ઉત્તરાયણની રજામાં નડાબેટમાં પ્રવાસીઓનો ધસારો, જુઓ કેવો છે ત્યાંનો માહોલ

કિશોર તુવર, બનાસકાંઠા: ભારત પાક બોર્ડર પાસે આવેલા નડાબેટ સીમા દર્શન પ્રોજેક્ટ ઉત્તરાયણને લઈને પ્રવાસીઓના આકર્ષણનું કેન્દ્ર બન્યું છે. તહેવારોમાં મોટી સંખ્યામાં પ્રવાસીઓ નડાબેટ પહોચી રહ્યા છે. બનાસકાંઠા જિલ્લાના સૂઇગામ તાલુકાના નડાબેટ ખાતે ભારત-પાકિસ્તાન આંતરરાષ્ટ્રીય બોર્ડર પર શરૂ કરાયેલા સીમા દર્શન પ્રોજેક્ટ 10 એપ્રિલ 2022ના ખુલ્લો મુકાયો હતો.

સામાન્ય દિવસોમાં 1000થી 1200 પ્રવાસીઓ આવતા હતા. રજાઓના સમયમાં 2000થી 3000 પ્રવાસીઓ બોર્ડેરની મજા માણવા આવે છે. જ્યારે ઉત્તરાયણ, 15મી ઓગસ્ટ, 26 જાન્યુઆરી, રક્ષાબંધ જેવા તહેવારોમાં 8000 થી 10000 પ્રવાસીઓ આવે છે.

ગુજરાત સહિત આજુબાજુના રાજ્યોના  શાળા-કોલેજના વિદ્યાર્થીઓથી લઇને તમામ પ્રવાસીઓમાં આકર્ષણનું કેન્દ્ર નડાબેટ બન્યું છે.  નડાબેટ ખાતે પ્રવાસીઓના આકર્ષણ માટે ટી પોઇન્ટ, આગમન પ્લાઝા, ઓડિટોરિયમ, પાર્કિંગ, રિટર્નિંગ વોલ, પીવાના પાણીની સુવિધા, રી-ટ્રીટ સેરોમની સરહદની રોમાંચનો અનુભવ કરાવે છે.

બાળકો માટે સાઈકલિંગ, વિવિધ ગેમ્સ અને પ્રવાસીઓ માટે 1965 અને 1971ના ભારત પાકિસ્તાન યુદ્ધમાં વપરાયેલ વિવિધ હથિયારોની ઝાંખીથી ખુશ ખુશાલ બની જવાય છે..

પ્રવાસીઓના આકર્ષણ માટે BSF ની થીમ પર નડાબેટના T પોઇન્ટથી ઝીરો પોઇન્ટ સુધી લોકો સુરક્ષા દળો સેનાની કામગીરીથી પરિચિત થાય તે માટે રસ્તા વચ્ચે અલગ અલગ જગ્યાએ  1971ના યુદ્ધમાં વપરાયેલ વિમાન, મિસાઈલ, ટેન્ક આર્ટિલરી ગન, ટોર્પિડો વિંગ ડ્રોપ ટેન્ક ડિસ્પ્લે કરવામાં આવ્યા છે.

તેમજ અલગ અલગ જગ્યાએ ઉભા કરેલા સેલ્ફી પોઇન્ટ પ્રવાસીઓ માટે આકર્ષણનું કેન્દ્ર બન્યા છે. જ્યારે ઝીરો પોઇન્ટ ખાતે પણ પ્રવાસીઓ બેસી શકે અને પ્રવાસને યાદગાર બનાવી શકે તે માટે સારી વ્યવસ્થા કરાઈ છે.