LPG Cylinder Price Hike: નવા મહિનામાં મોંઘવારીનો નવો માર, ગેસ સિલિન્ડરમાં 50 રુપિયાનો તોતિંગ વધારો

આજથી નવો મહિનો માર્ચ શરૂ થઈ ગયો છે. દરેક નવા મહિનાની સાથે, આર્થિક સંબંધિત નિયમો બદલાય છે. આ ફેરફારોની અસર તમારા ઘરના બજેટ પર પડે છે. ક્યારેક તમને આ નિયમોથી ફાયદો થાય છે તો ક્યારેક તમારા ખિસ્સા પર ભાર વધે છે. તેવામાં આજથી ગેસ સિલિન્ડરના ભાવમાં તોતિંગ વધારો કરવામાં આવતા હવે પ્રતિ ગેસ સિલિન્ડર ગુજરાતના અમદાવાદમાં તમારે 1110 રુપિયા ચૂકવવા પડશે.

એલપીજી, સીએનજી અને પીએનજીના ભાવ દર મહિનાની પહેલી તારીખે નક્કી કરવામાં આવે છે. તેમજ આ મહિને કુલ 12 દિવસ બેંકો બંધ રહેશે. તેવામાં તમારા પર પડી શકે તેવી અસરો વિશે જાણીએ.

એલપીજી, સીએનજી અને પીએનજીની કિંમતો વધીઃ એલપીજી, એલપીજી સિલિન્ડર, સીએનજી અને પીએનજીની કિંમતો દર મહિનાની પહેલી તારીખે નક્કી કરવામાં આવે છે. ગત વખતે 1 ફેબ્રુઆરીએ કંપનીઓએ ઘરેલુ એલપીજી સિલિન્ડરના ભાવમાં વધારો કર્યો ન હતો.

પરંતુ આ વખતે તહેવારોની સીઝન દરમિયાન જ ગેસ સિલિન્ડરના ભાવમાં વધારો કરવામાં આવ્યો છે. આજથી ઘરેલુ એલપીજી સિલિન્ડરના ભાવમાં રુપિયા 50નો વધારો થયો છે તો કોમર્શિયલ ગેસ સિલિન્ડરના ભાવમાં 350 રુપિયાનો વધારો કરવામાં આવ્યો છે.

કાશી વિશ્વનાથ મંદિરમાં બાબાની આરતી મોંઘીઃ મહાદેવાના ભક્તોએ હવે વારાણસી કાશી વિશ્વનાથ મંદિરમાં બાબની આરતી કરવી હશે તો વધુ રુપિયા ખર્ચવા પડશે. મંગળા આરતી માટે ભક્તોએ પહેલા કરતા 150 રૂપિયા વધુ ચૂકવવા પડશે. અગાઉ અહીં આરતી માટે 350 રૂપિયા ચૂકવવા પડતા હતા, પરંતુ હવે 500 રૂપિયા ચૂકવવા પડશે.

આ સિવાય સપ્ત ઋષિ આરતી, શૃંગાર ભોગ આરતી અને મધ્યાહન ભોગ આરતીની ટિકિટ માટે 120 રૂપિયા વધુ ચૂકવવા પડશે. પહેલા તેની કિંમત 180 રૂપિયા હતી પરંતુ હવે 300 રૂપિયા ચૂકવવા પડશે. આ નવો દર 1 માર્ચ, 2023 થી લાગુ થશે.

સોશિયલ મીડિયા સાથે જોડાયેલા નિયમો બદલાશેઃ માર્ચ મહિનાથી સોશિયલ મીડિયા સાથે જોડાયેલા નિયમો બદલાશે. ભારત સરકારે હાલમાં જ આઈટી નિયમોમાં ફેરફાર કર્યા છે. ટ્વિટર, ફેસબુક, યુટ્યુબ અને ઇન્સ્ટાગ્રામ જેવા સોશિયલ મીડિયા પ્લેટફોર્મે નવા નિયમો માનવા પડશે.

માર્ચમાં 12 દિવસ બેંકો બંધ રહેશેઃ માર્ચમાં હોળી અને નવરાત્રી પણ છે, જેના કારણે બેંકો 12 દિવસ બંધ રહેશે. આમાં સાપ્તાહિક બેંક રજાઓનો સમાવેશ થાય છે. કોઈપણ વિલંબ કર્યા વિના તરત જ તમારું બેંક સંબંધિત કામ પૂર્ણ કરો.

ભારતમાં બેંકો મહિનાના પહેલા અને ત્રીજા શનિવારે ખુલ્લી રહે છે. જ્યારે બીજા અને ચોથા શનિવારે બેંકોમાં રજા હોય છે. માર્ચ 2023 માં ભારતીય રિઝર્વ બેંક (RBI) ના કેલેન્ડર મુજબ, ખાનગી અને સરકારી બેંકો 12 દિવસ માટે બંધ રહેશે.