પાંચ ઈક્વિટી ફંડ કેટેગરી જેણે 10 વર્ષમાં આપ્યું સૌથી વધારે રિટર્ન, જુઓ આંકડા

આજના સમયમાં મૂડીરોકાણ માટે ઘણા વિકલ્પો છે. રોકાણકારો પોતાની ક્ષમતા અને સૂઝબૂઝ પ્રમાણે વિકલ્પ પસંદ કરે છે. ત્યારે લાંબાગાળાના મૂડીરોકાણ માટે ડાયવર્સિફાઇડ મ્યુચ્યુઅલ ફંડ આદર્શ હોવાની સલાહ અપાવામાં આવે છે. પરંતુ છેલ્લા 10 વર્ષના આંકડા પરથી ફલિત થાય છે કે, નેરો સેકટર અને થીમ ફંડ દ્વારા પણ સારું વળતર મળ્યું છે. તેમજ રિટર્ન મામલે સ્મોલ અને મિડ કેપ ફંડ પણ ખૂબ સારા રહ્યા છે.

Valueresearchના આંકડા મુજબ ટેકનોલોજી સેક્ટર પર ધ્યાન કેન્દ્રિત કરનાર ઈક્વિટી ફંડ ચાર્ટમાં ટોપ પર રહ્યા છે. તેમણે છેલ્લા દસ વર્ષમાં સૌથી વધુ 19.7 ટકા રિટર્ન આપ્યું છે. આઇટી સેક્ટરમાં આવેલી તેજીના કારણે આવા ફંડ ડિજિટલ ટ્રાન્સફોર્મેશન અને ઇનોવેશનમાં રોકાણ કરનાર વૈશ્વિક ગ્રાહકોથી પ્રાપ્ત થયા છે.

સ્મોલ કેપ ફંડ આ યાદીમાં બીજા ક્રમે છે. જેમાં છેલ્લા 10 વર્ષમાં 17.8 ટકા વાર્ષિક રિટર્ન મળ્યું છે. આ ફંડમાં મોટાભાગનો લાભ 2020ની નીચલી સપાટીથી સ્મોલ કેપ સ્પેસમાં આવેલા ઉછાળાના કારણે મળ્યો છે. છેલ્લા 16 મહિનામાં ઘણા સ્મોલ કેપ ફંડ દ્વારા 100 ટકા કે તેનાથી વધુ રિટર્ન અપાયું છે.

મિડકેપ ફંડ દ્વારા પણ સારું રિટર્ન મળ્યું છે. આંકડાઓ મુજબ, મીડકેપમાં છેલ્લા 10 વર્ષમાં 17.2 ટકા વળતર મળ્યું છે. વેલ્યુ ઇન્વેસ્ટિંગ સ્ટાઇલથી મની મેનેજર્સ માટે આ કેટેગરી લાભદાયક રહી હતી. 2020માં શેરબજારમાં આવેલી તેજી પણ તેની પાછળ જવાબદાર રહી છે.

હોસ્પિટલો, લેબોરેટરી અને દવા ઉત્પાદકો સહિતના ફાર્મા સ્ટોકમાં રોકવામાં આવેલા ફંડે પણ છેલ્લા 10 વર્ષમાં 16.7 ટકા જેટલું રિટર્ન આપ્યું છે. ઘણા સમયથી આ સ્ટોક સુસ્ત રહ્યા બાદ કોરોના મહામારીના કારણે ફરી સક્રિય થયા છે.

ભારતમાં લિસ્ટેડ મલ્ટી નેશનલ કંપનીઓના સ્ટોક પર કેન્દ્રિત ફંડ દ્વારા પણ છેલ્લા 10 વર્ષમાં 15.5 ટકા જેટલું ઊંચું વળતર મળ્યું છે. આમ તો છેલ્લા થોડા વર્ષોથી આ સ્ટોકસનું પરફોર્મન્સ સામાન્ય રહ્યું છે. આ સ્ટોકની વધતી વેલ્યુએશન અને ઘરઆંગણે મળેલા વિકલ્પોના કારણે આ શેર્સની માંગ ઘટી શકે છે.

છેલ્લા 10 વર્ષમાં જે રિટર્ન મળ્યું તે આગામી દસકામાં ન પણ મળે. આ રોકાણની સલાહ નથી. થીમ અને સેક્ટર ફંડ જોખમી હોય છે. જેથી જોખમ ખેડવાની તમારી ક્ષમતા, ગોલ અને સરપ્લસ ઉપલબ્ધતાના આધારે ફંડ પસંદ કરી રોકાણ કરો. જો તમે જાતે નિર્ણય ન લઈ શકતા હોવ તો તજજ્ઞની સલાહ લો.