LRD Recruitment 2022: LRD ભરતીની લેખિત પરીક્ષાની તારીખ જાહેર, દરએક જગ્યા માટે 29.16 ઉમેદવારો વચ્ચે હરીફાઈ

LRD Recruitment 2022: લોકરક્ષક ભરતીમાં (Lokrakshak Recruitment 2022 Written Test) ઉમેદવારો જેની કાગડોળે રાહ જોઈ રહ્યા હતા તે લેખિત પરીક્ષાની તારીખ જાહેર કરી દેવામાં આવી છે. એલઆરડી ભરતીની લેખિત કસોટી આગામી 10મી એપ્રિલ 2022ના રોજ લેવામાં આવશે. આજથી આ જાહેરાતને ડેડલાઇન બનાવીને ઉમેદવારો અંતિમ તૈયારી કરે તો ફેબ્રુઆરીના 24, માર્ચના 31 અને એપ્રિલનો 10મો દિવસ ગણતા 65 દિવસની અંતિમ તૈયારી કરવા મળશે.

એલઆરડી ભરતીના વડા હસમુખ પટેલે ટ્વીટ કરીને જણાવ્યું, 'લોકરક્ષક ભરતીમાં જગ્યાના આઠ ગણા ઉમેદવારોની લેખિત પરીક્ષા લેવાના જુના નિયમ મુજબ 85000 ઉમેદવારોની પરીક્ષા લેવાની થાત. નવા નિયમ મુજબ લગભગ 305000 ઉમેદવારો પરીક્ષા આપશે. 220000 વધુ ઉમેદવારોને લેખિત પરીક્ષા આપવાની તક મળશે.'

અગાઉ હસમુખ પટેલે જણાવ્યું હતું કે લોકરક્ષક ભરતીમાં શારીરિક કસોટીના 25 અને લેખિત કસોટીના 100 ગુણ છે. શારીરિક કસોટીમાં ગમે તેટલા ઓછા ગુણ હોય તોપણ લેખિત કસોટીમાં વધુ ગુણ લાવી ઉમેદવાર સફળ થઈ શકે છે. આવા ઉમેદવારો બમણા જોરથી પ્રયત્ન કરે. જીવનમાં ક્યારે પ્રયત્ન નહીં છોડવો.

LRD ભરતીની સમગ્ર પરીક્ષાની હરિફાઈને ચકાસીએ તો એલઆરડીની લેખિત કસોટી માટે 305000 ઉમેદવારો પસંદ થયા છે જ્યારે કુલ 10459 જેટલી જગ્યા પર ભરતી છે. આમ આ ભરતીમાં દર એક જગ્યા માટે 29.161487713 ઉમેદવારો મેદાને છે.