સાવ ઓછા ખર્ચમાં આ બિઝનેસ કરીને રુપિયા જ નહીં ડોલર અને પાઉન્ડમાં બેગ ભરી કમાણી

આજકાલ જ્યાં જુઓ ત્યાં સમાચારોમાં ડુંગળીના ગગડી ગયેલા ભાવની મોકાણ જોવા મળે છે. ખેડૂતોને તેની મહેનતના ફળ સ્વરુપે પ્રતિ કિલોએ 2થી 5 રુપિયા જેટલી જ રકમ મળે છે. જોકે બીજી તરફ એવી ઘણી ઈન્ડસ્ટ્રીઝ છે જ્યાં અત્યારે પણ ડુંગળીની ખૂબ જ માગ છે અને તેને પહોંચી વળવા માટે ડુંગળીની પેસ્ટથી લઈને ડુંગળીનો પાઉડર અને ડિહાઇડ્રેડ ડુંગળી સુધીની પ્રોડક્ટ્સનું માર્કેટ ભરપૂર છે.

આપણે ત્યાં દેશમાં યોગ્ય સ્ટોરેજ વ્યવસ્થાના અભાવે દર વર્ષે ડુંગળીની સીઝન દરમિયાન ઉત્પાદન થતી કુલ ડુંગળીના 20થી 25 ટકા ડુંગળી પડી પડી સડી જાય છે. આ આંકડો જો રુપિયામાં જોવામાં આવે તો ખૂબ જ મોટો થાય છે. ઘણીવાર આવા સડી ગયેલા ફૂડથી ઇન્ફેક્શન અને અન્ય બીમારીઓ ફેલાવાની પણ શક્યતા વધે છે.

જોકે આ વચ્ચે કોઈપણ ફૂડને ડિહાડ્રેડ કરવો અથવા તો તેમાંથી કોઈ પ્રોડક્ટ બનાવીને તેનું વેલ્યુ એડિશન કરવાથી વસ્તુ ખરાબ થતી તો અટકે જ છે સાથે સાથે તેની કિંમત પણ સારી મળે છે. આવો જ એક બિઝનેસ એટલે ડુંગળીનો પાઉડર બનાવવાનો બિઝનેસ.

ડુંગળીનો પાઉડર આજે રેડી ટુ ઈટ ફૂડ ઇન્ડસ્ટ્રી, પિઝ્ઝા પાર્લર સહિતની જગ્યાઓએ ઉપરાંત ઘરમાં પણ ક્વિક રેસેપી જેવી કે સલાડ બનાવવા માટે ભરપૂર ઉપયોગમાં લેવામાં આવે છે. જોકે ભારતમાં હજુ પણ આ બાબતે ઓછી જાગૃકતા છે અને લોકો ડિહાઈડ્રેટેડ ડુંગળી અથવા તેના પાઉડરનો ઉપયોગ કરવાની જગ્યાએ તાજી ડુંગળીનો ઉપયોગ વધુ પસંદ કરે છે.

જોકે તાજી ડુંગળીના ઉપયોગમાં સૌથી મોટી સમસ્યા એ છે કે તેમાં ક્વોલિટીની સાથે સાથે તેના માટે કરવો પડતો ખર્ચ તમારા કાબૂમાં રહેતો નથી. ક્યારેક અતિશય વધારે રુપિયા તમારે આપવા પડે છે તો ક્યારેક સાવ મફતના ભાવે તમને તે વસ્તુ મળી જાય છે. જ્યારે પાઉડર અને ડિહાઈડ્રેટેડ ડુંગળી પ્રમાણમાં ઓછી જોઈએ છે અને તેની કિંમત નિશ્ચિત હોય છે.

ડુંગળીનો પાઉડર બનાવવા માટે તમારે સૌથી પહેલા ડુંગળીની છાલ દૂર કરીને તેને સ્વચ્છ કરવી રહી. તેની સ્લાઈસ કરવામાં આવે છે અને ત્યારબાદ તમે તેને સાલરથી ચાલતું સનડ્રાઇડ અથવા તો મોટાપાયે ઉત્પાદન માટે ઈલેક્ટ્રિકથી ચાલતા ડ્રાયરમાં ડિહાઈડ્રેડ કરી શકો છો.

આ રીતે ડુંગળીમાંથી ભેજ સંપૂર્ણ રીતે ઉડી ગયા પછી તે લાંબા સમય સુધી બગડતી નથી. તમે ધારો તો આ ડિહાઈડ્રેટેડ ડુંગળી પણ એર ટાઈટ પેકિંગમાં પેક કરીને વેચી શકો છો. ખાસ કરીને યુરોપ અને અમેરિકામાં આ પ્રકારની પ્રોડક્ટની ખૂબ જ માગ રહે છે. જેથી તમે એક્સપોર્ટ પર કરી શકો છો.

તેમજ ડિહાઈડ્રેટેડ ડુંગળીને તમે ગ્રાઈન્ડરમાં પીસીને તેનો પાઉડર તૈયાર કરી શકો છો. આ પાઉડર 100 ગ્રામથી લઈને 250 ગ્રામ સુધીના પેકિંગમાં પેક કરીને તમે વેચી શકો છો. તો કોઈ ફૂડ ચેઇન રેસ્ટોરેન્ટ કે હોટેલ સાથે પણ કોન્ટ્રાક્ટ કરી શકો છો.

ડુંગળીનો પાઉડર બનાવવાનો બિઝનેસ શરું કરવા માટે તમારી પાસે 600 સ્કવેર ફૂટ કુલ જગ્યા જોઈએ. જેમાં તમે ત્રણ ભાગ પાડી શકો છો. એકમાં કાચો માલ રાખો, બીજા ભાગમાં ડિહાઇડ્રેટર મશીન અને ગ્રાઈન્ડર અને ત્રીજા ભાગમાં તૈયાર કરવામાં આવેલી પ્રોડક્ટને રાખી શકો છો. આ ઉપરાંત મશીનરી માટે તમારે કુલ ખર્ચ 3-4 લાખ રુપિયા આવી શકે છે. તેમજ કાચા માલ માટે 1 લાખ અને વર્કિંગ કેપિટલ તરીકે 1થી દોઢ લાખ, આમ કુલ મળીને 6 લાખની આસપાસમાં તમે આ બિઝનેસ શરુ કરી શકો છો. જોકે આના માટે તમને ખાદી એન્ડ વિલેજ ઇન્ડસ્ટ્રીઝ કમિશન દ્વારા મદદ મળી શકે છે.

મહત્વનું છે કે કોઈપણ વસ્તુને ડિહાઇડ્રેડ કરવાથી તેમાં રહેલી ન્યુટ્રીશન વેલ્યુ વધી જતી હોય છે. એક કિલો ડિહાડ્રેટેડ ડુંગળી 8 કિલો સુકી ડુંગળી બરાબર હોય છે. એટલે કે તેના ઓછા વપરાશમાં પણ તમને સ્વાદ અને સુગંધ મળી રહે છે. અંતમાં જણાવી દઈએ કે રશિયા, જર્મની, ફ્રાન્સ, બ્રિટન જેવા દેશો ભારતમાં જ ડિહાઈડ્રેટ થયેલી ડુંગળી ખાય છે, પણ ભારતમાં જાગૃતિના અભાવે ડિહાઇડ્રેટેડ ડુંગળીનો વપરાશ ખૂબ જ ઓછો છે.