Photos: વિશ્વનું સૌથી મોટું વડાપાંઉ, કચ્છી યુવાને બનાવ્યો વર્લ્ડ રેકોર્ડ

Dhairya Gajara, Kutch: દાબેલીના પ્રદેશ કચ્છમાં લોકો વડાપાંઉ પણ ખૂબ ટેસથી ખાય છે. બોમ્બે સ્ટાઈલ વડાપાંઉ ઉપરાંત અહીં કચ્છી સ્ટાઈલ વડાપાંઉના ચાહકો પણ અનેક છે. પરંતુ શું તમે ક્યારેય અઢી કિલોનો વડાપાંઉ ખાધો છે? ભુજના એક યુવાને હાલમાં જ 2.65 કિલોનો જમ્બો વડાપાંઉ બનાવી સૌને અચંભીત કરી મુક્યા છે.

સોશિયલ મીડિયા પર એક નવા પ્રકારનું કન્ટેન્ટ બનાવવા તૈયાર કરાયેલા આ જમ્બો વડાપાંઉ બદલ કચ્છના આ યુવાને વિશ્વનો સૌથી મોટો વડાપાંઉ બનાવવાનો રેકોર્ડ પણ પોતાના નામે કર્યો છે.

સોશિયલ મીડિયાના આ યુગમાં ફૂડ બ્લોગિંગ તરફ અનેક યુવાનો વળ્યા છે. ખાણી-પીણીના વ્યવસાય સાથે સંકળાયેલા લોકો પણ કાંઈક નવું કરવાના ધ્યેય સાથે ખાવા પીવાની નવી નવી આઈટમ બનાવી સોશિયલ મીડિયા પર ધૂમ મચાવી રહ્યા છે.

મેગી, પિત્ઝા, આઈસ્ક્રીમ વગેરે વસ્તુઓમાં અખતરા કરી તૈયાર કરાતા ફ્યુઝન ફૂડ સોશિયલ મીડિયા પર ખૂબ વાયરલ થાય છે. આ જ દોડમાં ભાગ લેતા ભુજના એક યુવાને 2.65 કિલોનો વડાપાંઉ બનાવી સોશિયલ મીડિયા પર આગ લગાડી છે.

ભુજમાં છેલ્લા સાત વર્ષથી વડાપાંઉ અને ભજીયા ના વ્યવસાય સાથે સંકળાયેલા સંદીપ બુદ્ધભટ્ટી અને તેમના પુત્ર દેવ બુદ્ધભટ્ટીએ કાંઈક નવું કરવાની ઈચ્છા સાથે આ જમ્બો વડાપાંઉ બનાવવાનું નક્કી કર્યું. આ માટે તેઓ સોશિયલ મીડિયા થકી બે સંસ્થાઓના સંપર્કમાં આવ્યા વર્લ્ડ રેકોર્ડ બનાવવા માટે પ્રયત્ન કરવાનું નક્કી કર્યુ હતું.

એક પાવ અને એક વડા વડે દેવે મોટામાં મોટો વડાપાંઉ બનાવવા પ્રયાસ કર્યો પરંતુ છ વખત નિષ્ફળ થયો હતો. સાતમા પ્રયાસમાં દેવે 1.25 કિલોના વડા અને 650 ગ્રામના પાવ સાથે અડધા કલાકમાં 2.65 કિલોગ્રામનો વડાપાંઉ તૈયાર કર્યો હતો.

2.65 કિલોનો વડાપાંઉ બનાવવા બદલ દેવને ઇન્ફ્યુલેન્સર બુક ઓફ વર્લ્ડ રેકોર્ડ અને સોસાયટી પોઇન્ટ ફાઉન્ડેશન દ્વારા વિશ્વનો સૌથી મોટો વડાપાંઉ બનાવવાનો પ્રમાણપત્ર પણ એનાયત કરવામાં આવ્યો છે.