દિવાળી પહેલા નાણામંત્રીએ સામાન્ય લોકો માટે કરી રાહતની જાહેરાત, જુઓ યાદી

દિવાળી પહેલા ઇન્ડિયા ઇંકને ભેટ આપ્યા બાદ નાણા મંત્રી નિર્મલા સીતારમણ (Finance Minister Nirmala Sitharaman)ની અધ્યક્ષતામાં જીએસટી કાઉન્સિલે નાના વેપારીઓ અને સામાન્ય લોકોને પણ થોડી રાહત આપી છે.

હોટલમાં રોકાવું સસ્તું થયું : GST કાઉન્સિલની ગોવામાં મળેલી બેઠકમાં સૌથી મોટી રાહત હોટલ ઇન્ડસ્ટ્રીઝને મળી છે. હવે રૂ. 1000 સુધીના ભાડા પર ટેક્સ નહીં લાગે. જ્યારે રૂ. 7500ના ભાડાવાળા રૂમ પર ફક્ત 12 ટકા જીએસટી લાગશે. હાલમાં રૂ. 7500 વાળા હોટલ રૂમ પર 18 ટકા જીએસટી લાગે છે. જ્યારે 7500થી વધારે ભાડાવાળા રૂમ પર 18 ટકા જીએસટી લાગશે. પહેલા આવા રૂમ પર 28 ટકા જીએસટી લાગતો હતો. નવા દરો 1 ઓક્ટોબરથી લાગૂ પડશે.

જીએસટી કાઉન્સિલે 28 ટકા ટેક્સના સ્લેબમાં આવતા 10થી 13 સીટો સુધીના પેટ્રોલ-ડીઝલ વાહનો પર સેસ ઘટાવી દીધી છે. 1200 સીસીના પેટ્રોલ વાહનો પર સેસનો દર 1 ટકા અને 1500 સીસીના ડીઝલ વાહનો પર સેસ ત્રણ ટકા કરવામાં આવી છે. બંને પ્રકારના વાહનો પર હાલ 15 ટકા સેસ છે. જ્યારે જીએસટીનો દર 28 ટકા છે.

સૂકી આંબલી સસ્તી : જીએસટી કાઉન્સિલની બેઠકમાં સુકાયેલી આંબલી પર જીએસટી દર શૂન્ય કરવામાં આવ્યો છે. આ પહેલા તેના પર પાંચ ટકા જીએસટી લાગતો હતો.

પેન્ટની જિપ સસ્તી થઈ : કાઉન્સિલે સ્લાઇડ ફાસ્ટનર્સ (જિપ/ચેન) પર જીએસટી દર 18 ટકામાંથી ઘટાડીને 12 ટકા કરી દીધો છે.

જીએસટી કાઉન્સિલે સમુદ્રની હોડીનું ઇંધણ, ગ્રાઇન્ડર, હીરા, રૂબી, નીલમને છોડીને અન્ય રત્નો પર ટેક્સ ઘટાડી દીધો છે.