70,000ની નોકરી છોડી શરૂ કર્યો ફ્રૂટ જ્યુસનો ધંધો, અહીંયા લાગે છે લોકોની મોટી લાઈન

Parth Patel, Ahmedabad: જીવનમાં કંઈક નવું કરવું હોય તો તેના માટે સંઘર્ષ અને પરિશ્રમ કરવો જરૂરી છે. આને ખરા અર્થમાં લમક જંબુસરવાલા એ સાબિત કર્યું છે. 70 હજાર રૂપિયાથી નોકરી છોડી આ યુવકે 12 લાખ જેટલું રોકાણ કરી ફ્રેશ ફ્રુટ જ્યુસનો ધંધો શરૂ કર્યો છે. જેમાં જુદા જુદા એક્ઝોટિક ફ્રુટનો જ્યુસ બનાવીને સર્વ કરે છે.

લમક જંબુસરવાલા સાથે વાત કરતા જણાવ્યું કે, મે 12 પાસ કરેલું છે. ત્યારેબાદ કોલેજ કરી પરંતુ કંઈક નવું કરવાની અને ફેમિલીની ફાઈનાન્સિયલ પરિસ્થિતિના લીધે હું આગળ ભણી ન કરી શક્યો. પછી મેં એક ખાનગી કંપનીમાં નોકરી શરૂ કરી હતી.

તેમણે વધુમાં કહ્યું કે, મેં નોકરી શરૂ કરી ત્યારે મારી ઉંમર 18 વર્ષથી પણ ઓછી ઉંમર હતી. સ્ટોક એડવાઈઝર કંપનીમાં 4 વર્ષની નોકરી કર્યા બાદ અન્ય ખાનગી કંપનીમાં સ્ટોક બ્રોકર તરીકે 6 વર્ષ કાર્ય કર્યું. જેમાં મારો પગાર 70 હજાર જેટલો હતો.

જંબુસરવાલાએ જણાવ્યું કે, મારા મગજમાં પહેલેથી જ નક્કી હતું કે, જો કોઈ સારી તક મળશે તો પોતાનો બિઝનેસ જરૂર કરીશ. અચાનક એક દિવસ મને એક્ઝોટિક ફ્રુટ અને તેના તાજા રસનો ખ્યાલ આવ્યો અને તેના બિઝનેસ કરવાની ઈચ્છા વર્તાઈ હતી.

તેમણે કહ્યું કે, તરત જ આ બિઝનેસની વાત મેં મારા મોટા ભાઈ જુઝર ઘડિયાલીને કહી. તેમણે મારા આ વિચાર અને બિઝનેસ કરવાની ઉત્સુકતા જોઈને બિઝનેસ કરવા માટે હા પાડી. સાથે સહકાર પણ આપ્યો હતો. ઓક્ટોબરમાં એમએસ ફ્રુટ ઝોન કરીને પોતાનું કાફે શરૂ કર્યું. જેમાં એક્સોટિક ફ્રુટ અને તાજો ફ્રુટનો જ્યુસ બનાવીને આપીએ છીએ.

અમારી ખાસિયત એ છે કે અમે કટ કરેલા એક્ઝોટિક ફ્રુટ પ્લેટર, ફ્રેશ જ્યુસ, ફ્રુટ પંચ, ફ્રુટ ડેઝર્ટ સર્વ કરીએ છીએ. જેમાં પપૈયા, તડબૂચ, પાઈનેપલ, કોકોનટ, સીતાફળ, સ્ટોબેરી, મોસંબી, નારંગી, કાળી દ્રાક્ષ, કિવિ, જામફળ, જાંબુ, સફરજન, કેરી, ટેટી જેવા ફળોનો સમાવેશ થાય છે.

આ સાથે ખાસ વાત એ પણ છે કે આ આખો બિઝનેસ ઊભો કરવા માટે તેણે 12 લાખથી વધુનું રોકાણ કર્યું છે. આ સાથે તેના કિંમતની વાત કરીએ તો ફ્રુટ પ્લેટર 80 થી 250 રૂપિયામાં, ફ્રુટ પંચ 140 થી 290 રૂપિયામાં, ફ્રુટ જ્યુસ 110 થી 160 રૂપિયામાં અને ફ્રુટ ડેઝર્ટ 190 થી 250 રૂપિયા સુધીમાં મળી રહે છે.