31st March Deadline: માર્ચના અંત સુધીમાં પતાવી દો આ 8 કામ, નહીંતર થઈ શકે છે મોટું નુકસાન

મુંબઇ. 31st March Deadline: માર્ચ મહિનાનો અંત (March ending) થવા જઈ રહ્યો છે. આ મહિનો પૂરો થાય તે પહેલાં 8 કામ કરી લેવા ખૂબ જ આવશ્યક છે. આ કામમાં ડિમેટ એકાઉન્ટ (Demat account), પાન-આધાર લિંક (Aadhar-PAN link), કર રાહત સહિતના વિષયને લગતા કામનો સમાવેશ થાય છે. આગામી 1 એપ્રિલથી નવું નાણાંકીય વર્ષ (New financial year) શરૂ થવા જઈ રહ્યું છે, ત્યારે અહીં આપેલા કામ ઝડપથી કરી લેવા જરૂરી છે.

1) આધાર અને પાન કાર્ડને લિંક કરો : આધાર કાર્ડ અને પાન કાર્ડને લિંક કરવાની છેલ્લી તારીખ 31, માર્ચ 2022 છે. જો હજી સુધી તમે આધાર-પાન લિંક ન કર્યું હોય તો 31મી માર્ચ પહેલા તે કરી લેવું હિતાવહ છે. નહીંતર તમારું પાન કાર્ડ એક્ટિવ નહીં રહે અને તમારા નાણાંકીય કામ અટકી જશે.

2) ટેક્સ બચાવવા માટે રોકાણ કરો : નાણાંકીય વર્ષ 2021-2022 માટે આવકવેરામાં છૂટ મેળવવા માટે તમારે 31 માર્ચ, 2022 સુધીમાં રોકાણ કરવું પડશે. એટલે કે તમારે ટેક્સ સેવિંગ ઓપ્શનમાં રોકાણ કરવું પડશે.

3) એડવાન્સ ટેક્સ : આવકવેરાની કલમ 208 હેઠળ 10,000 રૂપિયાથી વધુની ટેક્સ લાયબિલિટી ધરાવતા કરદાતાઓ એડવાન્સ ટેક્સ ભરી શકે છે. તે 4 હપ્તામાં આપી શકે છે. જ્યારે છેલ્લો હપ્તો 15 માર્ચ સુધી ચૂકવી શકાય છે.

4) આવકવેરા રિટર્ન : આકારણી વર્ષ 2021-22 માટે હજી સુધી તમે આવકવેરા રિટર્ન (ITR) ફાઇલ કર્યું ન હોય, તો આવકવેરા રિટર્ન 31 માર્ચ સુધીમાં ફાઇલ કરી શકાય છે. તેમજ આ તારીખ સુધીમાં રિવાઇઝ્ડ ITR પણ ફાઇલ કરી શકાશે.

5) બેંક ખાતાના KYC : અગાઉ બેંક એકાઉન્ટ KYC અપડેટ કરવાની છેલ્લી તારીખ 31 માર્ચ, 2021 હતી, પરંતુ કોરોનાને કારણે આ તારીખ વધુ લંબાવવામાં આવી હતી. RBIએ KYC અપડેટ કરવાની છેલ્લી તારીખ 31 માર્ચ, 2022 નક્કી કરી છે. 31 માર્ચ સુધીમાં બેંક એકાઉન્ટ એટલે કે સેવિંગ એકાઉન્ટનું KYC કરાવી લેવું આવશ્યક છે.

6) PM કિસાન સન્માન નિધિનું KYC : તમે અત્યાર સુધીમાં પીએમ કિસાન સમ્માન નિધિ યોજના હેઠળ KYC ન કર્યું હોય, તો 31 માર્ચ પહેલા કરાવી લો. આવું કરવાથી તમે 11મો હપ્તો કોઈ પણ જાતના વિક્ષેપ વગર મેળવી શકો છો.

7) ડિમેટ એકાઉન્ટમાં ઉમેરો નોમિની : તમે શેર બજારમાં શેરનું ખરીદ અને વેચાણ કરો છો, તો પછી ડિમેટ ખાતામાં નોમિનીનું નામ ઉમેરી દો. જો તમે કોઈને નોમિની બનાવવા ન માંગતા હોવ, તો ઓપ્ટ-આઉટ નોમિનેશન ફોર્મ ભરી દેવું હિતાવહ છે. નહીં તો 31 માર્ચ 2022 બાદ તમારું ડિમેટ એકાઉન્ટ એક્ટિવ નહીં રહે.

8) મ્યુચ્યુઅલ ફંડને આધાર સાથે જોડો : હવે મ્યુચ્યુઅલ ફંડને રોકાણકારોના આધાર નંબર સાથે લિંક કરવું ફરજિયાત છે. એસેટ મેનેજમેન્ટ કંપનીઓ (AMC)એ રોકાણકારોના આધાર નંબર અપડેટ કરવા પડશે અને તમામ મ્યુચ્યુઅલ ફંડને આધાર સાથે લિંક કરવું પડશે. આ 31 માર્ચ સુધીમાં કરવાનું છે.