ઘર બનાવવા સરકાર આપી રહી છે ઓછા વ્યાજે લોન, આમને મળે છે લાભ

આજના સમયમાં ઘર બનાવવા માટે હોમ લોન જેવી ઘણી સુવિધાઓ ઉપલબ્ધ છે, પરંતુ જો તમે કેન્દ્ર સરકારના કર્મચારી છો, તો સરકાર પાસે પણ તમારા માટે એક ખાસ યોજના છે, જેના હેઠળ તમે અરજી કરી શકો છો. તેમજ બજાર કરતાં ઓછા વ્યાજે તમને લોન મળી શકે છે.

આ લોન ઘરના બાંધકામ માટે અથવા વિસ્તરણ કરવા માટે વધુ સારા વ્યાજ દરે લઈ શકો છો. વાસ્તવમાં, 7માં પગાર પંચની ભલામણો હેઠળ કેન્દ્ર સરકાર દ્વારા કર્મચારીઓને હાઉસ બિલ્ડીંગ એડવાન્સ (HBA) સુવિધા આપવામાં આવે છે. આ અંતર્ગત કેન્દ્રીય કર્મચારીઓ 31 માર્ચ, 2023 સુધી 7.1%ના વ્યાજ દરે હાઉસ બિલ્ડિંગ એડવાન્સ સુવિધાનો લાભ લઈ શકે છે.

કોણ પાત્રતા ધરાવે છે? કેન્દ્ર સરકારના તે તમામ કાયમી કર્મચારીઓ કે જેઓ પાંચ વર્ષથી સતત તેમની સેવાઓ આપી રહ્યા છે તેઓને હાઉસ બિલ્ડીંગ એડવાન્સ સ્કીમ માટે પાત્ર ગણવામાં આવે છે.

મહત્વનું છે કે જો પતિ અને પત્ની બંને કેન્દ્ર સરકારના કર્મચારી છે તો બંનેને આ સુવિધાનો લાભ મળશે. બંનેને પોતપોતાના ક્વોટાની પાત્ર રકમ મળશે. આ સ્થિતિમાં તેઓ ઈચ્છે તે રીતે અલગથી અને સંયુક્ત રીતે આ યોજનાનો લાભ લઈ શકે છે.

ક્યારે મળે છે ફાયદો? જ્યારે કોઈ કેન્દ્રીય કર્મચારી પોતાના અથવા તેની પત્ની અથવા બંનેના નામે ખરીદેલા પ્લોટ પર નવું મકાન બાંધે છે, ત્યારે તે HBAનો લાભ મેળવી શકે છે. સહકારી યોજના હેઠળ પ્લોટ ખરીદવા અને તેના પર મકાન અથવા ફ્લેટ બનાવવા પર HBAનો લાભ મળે છે.

કો-ઓપરેટિવ ગ્રુપ હાઉસિંગ સોસાયટીનું સભ્યપદ મેળવીને કર્મચારીઓ દ્વારા મકાન ખરીદવા પર સરકાર તેમને હાઉસ બિલ્ડિંગ એડવાન્સ સુવિધા આપે છે. ખાનગી સંસ્થા દ્વારા બાંધવામાં આવેલ મકાન કે ફ્લેટ ખરીદ્યા પછી પણ કેન્દ્રીય કર્મચારીઓને HBAનો લાભ મળે છે.

ડેવલપિંગ ઓથોરિટીના હાઉસિંગ બોર્ડ, અર્ધ-સરકારી અને નોંધાયેલ બિલ્ડર દ્વારા બાંધવામાં આવેલા મકાનની ખરીદી વખતે પણ કેન્દ્રીય કર્મચારીઓ HBAનો લાભ લઈ શકે છે. આ યોજનાનો લાભ દિલ્હી, બેંગલુરુ, લખનૌ સહિત તમામ શહેરોમાં સ્વ-ધિરાણ યોજના હેઠળ મકાનોની ખરીદી અથવા બાંધકામમાં ઉપલબ્ધ છે.

તેમજ કર્મચારી જે મકાનમાં પહેલાથી જ રહેતો હોય અને તેનું વિસ્તરણ કરવા માંગે છે, તો પણ તે HBA યોજનાનો લાભ લઈ શકે છે. કેન્દ્રીય કર્મચારીઓ કે જેમણે ઘરના બાંધકામ માટે બેંકો પાસેથી હોમ લોન લીધી હતી તેઓ અમુક શરતો સાથે HBA યોજનાનો લાભ મેળવી શકે છે.

HBA યોજનાનો લાભ નોકરી દરમિયાન માત્ર એક જ વાર મેળવી શકાય છે. HBA યોજના હેઠળ, કેન્દ્ર સરકારના કર્મચારીઓ 34 મહિનાનો બેઝિક પગાર, વધુમાં વધુ 25 લાખ રૂપિયા સુધીનો એડવાન્સ લઈ શકે છે. તેમજ જૂના મકાનના વિસ્તરણ માટે 34 મહિનાનો બેઝિક પગાર, વધુમાં વધુ 10 લાખ રૂપિયા સુધી લઈ શકાય છે.

ગ્રામીણ વિસ્તારોમાં, એડવાન્સ રકમ જમીનની વાસ્તવિક કિંમતના 80% અને ઘરના બાંધકામ અથવા જૂના મકાનના વિસ્તરણની કિંમત સુધી મર્યાદિત છે. જો વિભાગના વડા મંજૂર કરે કે સંબંધિત ગ્રામીણ વિસ્તાર શહેરના કાર્યક્ષેત્રમાં આવે છે, તો 100% મંજૂરી પણ થઈ શકે છે. વધુ વિગતો માટે તમે આ લિંકની મુલાકાત લઈ શકો છો. https://mohua.gov.in/pdf/5a05336ac28f7HBA%20Rules%202017.pdf.