Bharuch: નેશનલ સ્પર્ધામાં બટુકનાથ વ્યાયામ શાળાનાં ખેલાડીઓનો દબદબો, આટલાં મેડલ જીત્યા

Aarti Machhi, Bharuch : ભરૂચ શહેરમાં આવેલ બટુકનાથ વ્યાયામ શાળા ખાતે વિવિધ રમતો થકી બાળકો,વયોવૃદ્ધ સૌ માટે શારીરિક તાલીમ આપવામાં આવે છે. વ્યાયામ શાળા ખાતે બાળકો ઉત્સાહભેર ભાગ લઈ તાલીમ મેળવી રહ્યાં છે. જેમાં કરાટેના વિવિધ દાવપેચ શીખવાડવામાં આવે છે.

બાળકો અને બાળકીઓ આ કરાટે થકી રાજ્ય કક્ષા અને નેશનલ કક્ષાની રમતમાં ભાગ લઈ ભરૂચ જિલ્લાનો ડંકો વગાડી રહ્યા છે.

મહારાષ્ટ્રના નાંદેડ ખાતે 7 મી નેશનલ સ્પર્ધાનું આયોજન કરવામાં આવ્યું હતું . આ સ્પર્ધામાં ગુજરાતની ટીમે 12 ગોલ્ડ , 10 સિલ્વર , અને 5 બ્રોન્ઝ મેડલ પ્રાપ્ત કરી ચેમ્પિયનશિપ પ્રાપ્ત કરી હતી. રાષ્ટ્રીય કક્ષાની સ્પર્ધામાં ભરૂચ જિલ્લા યોંગમૂડો એસોસિએશન અને બટુકનાથ વ્યાયામ શાળામાં તૈયાર થયેલ 6 રમતવીરો ઝળકયા છે.

ભરૂચના નિલય પટેલે ગોલ્ડ અને સિલ્વર મેડલ પ્રાપ્ત કર્યો છે. ઉજ્જવલ પ્રજાપતિ, હિરેન ઓડ, અનિરુદ્ધ સુરતિયા અને રાજપુત મંગલિયાએ એક એક ગોલ્ડ મેડલ હાંસલ કર્યા છે. જ્યારે આયુષ પાટણવાડીયાએ સિલ્વર મેડલ પ્રાપ્ત કરી ભરૂચના ગૌરવમાં વધારો કર્યો છે.

ગોલ્ડ મેડલ પ્રાપ્ત કરનાર ભરૂચ તેમજ ગુજરાતના રમતવીરો આગામી શ્રીલંકા ખાતે યોજાનાર સાઉથ એશિયન સ્પર્ધા માટે પસંદગી પામ્યા છે .જેઓ શ્રીલંકા ખાતે પણ ભારત તરફથી પ્રતિનિધિત્વ કરી ઉત્તમ દેખાવ કરશે.