બનાસકાંઠા: લગ્નના ચાલુ ભોજન સમારંભમાં એકાએક લાગી આગ, લોકોએ જમવાનું પડતું મૂકી જીવ બચાવવા દોટ મૂકી

બનાસકાંઠા: ઉનાળા (Summer)માં સામાન્ય રીતે જંગલ વિસ્તારોમાં દવ એટલે કે આગ લાગવાની ઘટનાઓ બનતી હોય છે. જોકે, અહીં લગ્ન સમારંભમાં આગ લાગવાની ઘટનાએ ચર્ચા જગાવી છે. બનાસકાંઠા જિલ્લામાં લગ્ન સમારંભ દરમિયાન આગનો બનાવ (fire incident during marriage function) બન્યો છે. જે બાદમાં હાજર લોકોએ દોડાદોડી કરી મૂકી હતી. જોકે, આ કેસમાં કોઈ જાનહાની થઈ ન હતી. તંત્રને જાણ કરતા આગ પર કાબૂ મેળવી લેવાયો હતો. આગ કેવી રીતે લાગી હતી તે જાણી શકાયું નથી. આગના બનાવ બાદ મોટી સંખ્યામાં લોકો અહીં એકઠા થઈ ગયા હતા.

મળતી માહિતી પ્રમાણે બનાસકાંઠા જિલ્લાના થરાદની રાજેન્દ્રનગર સોસાયટીમાં લગ્ન મંડપમાં આગ લાગી હતી. આગે વિકરાળ સ્વરૂપ ધારણ કરી લેતા લગ્ન મંડપમાં અફડાતફડી મચી જવા પામી હતી.

રિપોર્ટ પ્રમાણે આગ લાગવાનો બનાવ બન્યો ત્યારે ભોજન સમારંભ ચાલી રહ્યો હતો. ચાલુ ભોજન સમારંભમાં આગ લાગતા થોડીવાર માટે દોડાદોડી થઈ હતી. લોકો જમવાનું પડતું મૂકીને જીવ બચાવવા ભાગ્યા હતા.

દરજી સમાજના લગ્ન સમારંભ દરમિયાન આ આગ લાગી હોવાનું જાણવા મળી રહ્યું છે. આગ લાગ્યા બાદ લોકોએ પાણી લઈને આગ પર કાબૂ મેળવવાનો પ્રયાસ કર્યો હતો. ભોજન સમારંભમાં મંગાવવામાં આવેલી પાણીનો બોટલો વડે પણ લોકોએ આગ પર કાબૂ મેળવવાનો પ્રયાસ કર્યો હતો.

બાદમાં થરાબ નગરપાલિકાની ફાયર ટીમને જાણ કરવામાં આવી હતી. ફાયરની ટીમે ઘટનાસ્થળે પહોંચીને આગ પર કાબૂ મેળવ્યો હતો. આગના બનાવ દરમિયાન કોઈ જાનહાની કે કોઈને ઈજા પહોંચી ન હોવાથી લોકોએ રાહતનો શ્વાસ લીધો હતો.

આગનો બનાવ બન્યો ત્યારે પવનની ઝડપ વધારે હોવાથી કોઈ કંઈ સમજે તે પહેલા જ લગ્ન માટે બાંધેલો સમિયાણો બળીને ખાખ થઈ ગયો હતો. આ ઉપરાંત બાજુમાં પડેલા મંડપ સર્વિસનો કાપડનો જથ્થો પણ બળી ગયો હતો.

પાલિકાની ગાડી પહોંચી તે પહેલા જ લગ્ન મંડપનું કાપડ બળીને ખાખ થઈ ગયું હતું. ભોજન સમારંભ ચાલી રહ્યો હતો ત્યારે આગ લાગતા લોકો જમવાની થાળીઓ મૂકીને ભાગ્યા હતા.

ઉલ્લેખનીય છે કે બે અઠવાડિયા પહેલા જ ડીસા-ભીલડી હાઇવે પર એત લગ્ન સમારંભમાં અચાનક આગ લાગી હતી. આદ બાદ લગ્ન મંડપમાં દોડધામ મચી ગઈ હતી. આગની ઘટનામાં લગ્નની ચોરી, વોટર કુલર અને મંડપનો સમાન બળી ગયો હતો. સ્થાનિક લોકો અને ફાયરની ટીમે ઘટના સ્થળે પહોંચીને આગ પર કાબૂ મેળવ્યો હતો. જોકે, ત્યાં સુધી તો લાખો રૂપિયાની કિંમતનો સામાન બળી ગયો હતો.