સોનાના ભાવમાં આવ્યો 7 વર્ષનો સૌથી મોટો ઘટાડો! જાણો શું છે કારણ

મુંબઈઃ કોરોના વેક્સીન (Coronavirus Vaccine)ને લઈને સતત આવી રહેલા હકારાત્મક અહેવાલોને કારણે દુનિયાભરના શૅર બજાર (Stock Markets)માં ખરીદી પરત ફરી છે. તેના કારણે સોનાના ભાવ (Gold Prices Down)માં મોટો ઘટાડો જોવા મળી રહ્યો છે. ન્યૂઝ એજન્સી રોઇટર્સ (Reuters) મુજબ, આંતરરાષ્ટ્રીય સ્તરે સોનાના ભાવ 5 ટકાથી વધુ ઘટ્યા છે. એક્સપર્ટ્સનું કહેવું છે કે સ્થાનિક બજારોમાં સોનાના ભાવ વધુ ગબડી શકે છે. હાલના સ્તરથી ભાવ 5-8 ટકાના ઘટાડાની શક્યતા છે.

નોંધનીય છે કે, મંગળવારે દિલ્હી બુલિયન માર્કેટમાં સોનું (Gold Price Down) 1,317 રૂપિયા પ્રતિ દસ ગ્રામ સુધી સસ્તું થઈ ગયું. બીજી તરફ, એક કિલોગ્રામ ચાંદીના ભાવ (Silver Price Down) 2,943 રૂપિયા ઘટી ગયા.

એવું તો શું થયું કે, સોનાના ભાવમાં મોટું ગાબડું પડ્યું? - અમેરિકાના શૅર બજારોમાં મંગળવારની રાત્રે ખરીદી પરત ફરી છે, જેના કારણે રોકાણકારોનું વલણ હવે ફરીથી શૅર બજારની તરફ વધ્યું છે. બજારો પર કોરોના વેક્સીનના અહેવાલોની સકારાત્મક અસર જોવા મળી. અમેરિકાના શૅર બજારનો મુખ્ય બેન્ચમાર્ક ઇન્ડેક્સ S&P 500 નવા રેકોર્ડ સ્તરની ખૂબ નજીક પહોંચી ગયો.

હવે શું થશે? - એક્સપર્ટ્સ જણાવે છે કે, સોનાનો ભાવ અનેકવાર મુશ્કેલ સમયમાં ચમકે છે. 1970ના દશકમાં આવેલી મંદીમાં સોનાનો ભાવ નવા શિખર પર પહોંચ્યો. ત્યારબાદ 2008ની આર્થિક મંદીમાં પણ આવું જ જોવા મળ્યું. આંકડાઓ પર નજર કરીએ તો 80ના દશકમાં સોનું સાત ગણાથી વધુ ચઢીને 850 ડૉલર પ્રતિ ઓન્સના રેકોર્ડ ઊંચાઈ પર પહોંચી ગયું હતું.

સોનું 2008ના વૈશ્વિક આર્થિક સંકટ બાદ ફરીથી વધી ગયું, જે 2011માં 1900 ડૉલરને પાર જતું રહ્યું. પરંતુ પછી ઘણું ગબડી ગયું હતું. તેથી હવે માનવામાં આવી રહ્યું છે કે જો કોરોનાની વેક્સીન આવી ગઈ અને તે સમગ્રપણે સફળ રહી તો સોનાના ભાવમાં જોરદાર ઘટાડો જોવા મળી શકે છે.

તો શું હવે ભારતમાં સોનું સસ્તું થશે? - એક્સપર્ટ્સનું કહેવું છે કે જેમ-જેમ કોરોના વેક્સીનને લઈને અહેવાલો આવતા રહેશે, તેમ-તેમ સોનાના ભાવ પર દબાણ વધતું જશે. હાલના સ્તરે સોનાના ભાવમાં 5-8 ટકાનો ઘટાડો જોવા મળી શકે છે.