રાજ્યમાં સંખ્યાબંધ વૃક્ષો ધરાશાયી, જંબુસરમાં ઝાડ પડતાં મહિલાનું મોત

ભરુચ: ભરુચના જંબુસરમાં ભારે પવનમાં સાથે વૃક્ષ ધરાશયી થતાં મહિલાનું મોત નિપજ્યું છે. આ ઘટના પીસાદ મહાદેવ મંદિર પાસે બની છે. ઘર આંગણે બેસેલી મહિલા પર વૃક્ષ પડતાં મહિલાનું ઘટનાસ્થળે મોત થયું છે. ઘટનામાં અન્ય એક મહિલા અને બાળકી પણ ઈજાગ્રસ્ત થતાં સારવાર અર્થે હોસ્પિટલ ખસેડાયા છે. બનાવના પગલે પોલીસનો કાફલો ઘટના સ્થળે પહોંચી વધુ તપાસ હાથ ધરી છે.

બીજી બાજુ, અંબાજીના વાતાવરણમાં પલટો આવ્યો છે. ફાગણમાં કમોસમી વરસાદ પડ્યો છે. ભર ઉનાળે વાવાઝોડાને વરસાદી જેવો માહોલ છે. ભારે પવનના કારણે ઝાડ પડવાની ઘટનાઓ સામે આવી રહી છે. અંબાજી અને કુંભારિયામાં વીજપોલ ધરાશાયી થયા છે. કોઈ જાનહાની કે નુકસાનીના સમાચાર નથી. હજી આકાશમાં કાળા ડિબાગ વાદળો છવાયા છે. સાથે જ વાતાવરણમાં પણ ઠંડક પ્રસરી છે. ખેતરોમાં કાપેલા ઘઉંના લઈ ખેડૂતોના જીવ અધ્ધર છે. વરસાદને વાવાઝોડાના પગલે જગતનો તાત ચિંતીત છે.

વડોદરામાં ભારે પવન ફૂંકાતા અનેક વૃક્ષો ધરાશાયી થયા છે. પદ્યાવતિ શોપિંગ સેન્ટર પાસે આવેલું વૃક્ષ ધરાશાયી થયું છે. વૃક્ષ નીચે અનેક ટુ વ્હીલર વાહનો દબાયા છે. રોડ પાસે જ વૃક્ષ ધરાશાઈ થતાં ટ્રાફિક જામ થયો છે. ફાયર બ્રિગેડ દ્વારા વૃક્ષને દૂર કરવાની કામગીરી શરૂ કરાઈ છે.

પાટણ જિલ્લામાં ભારે પવન સાથે વરસાદ પડ્યો છે. હારીજ, સમી, શંખેશ્વર તાલુકામાં વરસાદી ઝાપટા પડ્યા છે. ચાણસ્મામાં ભારે પવન સાથે વૃક્ષ ધરાશયી થયા છે. હાઈવે પર વૃક્ષ પડતા વાહન ચાલકોને હલાકીનો સામનો કરી રહ્યા છે. ભારે પવનના કારણે અનેક હોડિંગ્સ અને બેનરો ઉડ્યા છે. <br /><br />

મહેસાણા જિલ્લા માં વાવાઝોડાની અસર જોવા મળી રહી છે. વાવાઝોડાના પગલે જનજીવન ઉપર અસર પડી છે. બહુચરાજી, ઊંઝા અને મહેસાણા સહિત અનેક વિસ્તારમાં વરસાદ છે. વાવાઝોડા, વરસાદની સાથે અનેક જગ્યાએ કરા પણ પડ્યા છે. વાવાઝોડાના પગલે અનેક વૃક્ષો ધરાશાયી થયા છે. બેનરો અને હોર્ડિંગો પણ મોટા પ્રમાણમાં તૂટ્યાં છે.