SBIની આ યોજના દ્વારા ખરીદો ખેતીલાયક જમીન, મળશે આ ફાયદા

જો તમારી પાસે ખેતીની જમીન ના હોય અને તમે ખેતી કરીને ગુજરાન ચલાવવા ઇચ્છતા હોવ તો સ્ટેટ બેંક ઓફ ઇન્ડિયા એટલે કે SBI ની ખેતીને પ્રોત્સાહિત કરતી એક સ્કીમ તમારા માટે ફાયદાકારક સાબિત થઇ શકે છે. જે હેઠળ જો કોઇ ખેતી કરવા માંગે છે તો તેને 85 ટકા જેટલી લોન જમીન ખરીદવા માટે મળી શકે છે. આ લોન સરળ હપ્તા સાથે તમે ચૂકવી શકો છો.

SBI ની આ સ્કીમનું નામ "લેન્ડ પરચેજ સ્કીમ" છે. આ સ્કીમનો ફાયદો તે લોકોને મળી શકશે જે જમીન ના હોવાના કારણે મજૂરી પર નિર્ભર કરી રહ્યા છે. જો કે SBIની આ લોન લેવા અને તે માટે ફોર્મ ભરવાના કેટલાક નિયમ પણ છે.

મોટાભાગે નાના ખેડૂત, મજૂરો અને બેરોજગારોને આ લોન આપવામાં આવે છે. આ લોન તે જ ખેડૂતોને મળે છે જેમની પાસે 5 એકડથી થી ઓછી જમીન છે અને લોન દ્વારા ખેતરમાં સિંચાઇ સુવિધાનો લાભ લેવા માંગે છે. વળી SBI તે જ ખેડૂતોને કે વ્યક્તિઓને આ લોન આપશે જે ઓછામાં ઓછા બે વર્ષ સુધી બેંકની લોન ચુકાવી હોય. અન્ય બેંકોના સારા દેવાદાર પણ આ ફોર્મ ભરી શકે છે. જો કે તેમની પર કોઇ બેંકની લોન બાકી ન હોવી જોઇએ.

તમે જે પણ જમીન ખરીદવા માંગો છો બેંક પહેલા તેની આકારણી કરશે. જે પછી જમીનની કુલ કિંમતનું 85 ટકા લોન મારફતે આપવામાં આવશે. ખરીદેલી જમીન બેંકની પાસે રહેશે. અને લોન ચૂકવ્યા પછી તે જમીન તમારી થઇ શકે છે. લોન મોટાભાગે 9 થી 10 વર્ષ માટે આપવામાં આવે છે. તે સિવાય વ્યાજની રકમ એક વર્ષ પછી આપવાની રહે છે.