ફૂલોની ખેતી કરીને તમે પણ કમાઈ શકો છો લાખો, અભણ ગુજરાતી ખેડૂતે કરી દેખાડી કમાલ

અમદાવાદઃ ખેતીમાં જો અલગ પ્રયોગ કરવામં આવે તો નક્કી જ ખેડૂતભાઈઓને સફળતા મળે છે. સામાન્ય રીતે આપણે જુદા જુદા અનાજ, શાકભાજી અને ફ્રૂટની ખેતી સફળતાપૂર્વક કરીને લાખો રુપિયા કમાણી કરતાં કેટલાક ખેડૂતોની કહાની જાણી છે, પરંતુ આજે એક એવી ખેતી વિશે વાત કરવા જઈ રહ્યા છે જે ઉગે તો ખેતર અને તેની આસપાસ તો સુવાસ ફેલાવે પરંતુ સાથે સાથે ખેડૂતના જીવન અને ઘર-પરિવારમાં પણ રુપિયાની મહેક પ્રસરે છે.

જી હાં, આ વાત છે ફૂલોની ખેતીની, અને તમને જાણીને નવાઈ લાગશે પરંતુ ગુજરાતમાં ફૂલની ખેતી મારફત તમે વર્ષે લાખો કરોડોની કમાણી કરી શકો છો.

જ્યારે ફૂલની ખેતીની વાત કરી રહ્યા છીએ ત્યારે આપણા સૌરાષ્ટ્ર વિસ્તારના અમરેલીના એક અભણ ખેડૂતનું ઉદાહરણ તો આપવું જ પડે તેવું છે જેમણે 25થી વધુ પ્રકારના વિવિધ ફૂલોની ખેતી કરીને વાર્ષિક 20 લાખથી વધુની આવક મેળવી છે.

અમરેલીના ગીરીયા ગામના ખેડૂત પોતાના ખેતરમાં નવતર પ્રયોગ તરીકે વિદેશી ફૂલની ખેતી કરીને 17 વીઘા ખેતીમાંથી 20 લાખ રુપિયાની કમાણી કરે છે. આ રીતે તેઓ અન્ય ખેડૂતોને પણ પરંપરાગત ખેતીથી આગળ વધીને કંઈક નવું કરવા માટે પ્રોત્સાહિત કરી રહ્યા છે.

અમરેલીના આ ખેડૂત એટલે ગિરીશભાઈ જોગાણી જેમણે એવું કરી બતાવ્યું છે જેનું આ વિસ્તારના કોઈ ખેડૂતોએ વિચાર્યું પણ નહોતું. 45 વર્ષના ગિરીશભાઈ પોતાના ખેતરમાં કારનેસેલ ગુલાબ, સ્વદેશી ગુલાબની વિવિધ પ્રજાતી સાથે વિદેશી ફૂલ જીફ્સોફિલિયાની ગ્રીન હાઉસ ખેતી કરે છે.

આ વિદેશી ફૂલ કિલોના હજારો રુપિયાના ભાવે વેચવામાં આવે છે અને છેક કોલકાત્તા, બેંગલુરુ અને બેંગકોક સુધી તેમની સપ્લાય કરવામાં આવે છે.

તમે પણ આ રીતે અલગ અલગ પ્રકારના ફૂલોની ખેતી કરીને તગડી કમાણી કરી શકો છો. આવું જ બીજું એક વિદેશી ફૂલ એટલે જર્મનીનું કેમોલી આ ફૂલ એટલું સુંદર છે કે જાણે કુદરતનો હસતો ચેહરો અને તેની ખેતી કરીને તમારો ચહેરો પણ સફળતાના અદમ્ય ઉત્સાહ સાથેના હાસ્યથી ખીલી જઈ શકે છે.

કેમોલી જેટલું દેખાવમાં સુંદર છે તેટલો જ તેનો વ્યવસાયીક ઉપયોગ પણ બહોળી રીતે થાય છે. સુશોભનથી લઈને હર્બલ ટી, અત્તર, ઠંડા પીણાં અને બેકરીના ઉત્પાદનોમાં સ્વાદ વધારવા માટે આ ફૂલ અને તેના અર્કનો ઉપયોગ કરવામાં આવે છે. તેથી આ ફૂલની ખેતીથી ખેડૂતો ખૂબ જ સારી એવી કમાણી કરી શકે છે.

આ ઉપરાંત જો તમે ખેડૂત હોવ અને ફૂલની ખેતી કરવા માગતા હોવ તો તમને જણાવી દઈએ કે આ ખેતી માટે સરકાર તરફથી મદદ પણ મળી શકે છે. ગુજરાત રાજ્ય સરકારના ખેતીવાડી વિભાગ દ્વારા આ માટે ખાસ યોજના ચાલી રહી છે. જેમાં ફૂલોની ખેતી માટે જુદા જુદા પ્રકારે સહાય આપવામાં આવે છે. જેની વિગતો પણ તમને જણાવી દઈએ.

ગુજરાત સરકાર ખેડૂતોની આવ વધે તે માટે અનેક યોજના ચલાવે છે. જેમાં ફૂલની ખેતી કરીને ખેડૂત સારી કમાણી કરી શકે માટે સરકાર દ્વારા ખાસ યોજના હેઠળ દાંડી ફૂલો, છુટા ફૂલો, કંદ ફૂલો જેવા વિવિધ પ્રકારની ખેતી માટે સહાય આપવામાં આવે છે. આ ઉપરાંત રાજ્યની વિવિધ કૃષિ યુનિવર્સિટીમાંથી તમારે ક્યા પ્રકારના ફૂલનું વાવેતર કરવું તેના વિશે માર્ગદર્શન પણ મળી શકે છે.

આ યોજનામાં ખેડૂત લાભાર્થી દીઠ 2 હેક્ટરની મર્યાદામાં સહાય મળે છે અને ગાઈડ લાઈન મુજબ ખર્ચના 40 ટકાથી મહત્તમ 65 ટકા સુધી સહાય મળવા પાત્ર છે. આ સહાય મેળવવા માગતા ખેડૂતો તેમના પોતાના જિલ્લાના નાયબ બાગાયત નિયામક અથવા doh.gujarat.gov.in પર સંપર્ક કરી શકે છે.