કેટલા રૂપિયાનું રોકાણ કરવાથી મળે છે US ગ્રીન કાર્ડ? આ મામલે ભારતીયો આગળ!

પૈસા આપી ગ્રીન કાર્ડ લેવાવાળા ભારતીયોની સંખ્યામાં ભારે વધારો થયો છે. અમેરિકામાં EB-5 વીઝા મેળવવાના મામલામાં ભારતીયોએ દક્ષિણ આફ્રિકા અને તાઈવાનને પછાડી ત્રીજા નંબર પર જગ્યા બનાવી લીધી છે. અમેરિકાના સ્ટેટ ડિપાર્ટમેન્ટના આંકડા અનુસાર, ગત બે વર્ષમાં રોકાણ સાથે જોડાયેલ 'કેશ ફોર ગ્રીન કાર્ડ' એટલે કે, ઈબી-5 વીઝા લેવાવાળા ભારતીયોની સંખ્યામાં ચાર ઘણો વધારો થયો છે.

સ્ટેટ ડિપાર્ટમેન્ટના આંકડા અનુસાર, સપ્ટેમ્બર 2018ના રોજ સમાપ્ત થયેલા 12 મહિનાના સમયગાળામાં EB-5માં 585 ગ્રીન કાર્ડ જાહેર કરવામાં આવ્યા, જ્યારે વર્ષ 2017માં આ આંકડો 174 હતો. જ્યારે 2016માં કુલ 149 ગ્રીન કાર્ડ સાથે તુલના કરવામાં આવે તો, બે વર્ષ દરમ્યાન આમાં 293 ટકાનો વધારો થયો છે.

EB-5 વિઝા માટે 5 લાખ અમેરિકન ડોલરનું રોકાણ કરવું પડે છે, અને ત્યાં ઓછામાં ઓછા 10 લોકોને રોજગાર આપવો પડે છે. આ રોકાણના બદલામાં બે લોકોને ગ્રીન કાર્ડ મળે છે. જેમની પાસે પૈસા છે, તેમને તથા તેમના બાળકોના ભવિષ્ય માટે EB-5 સારો સોદો છે.

એક બાજુ H1 અને HL1 વિઝાની સંખ્યામાં ઘટાડો કરી અમેરિકા યુવા પ્રફેશનલને પાછા મોકલી રહી છે, તો બીજી તરફ EB-5 વિઝા દ્વારા ભારતીય રોકાણ માટે અમેરિકામાં રસ્તો ખોલી રહ્યું છે. ભારતના પ્રધાનમંત્રી નરેન્દ્ર મોદીના મેક ઈન ઈન્ડીયાના સપનાની સામે અમેરિકામાં રોકાણ વધી રહ્યું છે.