Fire in Cars: ભરૂચ અને બનાસકાંઠામાં કારમાં આગના બનાવ, બંને કાર બળીને ખાખ

અમદાવાદ: બનાસકાંઠા (Banaskantha) અને ભરુચ (Bharuch)માં કારમાં આગના બનાવ બન્યા છે. બંને બનાવમાં કાર બળીને ખાખ થઈ ગઈ છે. બંને કેસમાં કોઈ જાનહાની થઈ નથી. ઉલ્લેખનીય છે કે છેલ્લા બે દિવસથી રાજ્યમાં આગના અનેક બનાવ બન્યા છે. બે દિવસ પહેલા જ અરવલ્લી જિલ્લામાં ત્રણ ટ્રક વચ્ચે ટક્કર બાદ ભયંકર આગ લાગી હતી. આ આગમાં બે લોકો ભડથું થઈ ગયા હતા. એક દિવસ પહેલા બારડોલીના જોળવા જીઆઈડીસી (Jolva GIDC) ખાતે એક ગોડાઉનમાં આગ લાગી હતી.

બનાસકાંઠાના તલોદમાં કારમાં આગ: મળતી માહિતી પ્રમાણે સાબરકાંઠાના તલોદના હરસોલ રોડ પર કારમાં અચાનક આગ લાગી હતી. આગ શોર્ટ સર્કિટને લઈને લાગી હોવાનું પ્રાથમિક અનુમાન છે. આગ લાગી ત્યારે કારમાં બે લોકો સવાર હતા. જોકે, સમયસૂચકતા વાપરીને બંને કાર નીચે ઉતરી ગયા હતા.

આગને પગલે લોકોનાં ટોળે ટોળા એકઠા થઈ ગયા હતા. આગ લાગ્યાની જાણ બાદ તલોદ પોલીસ પણ ઘટનાસ્થળે પહોંચી હતી. આગ એટલી વિકરાળ હતી કે કાર સંપૂર્ણ બળીને ખાખ થઈ ગઈ હતી.

ભરૂચમાં કારમાં આગ: કારમાં આગનો બીજો એક બનાવ ભરૂચના અંકલેશ્વર ખાતે નેશનેલ હાઇવે નંબર 48 પર બન્યો છે. જેમાં અગમ્ય કારણોસર એક કારમાં આગ લાગી ગઈ હતી. આગ એટલી ભયંકર હતી કે આખી કાર બળીને ખાખ થઈ ગઈ હતી.

મળતી માહિતી પ્રમાણે વડોદરાનો એક પરિવાર શીરડી ખાતે દર્શન કરીને પરત ફરી રહ્યો હતો ત્યારે નેશનલ હાઇવે નંબર 48 પર આ બનાવ બન્યો હતો. જેમાં મોતાની ગામ નજીક કારમાં આગ લાગી ગઈ હતી. કારમાં સવાર પરિવારની સમયસૂચકતાને પગલે તેમનો જીવ બચી ગયો હતો.

માંગરોળમાં ફાસ્ટ ફૂડની લારીમાં આગ: એક દિવસ પહેલા જૂનાગઢના માંગરોળમાં ફાસ્ટ ફૂડની એક લારીમાં આગ લાગી હતી. આ બાદ માંગરોળ નગરપાલિકાની ફાયર શાખાએ આગ પર કાબૂ મેળવ્યો હતો. આ ઘટનામાં કોઈ જાનહાની થઈ ન હતી. આગ લાગવાથી લારી ઉપર બાંધેલો મંડપ બનળીને ખાખ થઈ ગયો હતો. (તસવીર: ભરૂચમાં આગ)

ટ્રકમાં આગ: બે દિવસ પહેલા દાહોદના લીમખેડા તાલુકામાં એક ટ્રકમાં અચાનક આગ લાગી ગઈ હતી. હકીકતમાં આગ ડ્રાઇવરની કેબિનમાં લાગી હતી. ડ્રાઇવર સમયસૂચકતા વાપરીને નીચે ઉતરી જતાં જાનહાની ટળી હતી. ટ્રકમાં શોર્ટ સક્રિટને પગલે આગ લાગી હોવાનું માનવામાં આવી રહ્યું છે.

ગૌશાળામાં આગ: બીજી તરફ એક દિવસ પહેલા અમરેલીના ધારીમાં કામધેનુ ગૌશાળામાં આગ લાગી હતી. અહીં પશુઓ માટે રાખવામાં આવેલા ચારામાં અચાનક આગ લાગી હતી. ધારીને ભાડેર ગામ ખાતે આ બનાવ બન્યો હતો. આગ બાદ ફાયર વિભાગે પાણીનો મારો ચલાવીને આગ પર કાબૂ મેળવ્યો હતો.