નવા વર્ષ સાથે Fastag, UPI, Mutual fund સહિત આ 10 નિયમ બદલાશે, જાણો તમારા પર શું અસર થશે

નવી દિલ્હી: નવા વર્ષ (New Year 2021)માં તમારા જીવન સાથે જોડાયેલી અનેક વસ્તુઓ બદલાશે. મોબાઇલક, કાર, ટેક્સ, વીજળી, રસ્તા અને બેન્કિંગ સહિત અનેક જરૂરી વસ્તુઓ માટે નવા નિયમ નવા વર્ષથી લાગૂ થઈ રહ્યા છે. આની સીધી અસર આમ આદમી પર પડશે. પહેલી જાન્યુઆરીથી ચેકના પેમેન્ટ સાથે જોડાયેલા નિયમમાં ફેરફાર થશે. હવેથી 50 હજારથી વધારેના ચેકથી પેમેન્ટ પર પૉઝિટિવ પે સિસ્ટમ લાગૂ થશે. આ ઉપરાંત કેન્દ્ર સરકારે તમામ ચાર પૈંડાવાળા વાહનો માટે પહેલી જાન્યુઆરીથી ફાસ્ટેગ ફરજિયાત કર્યો છે. આ ઉપરાંત ભારતીય મધ્યસ્થ બેંકે કૉન્ટાક્ટલેસ કાર્ડની લિમિટ બે હજારમાંથી વધારીને પાંચ હજાર કરવાનો નિર્ણય કર્યો છે. તો જાણીએ નવા વર્ષથી કયા કયા નિયમો બદલાશે અને તેની તમારા પર શું અસર થશે.

મ્યૂચ્યુઅલ ફંડમાં રોકાણના નિયમ- SEBIએ મલ્ટીકેપ મ્યૂચ્યુઅલ ફંડ માટે અસેટ અલોકેશનના નિયમમાં ફેરફાર કર્યો છે. નવા નિયમ પ્રમાણે હવે ફંડનો 75 ટકા હિસ્સો ઇક્વિટિમાં રોકવો જરૂરી બનશે, જે હાલ 65 ટકા છે. SEBIના નવા નિયમ પ્રમાણે ફંડ્સમાં મિડકેપ અને સ્મૉલકેપમાં 25-25 ટકા રોકાણ જરૂરી બનશે. જ્યારે 25 ટકા લાર્જ કેપમાં રોકવા પડશે.

ઓછા પ્રીમિયમમાં ટર્મ પ્લાન- IRDAIએ વીમા કંપનીઓને આરોગ્ય સંજીવની નામનો સ્ટાન્ડર્ડ રેગ્યુલર હેલ્થ ઇન્શ્યોરન્સ પ્લાન રજૂ કર્યા બાદ એક સ્ટાન્ડર્ડ ટર્મ લાઇફ ઇન્શ્યોરન્સ પ્લાન રજૂ કરવાનો આદેશ કર્યો છે. આ 'પૉલિસી સરળ જીવન વીમા' નામે છે. આ સ્કીમમાં ગ્રાહકોને કંપનીઓ તરફથી પહેલાથી આપવામાં આવેલા જાણકારીના આધારે નિર્ણય લેવામાં મદદ કરશે. 18થી 65 વર્ષની વય સુધીની વ્યક્તિઓ આ પોલીસી ખરીદી શકશે.

વીજળી કનેક્શન- વીજળી મંત્રાલય પહેલી જાન્યુઆરીથી ગ્રાહકોના અધિકાર અંગેના નિયમો લાગૂ કરવાની તૈયારી કરી રહ્યું છે. આ રીતે વીજળી વિતરણ કંપનીઓએ નિર્ધારિત સમયમાં ગ્રાહકોને સેવા આપવી પડશે, આવું નહીં કરવામાં આવે તો વપરાશકર્તા તેની પાસેથી દંડ વસૂલ કરી શકશે. હાલ આ અંગેનો ડ્રાફ્ટ કાયદા મંત્રાલય પાસે છે. મંજૂરી મળ્યા બાદ નવું કનેક્શન માટે વધારે કાગળની કાર્યવાહી કરવાની પણ જરૂરી નહીં રહે.

ચેકથી પેમેન્ટનો નિયમ- ચેકથી ચૂકવણીના કેસમાં થતી છેતરપિંડી રોકવા માટે રિઝર્વ બેંક ઑફ ઇન્ડિયાએ ચેક માટે "Positive pay System" દાખલ કરવાનું નક્કી કર્યું છે. જેમાં 50 હજારથી વધારેની ચૂકવણીના કેસમાં જરૂરી વિગતોની ફરીથી ચકાસણી કરવામાં આવશે. આ નવી સિસ્ટમ પહેલી જાન્યુઆરીથી અમલમાં આવશે.

