આ 5 બેંકો બચત ખાતા પર આપી રહી છે 6.75% સુધીની ઓફર, જાણો યાદી

મુંબઈ: બેંકમાં બચત ખાતું (Saving account benefits) રાખવાના ઘણા ફાયદાઓ છે. જેમ કે લિક્વિડીટી, વ્યાજની કમાણી, ફંડની સુરક્ષા, બચત ખાતા અને ફિક્સ્ડ ડિપોઝિટ (Fixed deposit) વચ્ચે ઓટો સ્વીપની સુવિધા દ્વારા વધારાની કમાણી વગેરે. બેંકબજાર દ્વારા એકત્રિત કરવામાં આવેલા ડેટા અનુસાર, ઘટતા વ્યાજદરો વચ્ચે નાની અને નવી ખાનગી બેંકો વધારે વ્યાજ દર ઑફર કરે છે. તેથી સેવિંગ એકાઉન્ટ પર શ્રેષ્ઠ વ્યાજદર આપતી ટોચની પાંચ ખાનગી બેંકો વિશે અહીં તમને જણાવવા જઈ રહ્યા છીએ. આ માહિતી તમને ખૂબ જ ઉપયોગી થઈ શકે છે. અહીં એક વાત નોંધવી રહી કે કઈ  બેંકમાં ખાતું ખોલાવવું તેનો નિર્ણય ફક્ત વ્યાજ દરને ધ્યાનમાં રાખી ન લેતા બેંક તરફથી બીજી કઈ કઈ સુવિધા આપવામાં આવે છે તેને ધ્યાનમાં રાખીને લેવો જોઈએ.

રિટેલ ગ્રાહકોને આકર્ષવા માટે નાની ખાનગી બેંકો HDFC અને ICICI જેવી મોટી બેંકોની સરખામણીએ બચત ખાતા પર વધુ વ્યાજ દર ઑફર કરે છે. તમારે લાંબા ગાળાનો ટ્રેક રેકોર્ડ, સારી સુવિધાઓ, મોટું બ્રાન્ચ નેટવર્ક અને સમગ્ર શહેરમાં એટીએમની સુવિધા ધરાવતી બેંક પસંદ કરવી જોઇએ.

DCB બેંક: DCB બેંક બચત ખાતા પર 6.75 ટકા સુધીનો વ્યાજ દર ઓફર કરે છે. આ દ્રષ્ટિએ ખાનગી બેંકોમાં આ બેંક સૌથી સારો વ્યાજ દર આપી રહી છે. રૂ. 2500થી રૂ. 5000 સુધીનું માસિક બેલેન્સ હોવું જરૂરી છે. જો માસિક બેલેન્સ ન રાખવામાં આવે તો બેંક તરફથી દંડ લગાવવામાં આવતો હોય છે.

RBL બેંક: RBL બેંક બચત ખાતાઓ પર  6 ટકા વ્યાજ દર આપી રહી છે. જેમાં સરેરાશ રૂ. 2500થી 5000 સુધીનું માસિક બેલેન્સ હોવું જરૂરી છે.  બેલેન્સ ન રાખવા પર દંડ લાગી શકે છે. મિનિમમ બેેલેન્સ બાબતે દરેક બેંકનો અલગ અલગ નિયમ હોય છે.

Bandhan બેંક: બંધન બેંક બચત ખાતાઓ પર 6 ટકા વ્યાજ દર આપી રહી છે. જેમાં સરેરાશ 5000 સુધીનું માસિક બેલેન્સ હોવું જરૂરી છે. આનાથી ઓછું મિનિમમ સરેરાશ બેંક બેલેન્સ રાખવા પર બેંક નિયમ પ્રમાણે દંડ ફટકારી શકે છે.

Yes બેંક: Yes બેંક બચત ખાતાઓ પર 5.25 ટકા વ્યાજ દર આપી રહી છે. અહીં સરેરાશ રૂ. 10,000થી 25,000 સુધીનું માસિક બેલેન્સ હોવું જરૂરી છે.

IndusInd બેંક: IndusInd બેંક બચત ખાતાઓ પર 5 ટકા વ્યાજ દર આપી રહી છે. સરેરાશ રૂ. 1500થી 10,000 સુધીનું માસિક બેલેન્સ હોવું આવશ્યક છે.

BSEમાં લિસ્ટેડ તમામ ખાનગી બેંકો માટે બચત ખાતાઓ પર વ્યાજ દર ડેટા કમ્પાઇલેશન માટે ગણવામાં આવે છે. બેંકબઝાર દ્વારા 1 સપ્ટે-21થી ડેટાને ધ્યાનમાં લેવામાં આવ્યા છે. જે બેંકની વેબસાઇટ નથી તેના ડેટા અહીં નોંધવામાં આવ્યા નથી. નિયમિત બચત ખાતા માટે લઘુતમ બેલેન્સ જરૂરિયાત અને બેઝિક સેવિંગ્સ બેંક ડિપોઝીટ ખાતાને બાદ કરીને ગણવામાં આવે છે.