Bamboo Farming: નાશિકના યુવાને વાંસની ખેતીમાં બનાવ્યો એવો રેકોર્ડ કે રાજ્યપાલે પણ નોંધ લીધી

આજના સમયમાં ઘણાં યુવાનો ઊચ્ચ શિક્ષણ મેળવ્યા પછી પણ ખેતીવાડી તરફ વળી રહ્યા છે. જેના કારણે ખેતીવાડીને પણ તેટલો જ ફાયદો થઈ રહ્યો છે. કારણ કે તેમની અભ્યાસુ વૃત્તિ, સંશોધન વગેરેનો ફાયદો આધુનિક ખેતી પદ્ધતિ તરીકે થાય છે.

હાલમાં જ એક એવી ઘટના સામે આવી છે જ્યાં ગુજરાતની સાવ પાસે આવે મહારાષ્ટ્રના નાશિક જિલ્લામાં એક આઈટી એન્જીનિયરે પોતાના ફિલ્ડથી કંઈક હટકે કરવાનું નક્કી કર્યું અને બાંબૂની ખેતીનો સફળ પ્રયોગ કર્યો.

પ્રશાંત દાતેએ એવા પ્રયોગશીલ ખેતી પ્રયોગો કર્યા કે મહારાષ્ટ્ર રાજ્યના રાજ્યપાલ ભગતસિંહ કોશ્યારીએ પણ તેમના આ પ્રયોગની નોંધ લીધી અને તેમની મુલાકાત લીધી હતી.

પ્રશાંતને એક વન અધિકારીએ વાંસની ખેતી વિશે માહિતી આપી હતી. તે પછી તેણે પોતાનું ધ્યેય નક્કી કર્યું અને આઈટી જેવી ફિલ્ડની વ્હાઈટ કોલર દુનિયા છોડીને ખેતીવાડી તરફ વળવાનું નક્કી કર્યું.

દુનિયામાં કુલ મળીને વાંસની 148 જેટલી પ્રજાતીઓ છે અને અહીં તમને પ્રશાંતના ફાર્મમાં એક જ છત નીચે તે પૈકીની 96 પ્રજાતીઓના વાંસ જોવા મળી જાય છે. એક જ જગ્યાએ આવા જુદી જુદી અનેક વાંસની પ્રજાતિનું આવું સંકલન ક્યાંય ન હોવાનું તેમણે કહ્યું.

બકાલ બાંબૂ, બિધુલી બાંબૂ, સ્પેનડર બાંબૂ, લતન્યાય બાંબૂ, સિલ્ક બાંબૂ, ગોહરા બાંબૂ, કાકાળા બાંબૂ, કટાંક બાંબૂ આવી 96 પ્રજાતીઓના વાંસ તમને અહીં જોવા મળશે.

તેમણે તૈયાર કરેલા જુદા જુદા પ્રકારના વાંસના આ સંકલનની નોંધ ઇન્ડિયા બુક ઓપ રેકોર્ડ, લિમ્કા બુક ઓફ રેકોર્ડ જેવી દિગ્ગજ સંસ્થાઓ પણ લીધી છે.

રાજ્યપાલ ભગતસિંહ કોશ્યારીની જેમ સંબાજીરાજે છત્રપતીએ પણ પ્રશાંતના આ પ્રયોગની અને નર્સરીની મુલાકાત લઈને આશ્ચર્ય વ્યક્ત કર્યું હતું.

વાંસની ખેતીમાં આવક વધારે હોવાથી પ્રશાંત હવે પોતાની સાથે અનેક ખેડૂતોને જાગૃત કરી રહ્યા છે અને તેમને વાંસની ખેતી તરફ વાળી રહ્યા છે.