આઝાદી સમયે આટલામાં આવતું હતું સોનું આજે કિંમત 600 ગણાથી પણ વધુ

શું તમને ખબર છે 1947માં દેશ જ્યારે આઝાદ થયો ત્યારે સોના-ચાંદીની કિંમત (Gold Silver rates in 1947) કેટલી હતી? આઝાદીના 74 વર્ષ પછી સોના-ચાંદીએ કેટલું વળતર (Gold Silver return) આપ્યું? હકીકતમાં સોના સાથે દરેક ભારતીય પરિવારનો ભાવાત્મક સંબંધ છે. ખરાબ સમયમાં પૈસાની જરૂરિયાતને પહોંચી વળવા માટે સોનાને સંભાળીને રાખવાની પરંપરા છે. આ જ કારણ છે કે ભારતમાં દરેક ઘરમાં થોડું કે વધારે સોનું મળી આવે છે. તો આવો જાણીએ આઝાદી બાદ અત્યારસુધી સોનાની સફર વિશે.

1947થી અત્યારસુધી રિટર્નઃ આઝાદીથી અત્યાર સુધી સોનાએ આશરે 68,000% થી વધુ વળતર આપ્યું છે. 1947માં સોનાનો ભાવ આશરે 88 રૂપિયા પ્રતિ 10 ગ્રામ હતો. 1959માં પ્રથમ વખત સોનું 100 રૂપિયા પ્રતિ 10 ગ્રામ થયું હતું. જ્યારે 1974માં સોનું ફક્ત 500 રૂપિયા પ્રતિ 10 ગ્રામ પર વેચાતું હતું.

2007માં સોનાનો ભાવ 10,000 રૂપિયા પ્રતિ 10 ગ્રામ રહ્યો હતો. 2011માં ભાવ 26,000 રૂપિયા પ્રતિ 10 ગ્રામ, જ્યારે 2020માં સોનાનો ભાવ 56,191 રૂપિયાના રેકોર્ડ સ્તર પર પહોંચ્યો હતો. જોકે ત્યારબાદ 60 હજારના રેકોર્ડે પહોંચતા સોનાને ત્રણ વર્ષનો સમય લાગ્યો છે. આજે એટલે કે 21 માર્ચ 2023ના 12.30 વાગ્યા મુજબ સોનાએ MCX પર 60,265નો હાઈ બનાવ્યો છે. આમ 74 વર્ષમાં સોનું 100 રુપિયાની અંદરથી લઈને 60 હજારને પાર પહોંચ્યું છે.

ચાંદીમાં અત્યારસુધી રિટર્ન- આઝાદીથી અત્યારસુધી ચાંદીના રિટર્ન પર નજર કરીએ તો 1947માં એક કિલોગ્રામ ચાંદીની કિંમત આશરે 107 રૂપિયા હતી. ચાંદીએ આઝાદીથી અત્યારસુધી 58,700% વળતર આપ્યું છે. આઝાદીના 27 વર્ષ પછી 1974માં ચાંદીનો ભાવ 1,000 રૂપિયાને પાર થયો હતો. 1987માં પ્રથમ વખત ભાવ 5,000 રૂપિયાને પાર થયો હતો. 

જ્યારે 2004માં પ્રથમ વખત ચાંદી 10,000ને પાર થઈ હતી. વર્ષ 2008માં ચાંદીની કિંમત 25,000 રૂપિયા પ્રતિ કિલોગ્રામ થઈ હતી. વર્ષ 2020માં ચાંદી પ્રથમ વખત 77,949 રૂપિયાના રેકોર્ડ સ્તર પર પહોંચી હતી. હાલ ચાંદીની કિંમત રેકોર્ડ ભાવથી આશરે 5849 રૂપિયા નીચે છે.

સોના-ચાંદીમાં રોકાણઃ જેમ સમય જતાં આ બંને ધાતુઓના ભાવમાં વધારો થયો છે તેની સામે રોકાણમાં પણ વધારો થયો છે. સોના ચાંદીમાં રોકાણ માટેના હાલ જુદા જુદા વિકલ્પો પણ ઉપલબ્દ છે. નિષ્ણાતોનું કહેવું છે કે જ્વેલરી ઉપરાંત ડિજિટલ ગોલ્ડમાં રોકાણ વધારો. ગોલ્ડ ETF, ગોલ્ડ બોન્ડ, ગોલ્ડ MFમાં રોકાણ કરો.

તમારા રોકાણ પોર્ટફોલિયોમાં 10-15 ટકા સોનામાં રોકાણ કરો, કારણ કે અનિશ્ચિતકાળમાં સોનાએ ખૂબ સારું વળતર આપ્યું છે. સારા વળતર માટે ચાંદીમાં પણ રોકાણ કરો. તમારા પોર્ટફોલિયોમાં 10 ટકા હિસ્સો ચાંદી માટે રાખો. ચાંદી ઇન્ડસ્ટ્રીમાં માંગ વધતા સારા વળતરની આશા છે. આમ જોવા જઈએ તો તમારા કુલ રોકાણમાં 25-30 ટકા રોકાણ આ બંને કિંમતી ધાતુમાં હોવું જોઈએ.