કોન્ટેક્ટલેસ કાર્ડ લિમિટ- પહેલી જાન્યુઆરીથી કોન્ટેક્ટલેસ ટ્રાન્ઝેક્શનની લિમિટ બે હજાર રૂપિયામાંથી વધારીને પાંચ હજાર રૂપિયા કરવામાં આવશે. આ ઉપરાંત યૂપીઆઈથી ચૂકવવામાં આવતા રિકરિંગ ટ્રાન્ઝેક્શનના ઇ-મેન્ડેટની મર્યાદા પણ બે હજારમાંથી પાંચ હજાર કરવામાં આવશે.

વોટ્સએપ અમુક ફોનમાં નહીં ચાલે-ખૂબ જ પ્રસિદ્ધ મેસેજિંગ એપ્લિકેશન વૉટ્સએપ પહેલી જાન્યુઆરીથી અમુક ફોન માટે સપોર્ટ બંધ કરી દેશે. વૉટ્સએપના કહેવા પ્રમાણે તે એન્ડ્રોઇડ OS 4.0.3 અને તેનાથી ઉપર, iOS 9 અને તેનાથી ઉપરની ઓએસ તેમજ KaiOS 2.5.1 પર ચાલતા ફોન તેમજ JioPhone અને JioPhone 2 માટે સપોર્ટ ચાલુ રાખશે. બાકી ફોન માટે સપોર્ટ બંધ કરી દેશે.

કારની કિંમતો વધશે- મારુતિ સુઝૂકી, મહિન્દ્રા એન્ડ મહિન્દ્રા પહેલી જાન્યુઆરીથી પોતાની કારની કિંમતમાં વધારો કરશે. કંપનીનો દાવો છે કે પડતર કિંમતમાં વધારો થવાથી કિંમત વધારવામાં આવી રહી છે.

લેન્ડલાઇનથી મોબાઇલ ફોન કૉલ- બહુ ઝડપથી લેન્ડલાઇનમાંથી મોબાઇલ ફોનમાં કોલ કરતી વખતે આગળ "0" લગાડવો પડશે. ટેલિકોમ ડિપાર્ટમેન્ટ તરફથી ટેલિફોન કંપનીઓને આ માટે જરૂરી વ્યવસ્થા કરવાનું કહેવામાં આવ્યું છે. આ માટે પહેલી જાન્યુઆરીનો સમય આપવામાં આવ્યો છે.

તમામ ફોર વ્હીલર્સ માટે FASTag- કેન્દ્રીય રોડ અને પરિવહન મંત્રાલયે એક જાહેરનામું બહાર પાડીને પહેલી જાન્યુઆરીથી તમામ વાહનો માટે FASTag ફરજિયાત કર્યો છે.

UPI પેમેન્ટ- એવું શક્ય છે કે યૂઝર્સે એમેઝોન પે, ગૂગલ પે અને ફોન પે પરથી ટ્રાન્ઝેક્શન કરવા માટે વધારે ચાર્જ ચૂકવવો પડે. NPCIએ પહેલી જાન્યુઆરીથી થર્ડ પાર્ટી તરફથી ઉપયોગમાં લેવાતી UPI પેમેન્ટ સેવા પર વધારાનો ચાર્જ લગાવવાનો નિર્ણય કર્યો છે.

ગૂગલ પેની વેબ એપ- ગૂગલ તેની ખૂબ જ પ્રસિદ્ધ બની ગયેલી ગૂગલ પે સેવા માટે વેબ એપ શરૂ કરશે. ગૂગલ જાન્યુઆરીમાં આ સેવા શરૂ કરશે. સાથે જ જે લોકો તાત્કાલિક નાણા ટ્રાન્સફર કરવા માંગે છે તેના પર થોડા ચાર્જ પણ નાખશે.

એલપીજી સિલિન્ડર ભાવ- ઓઇલ માર્કેટિંગ કંપનીઓ દર મહિનાની પ્રથમ તારીખે એલપીજીના ભાવમાં વધારો-ઘટાડો કરતી હોય છે. ક્રૂડ ઓઇલના ભાવને ધ્યાનમાં રાખીને રાંધણગેસના ભાવમાં વધારો કે ઘટાડો કરવામાં આવે છે.

જીએસટી- ન્યૂઝ એજન્સી પીટીઆઈના જણાવ્યા પ્રમાણે પાંચ કરોડ રૂપિયા સુધીનો ટર્નઓવર ધરાવતા બિઝનેસોએ હવેથી જીએસટી સેલ્સ રિટર્ન અથવા GSTR-3B ભરવાનું રહેશે. આ નિયમથી નાના ટેક્સ પેયર્સે વર્ષમાં ફક્ત આઠ રિટર્ન (4 GSTR-3B અને 4 GSTR-1) ભરવાના રહેશે.