NEET-PG Exam 2022: NEET -PG પરીક્ષા મુલતવી, આરોગ્ય મંત્રાલયે લીધો મોટો નિર્ણય

NEET-PG Exam 2022: કેન્દ્રીય આરોગ્ય મંત્રાલયે નીટ પીજી પરીક્ષા 2022 ને 6-8 અઠવાડિયા માટે મુલતવી (NEET PG Exam 2022 postponed) રાખી છે. આ પરીક્ષા 12 માર્ચ 2022ના રોજ યોજાવાની હતી, પણ એક અરજીમાં નેશનલ એલિજિબિલિટી-કમ-એન્ટ્રન્સ ટેસ્ટ (NEET) પીજી પરીક્ષા મુલતવી રાખવાની માગણી કરાઈ હતી. જેથી નીટ પીજીની પરીક્ષા બાબતે સુનાવણી સુપ્રીમ કોર્ટમાં થઈ હતી.

વિદ્યાર્થીઓના એક જૂથે સુપ્રીમ કોર્ટમાં અરજી દાખલ કરીને પરીક્ષા મુલતવી રાખવાની માંગ કરી હતી. હવે મંત્રાલયની કમિટી અને નેશનલ બોર્ડ ઓફ એક્ઝામિનેશન્સ દ્વારા પરીક્ષાના આયોજન માટેની નવી તારીખોની સમીક્ષા કરવામાં આવશે અને 6-8 અઠવાડિયા પછી નિર્ણય લેવામાં આવશે.

અરજદારોએ વધુમાં દાવો કર્યો હતો કે, ઘણા સ્નાતકો કોવિડ ડ્યુટીમાં વ્યસ્ત હતા. તેમની ઇન્ટર્નશિપ મુલતવી રાખવામાં આવી હતી અને તેના કારણે તેઓ ઇન્ટર્નશિપ સમયમર્યાદામાં પૂરી કરી શકશે નહીં. જેથી ઉમેદવારો તેમની ઇન્ટર્નશિપ પૂર્ણ કરી શકે તે માટે સમય પણ માંગ્યો હતો.<br />પ્રતીકાત્મક તસવીર

<br />આસિસ્ટન્ટ ડાયરેક્ટર જનરલ (મેડિકલ એજ્યુકેશન) અને મેડિકલ કાઉન્સેલિંગ કમિટીના મેમ્બર સેક્રેટરી ડો.બી.શ્રીનિવાસે NEBના એક્ઝિક્યુટિવ ડિરેક્ટર ડો.એમ.બાજપાઇને મોકલેલા મેસેજમાં જણાવ્યું હતું કે, નીટ-પીજી 2022ની પરીક્ષા અને નીટ પીજી 2021 કાઉન્સેલિંગ એકસાથે આવી રહી હોવાથી નીટ-પીજી 2022ની પરીક્ષા મુલતવી રાખવાની વિનંતી કરતી ઘણી રજૂઆતો મળી રહી છે. આ ઉપરાંત ઘણા ઇન્ટર્ન મે-જૂનમાં પીજી કાઉન્સેલિંગ 2022માં ભાગ લઈ શકશે નહીં. આ તથ્યોને ધ્યાનમાં રાખીને આરોગ્ય અને પરિવાર કલ્યાણ મંત્રાલયે નીટ પીજી 2022ને 6-8 અઠવાડિયા માટે મુલતવી રાખવાનો નિર્ણય લીધો છે.