાદ જ કોચિંગ સંસ્થાની ભીડ જોઈને ત્યાંથી મન ભરાઈ ગયું હતું. આ પછી વર્ષાએ સેલ્ફ સ્ટડી શરુ કરી અને તેના દમ પર પહેલા જ પ્રયત્નમાં મહત્વની પરીક્ષા પાસ કરી લીધી હતી.

વર્ષા જાનુ જણાવે છે કે, એકાગ્રતા સાથે અભ્યાસ કરવા માટે તેમણે RAS પરીક્ષાનું પરિણામ ના આવી જાય ત્યાં સુધી સ્માર્ટફોનને અલવિદા કહી દીધું હતું. વર્ષા જણાવે છે કે, આજે ફ્રી મળી રહેલા ડેટાનો યોગ્ય ઉપયોગ ના કરીને યુવા પેઢી પોતાનો સમય વ્યર્થ કરી રહી છે. તેમણે પોતાનો ટાર્ગેટ સેટ કરીને અભ્યાસ કરવો જોઈએ, આમ કરવાથી સફળતા ચોક્કસ મળે છે.