Tax Saving FD: આ બેંકો ટેક્સ સેવિંગ ડિપોઝિટ પર ઓફર કરી રહી છે 7.6 ટકા સુધીનો વ્યાજદર, અહીં જૂઓ લીસ્ટ

જ્યારે નાણાંકીય આયોજન (financial planning)ની વાત આવે ત્યારે ટેક્સ ઓપ્ટિમાઇઝેશન (Tax optimization) હંમેશાં તમારે ધ્યાનમાં લેવું જોઈએ, જોકે, તે માત્ર નાણાંકીય વર્ષના અંતમાં પૂર્ણ કરવાનું એક માત્ર કાર્ય ન હોવું જોઇએ. જો તમે તમારા ટેક્સ પ્લાનિંગ (Tax Planning)થી શરૂઆત ન કરી હોય તો અત્યારે જ પ્લાનિંગ શરૂ કરી દો. તમારા નાણાંકીય લક્ષ્યો (Financial Goals)ને ધ્યાનમાં રાખીને સમજી વિચારીને રોકાણ કરો. જોખમ-વિરોધી રોકાણકારો અને નીચા ટેક્સ બ્રેકેટમાં રહેલા લોકો ટેક્સ-સેવિંગ ફિક્સ્ડ ડિપોઝિટ્સ (Tax Saving FDs) પર ધ્યાન આપી શકે છે. રિઝર્વ બેંક ઓફ ઇન્ડિયા (RBI) દ્વારા વર્ષ 2022માં સતત પાંચ રેપો રેટમાં વધારો કરવામાં આવ્યા બાદ અનેક બેંકોએ ટેક્સ સેવિંગ એફડી પર વ્યાજ દર વધાર્યા છે. બેન્કબજાર દ્વારા સંકલિત ડેટા દર્શાવે છે કે, સ્મોલ ફાઇનાન્સ બેન્કો અને નાની અને નવી ખાનગી ક્ષેત્રની બેન્કો હવે ટેક્સ-સેવિંગ એફડી પર 7.60 ટકા સુધીના દરો ઓફર કરે છે.

આવકવેરા કાયદાની કલમ 80 સી હેઠળ કર કપાત માટે 1.5 લાખ રૂપિયા સુધીના રોકાણનો દાવો કરી શકાય છે. ટેક્સ સેવિંગ એફડીમાં પાંચ વર્ષનો લોક-ઇન પિરિયડ હોય છે અને અકાળે ઉપાડની મંજૂરી મળતી નથી.

ડીસીબી બેન્ક ટેક્સ સેવિંગ ડિપોઝિટ પર 7.6 ટકા સુધીના વ્યાજ દર આપે છે. ખાનગી બેન્કોમાં ડીસીબી બેંક શ્રેષ્ઠ વ્યાજ દર આપે છે. પાંચ વર્ષમાં રૂ. 1.5 લાખનું રોકાણ કરવામાં આવ્યું હોય તો તે વધીને 2.19 લાખ રૂપિયા થાય છે.

ઉજ્જીવન સ્મોલ ફાઇનાન્સ બેંક અને એયુ સ્મોલ ફાઇનાન્સ બેંક ટેક્સ-સેવિંગ ડિપોઝિટ પર 7.20 ટકા સુધીના વ્યાજ દર આપે છે. સ્મોલ ફાઇનાન્સ બેન્કોમાં આ બંને બેન્કો બેસ્ટ વ્યાજ દર આપે છે. જો પાંચ વર્ષમાં રૂ. 1.5 લાખનું રોકાણ કરવામાં આવે તો તે તે વધીને 2.14 લાખ રૂપિયા થાય છે.

ડ્યૂશ બેન્ક ટેક્સ-સેવિંગ ડિપોઝિટ પર 7 ટકા સુધીના વ્યાજ દર આપે છે. વિદેશી બેંકોમાં ડ્યૂશ બેંક શ્રેષ્ઠ વ્યાજ દર આપે છે. જો પાંચ વર્ષમાં રૂ. 1.5 લાખનું રોકાણ કરવામાં આવ્યું છે તે વધીને 2.12 લાખ રૂપિયા થાય છે.

યસ બેન્ક, સિટી યુનિયન બેન્ક, આરબીએલ બેન્ક, આઇડીએફસી ફર્સ્ટ બેન્ક, એચડીએફસી બેન્ક, એક્સિસ બેન્ક અને આઇસીઆઇસીઆઇ બેન્ક સહિત અનેક બેન્કો ટેક્સ સેવિંગ ડિપોઝિટ પર 7 ટકા સુધીના વ્યાજ દર આપે છે. પાંચ વર્ષમાં કરવામાં આવેલું રૂ. 1.5 લાખનું રોકાણ વધીને 2.12 લાખ રૂપિયા થઇ શકે છે.

ઈન્ડસઈન્ડ બેન્ક અને સુર્યોદય સ્મોલ ફાઈનાન્સ બેન્ક ટેક્સ-સેવિંગ ડિપોઝિટ પર 6.75 ટકા સુધીના વ્યાજ દર આપે છે. રોકાણ કરેલી રૂ. 1.5 લાખની રકમ પાંચ વર્ષમાં વધીને 2.10 લાખ રૂપિયા થઇ શકે છે.

નાની ખાનગી બેંકો અને નાની ફાઇનાન્સ બેંકો નવી થાપણો મેળવવા માટે ઉંચા વ્યાજ દર આપી રહી છે. આરબીઆઈની સબ્સિડિયરી ડિપોઝિટ ઇન્શ્યોરન્સ એન્ડ ક્રેડિટ ગેરંટી કોર્પોરેશન (DICGC) 5 લાખ રૂપિયા સુધીની ફિક્સ્ડ ડિપોઝિટમાં રોકાણની ગેરંટી આપે છે.

સંબંધિત બેંકોની વેબસાઇટ પરથી 17 જાન્યુઆરી, 2023 સુધીમાં ડેટા સંકલિત કરવામાં આવ્યો છે. બેંક બજારમાં માત્ર તે જ વિદેશી, ખાનગી, સ્મોલ ફાઇનાન્સ અને જાહેર ક્ષેત્રની બેંકોની એફડી છે જે બોમ્બે સ્ટોક એક્સચેંજમાં લિસ્ટેડ છે. બેંકો જેના માટે તેમની સંબંધિત વેબસાઇટ્સ પર ડેટા ઉપલબ્ધ નથી, તે ધ્યાનમાં લેવામાં આવી ન હતી. આ દરો માત્ર નોન-સિનિયર સિટિજન માટે પાંચ વર્ષની એફડીના કર-બચતના છે.