Mount Abu Weather Today: માઉન્ટ આબુની ઠંડીઃ તાપમાન માઈનસ 3 ડિગ્રીએ પહોંચતા પ્રવાસીઓને મોજ પડી ગઈ, છવાયો બરફ

માઉન્ટ આબુઃ હિલ સ્ટેશન માઉન્ટ આબુમાં કાતિલ ઠંડીનો ત્રીજો રાઉન્ડ શરુ થઈ ગયો છે. અહીંનું લઘુત્તમ તાપમાન ફરી ગગડી રહ્યું છે. અહીંના તાપમાનમાં 3 ડિગ્રીનો ઘટાડો થતા લઘુત્તમ તાપમાન માઈનસમાં પહોંચી ગયું છે. અહીંનું તાપમાન ફરી માઈનસમાં પહોંચી જતા પ્રવાસીઓને એક નવો માહોલ માણવા મળી રહ્યો છે. ઠંડી વધવાના કારણે ઘાંસના મેદાનો પર બરફની ચાદર છવાઈ ગઈ છે.

શનિવારે માઉન્ટ આબુનું લઘુત્તમ તાપમાન 0 પર પહોંચ્યા બાદ રવિવારે અહીના તાપમાનમાં વધારે 3 ડિગ્રીનો ઘટાડો થતા તાપમાન માઈનસ 3 પર પહોંચી ગયું છે. કડકડતી ઠંડીએ ફરી એકવાર રૌદ્ર સ્વરૂપ ધારણ કર્યું છે. જાન્યુઆરી પૂર્ણ થવાની આરે છે ત્યારે ઠંડીનો ચમકારો અનુભવાઈ રહ્યો છે.

માઉન્ટ આબુમાં લઘુત્તમ તાપમાન માઈનસ 3 પર પહોંચી જતા વાહનો અને ઘાસના મેદાનોમાં બરફ છવાઈ ગયેલો જોવા મળ્યો છે. આ સિવાય રાત્રે ખુલ્લામાં રહેલા પાણી પણ બરફ બનીને જામી ગયો છે. લોકો પોતાના વાહનો પર અને હોટલની બહાર જામેલો બરફ જોઈને રોમાંચિત થઈ રહ્યા છે.

સામાન્ય રીતે ડિસેમ્બર મહિનામાં તાપમાનનો પારો ગગડતા માઉન્ટ આબુમાં પ્રવાસીઓની ભીડ જામી જતી હોય છે. પરંતુ આ વખતે જાન્યુઆરીમાં કડાકા સાથે ઠંડી પડવાથી પ્રવાસીઓ ઠંડીની મજા માણવા માટે અહીં પહોંચી રહ્યા છે. હોટલ સહિતના વ્યવસાય સાથે સંકળાયેલા લોકો પણ આ બાબતે ખુશી વ્યક્ત કરી રહ્યા છે.

અહીં આવેલા પ્રવાસીઓએ માઈનસ ડિગ્રીની મજા માણવાની ખુશી વ્યક્ત કરી રહ્યા છે. જેમાં એક પ્રવાસીએ જણાવ્યું કે અહીં સવારે બહાર નીકળ્યા તો જોયું કે વાહનો પર અને ઘાસ પર બરફની ચાદર છવાઈ ગયેલી જોવા મળી હતી. એક પ્રવાસીએ જણાવ્યું કે અગાઉ આવ્યા હતા તેના કરતા આ વખતે ઠંડીની વધુ મજા માણવા મળી રહી છે કારણ કે અહીનું તાપમાન માઈનસમાં પહોંચી ગયું છે.

અન્ય એક પ્રવાસીએ જણાવ્યું કે અહીં ભારે ઠંડી પડી રહી છે અને અમે સવારે બહાર નીકળ્યા તો બરફ જોઈને અમે એટલા રોમાંચિત થઈ ગયા હતા કે મિત્રો સાથે મોજમસ્તી કરી હતી. માઉન્ટ આબુમાં હજુ પણ ઠંડી આગામી દિવસોમાં યથાવત રહેવાની સંભાવના વ્યક્ત કરવામાં આવી રહી છે.

માઉન્ટ આબુમાં સ્થાનિકો તથા અહીં આવેલા પ્રવાસીઓ ઠંડીથી બચવા માટે ગરમ કપડાની સાથે તાપણાનો પણ સહારો લઈ રહ્યા છે. આગામી દિવસોમાં પણ અહીં ઠંડી યથાવત રહેવાની સંભાવના વ્યક્ત કરવામાં આવી રહી છે. પ્રવાસીઓએ કહ્યું કે અહીં એટલી ઠંડી છે કે ખીસ્સામાંથી હાથ બહાર કાઢીએ તો પણ થથરી જવાય છે.